ၸၢႆးယူႇၼႃႈသိုၵ်း

ႁိူၼ်းဢွၼ်ႇပီႈေၵႃႈ ပဵၼ်မႆႉသီႇလၵ်း ပၵ်းဝႆႉသီႇၽၢႆႇ ၵွၼ်ၵၢႆႇမႆႉတီးတုတ်ႈ ႁဵတ်းသုမ်ႉမုင်းႁူဝ်ဢိူဝ်ႈယိင်း..... တူဝ်ၸႂ်ေၵႃႉသိုၵ်း မီးၵိုၵ်းပႃးထႅင်ႈ ဢႅင်ႈယွင်ႈပီႈပႃးမၢၵ်ႇ ၽၢၵ်ႇလင်ပီႈေၸးပိူဝ်ႉ တၢင်းႁိူဝ်ႉပီႈဢမ်ႇသွၼ်ႇ ၶူၺ်တွၼ်ႇႁဵတ်းတီႈဝၢင်းႁူဝ် တူဝ်ၸႂ်ဢွၼ်ႇပီႈၼွၼ်းၵတ်း မိူၼ်သတ်းေသတႃႉေၵႃႈ ပီႈဢမ်ႇၼႅင်ၸႂ်သင်ယိင်းဢူၺ်... သူၼွင်ႉတၢႆတီႈႁိူၼ်း ယင်းလႆႈၵွမ်ႇ ပီႈတၢႆၼိူဝ်လွႆသွမ်ႇသွမ်ႇ ပီႈလႆႈၵွမ်ႇတၢင်းထူင်ပိူဝ်ႉ ႄလႈ လဝ်းၵွင်ႈယူႇ ပီႈဢမ်ႇၼႅင်ၸႂ်သင်ယဝ်ႉယိင်း....... ==================================== Created by ပၢႆၵမ် ....မွင်းထိုင်ယိင်း 26 July .... (Line)

တွၼ်ႈၼိုင်ႈ

"တွၵ်ႉ  တွၵ်ႉ...လုၵ်ႈယိင်း လုၵ်ႉလႆႈယဝ်ႉ"

ၼွင်ႉဢွၼ်ႇ လုၵ်ႉမႃးသီႁူသီတႃသေ ၽုၺ်ႇၽၵ်းတူပၼ် ...

"ပူၵ်းႁဵတ်းသင်လႃႇမႄႈ တိုၵ်ႉၸဝ်ႉယူႇ"

"ဢလူဝ်ႉ ..ႁူၵ်းမူင်းယဝ်ႉၼႃလုၵ်ႈ"

ၼွင်ႉဢွၼ်ႇ ၶိုၼ်းယုၵ်ႉမိုဝ်းမၼ်းသေ တူၺ်းဢွမ်မွင်း ဢၼ်ပၢတ်ႈဝႆႉယူႇၼၼ်ႉသေ ၶိုၼ်းတူၺ်းၵႂႃႇၼွၵ်ႈႁိူၼ်း....

"ယၢမ်းမူင်းၶႃႈ တိုၵ်ႉမီး ႁႃႈမူင်းၵူၺ်း လုၵ်ႈတေၼွၼ်းၶိုၼ်းၵွၼ်ႇ"

"ဢိူဝ်ႈဢိူဝ်ႈ"

မႄႈၶဝ်ပိၵ်ႉပၼ်ၽၵ်းတူသေ ဝၢႆႇႁူဝ်ဢွၵ်ႇၵႂႃႇ ၼွင်ႉဢွၼ်ႇတိုၵ်ႉဢၢင်ႈတေၼွၼ်းၶိုၼ်း ၼၼ်ႉ မႄႈၶဝ်မိူၼ်ႁၢင်ႈတူၵ်းၸႂ်သေ....

"ဢူၺ်ႉ  ဢမ်ႇလႆႈဢမ်ႇလႆႈလုၵ်ႈယိင်း မိူဝ်ႈၼႆႉလူဝ်ႇၵႂႃႇ ႁဵတ်းၵၢၼ်ၸွမ်းဝႃႇဢူႈဝႃႈ ဢမ်ႇလႆႈၼွၼ်းယဝ်ႉ "

ၼွင်ႉဢွၼ်ႇ ႁဵတ်းမိူၼ်ႁႆႈလဵၼ်ႈသေၶၢင်းယူႇ....

"ၼွင်ႉဢွၼ်ႇဢူၺ် ၵၢမ်ႇသင်ပေႉမႃးႁၢႆႉ မႃးယူႇႁိူၼ်း ယူဝ်တေလႆႈၼွၼ်းလီလီ ႁိုဝ်းႁိုဝ်း.....မွၼ်ႁူဝ်ဢူၺ် လၢတ်ႈၼႄ မႄႈႁဝ်းၽွင်ႈဝႃႈ ႁဝ်းတိုၵ်ႉပႆႇၶ်ႂ်ႈၽၢတ်ႇၵၼ်ၼႆ"

မႄႈၶဝ်တင်းဢွၵ်ႇၵႂႃႇသေ တၢင်းႁွင်ႉလၢတ်ႈ ...

"ပေႃးလုၵ်ႈပႆႇလုၵ်ႉ ၵမ်ႉမႄႈတေႁႂ်ႈ ဢၢႆႈၵွၼ်မႃးသုၵ်ႈၼႃႈပၼ်ၵူၺ်း"

"ဢႃႈ......ဢမ်ႇဢမ်ႇဢမ်ႇ ဢမ်ႇဢဝ် လုၵ်ႉယဝ်ႉ"

ဢၢႆႈၵွၼ်ၼႆႉ ပဵၼ်မႃသီၶၢဝ်ၶူၼ်ပူင်း တူဝ်တိၼ်ပွၵ်းၼၼ်ႉယဝ်ႉ ပဵၼ်မႃဢၼ် ၼွင်ႉဢွၼ်ႇ လီၸင်းသေပိူၼ်ႈယဝ်ႉ မိူဝ်ႈမၼ်းတႄႇမႃးတီႈႁိူၼ်း ဢမ်ႇပႆႇႁူႉလွင်ႈတီႈႁိူၼ်းလီလႄႈ လုၵ်ႉလႃႈလႃႈ မိူၼ်ယၢမ်ႈႁဵတ်းမႃး ထုၵ်ႇၺႃးမႄႈမၼ်းၼၢင်း ဢဝ်ဢၢႆႈၵွၼ် မႃးလေးၼႃႈလႄႈ ၵွပ်ႈၼၼ်ပေႃးငိၼ်းၸိုဝ်ႈ ဢၢႆႈၵွၼ်ၼႆ ၼွၼ်းပေႃးဢမ်ႇလႆႈ ...

ဝဵင်းသီႇပေႃႉၼႆႉ  ယွၼ်ႉၸမ်မႄႈၼမ်ႉတူႈလႄႈ ၶၢဝ်းလိူၼ်သိပ်းဢဵတ်းၵူၺ်း မွၵ်ႇၵုမ်ႈပေႃႈတၼ်ယဝ်ႉ ၵၢင်ၼႂ် ႁႃႈမွင်းႁူၵ်းမူင်းၼႆႉတိုၵ်ႉႁၼ်ၸဝ်ႉယူႇ ပေႃးပဵၼ်ၵၢင်ဝၼ်းသမ်ႉမႆႈႁႅင်းၼႃႇ .....

မိူဝ်ႈၼႆႉၵေႃႈ ၼွင်ႉဢွၼ်ႇၵႂႃႇၸွမ်း ပိူၼ်ႈၵၢၼ်ႉ 

ၶဝ်ႈၵၢပ်ႇဝႃႇ ပၢႆသလိူဝ်မၼ်းၼၢင်းပီး သမ်ႉပၢႆပူၵ်ႉပူၵ်ႉႁေႃႇႁေႃႇ ပေႃးတၢၼ်ႇၶဝ်ႈတူမ်ႈၵူၺ်ႈယဝ်ႉ ပႆပႆယင်းပႆႇထိုင်သူၼ်ၶဝ်ႈၵၢပ်ႇ လိုဝ်ႈပေႃးဢမ်ႇႁူႉလၢႆတီႈ ....

"လုၵ်ႈယိင်း ထွတ်ႇပႅတ်ႈၽွင်ႈလႄႈ သိူဝ်ႈလုၵ်ႈၼၼ်ႉ "

မၼ်းၼၢင်းၸူသူပ်းဝႆႁူဝ်သေ 

"ဢမ်ႇ ၶႃႈၵူဝ်လမ် မိူၼ်ပီႈသၢဝ်ႁဝ်းၼႆႉ"

ၶိုၼ်းၸီႉသႂ်ႇပီႈၼၢင်းၶဝ်  ၼၢင်းလိူၼ် 

ပီႈၼၢင်းမၼ်း ၸင်ႇဝၢႆႇၸူးမၼ်းသေ ...

"ပီႈလမ် ၼႆၵႂႃႈၼႆႉၼေႃႈ ၼွင်ႉတူၺ်းလီလီ ပီႈၼႆႉၶၢဝ်လိူဝ် ၵေႃႉဢၼ်ႁွင်ႉဝႃႈ ၼၢင်းၶၢဝ် ၶဝ်ၼၼ်ႉၵွၼ်ႇဢိူဝ်ႈၼႆႉ"

ပႆပႆပွင်ႉပွင်ႉ ႁွင်ႉႁွင်ႉၶၢင်းၶၢင်း ပႆတၢင်းပေႃးတၢၼ်ႇၵူၼ်းမဝ်းလဝ်ႈယဝ်ႉ ဢူႈၶဝ်ၸင်ႇဝႃႈ....

"လုၵ်ႈယိင်း လုၵ်ႈယဝ်ႉၸၼ်ႉၸွမ်ၼႂ်းဝဵင်း လၢႆလၢႆဢမ်ႇလႆႈ လုၵ်ႈတေလႆႈၶိုၼ်ႈ ၸၼ်ႉၸွမ်ဝၢၼ်ႈၼွၵ်ႈၵွၼ်ႇ ၸင်ႇၵိုင်ႇပဵၼ်လုၵ်ႈယိင်းပေႃႈဢိူဝ်ႈ"

"ပေႃႈ.. ထၢင်ႇတႄႉၶႃႈတေ ဢမ်ႇပႆႇထိုင် ၸၼ်ႉငဝ်ႈ တေၶႅမ်ႈပႅတ်ႈဢွၼ်တၢင်းယဝ်ႉ "

"ဢမ်ႇၶႅမ်ႈၼင်ႇၵဝ်ႇလေႃႇလုၵ်ႈ ပေႃႈမႄႈပီႈၼွင်ႉလုၵ်ႈၼႆႉ ႁဵတ်းၵၢၼ်ၼႂ်းလႅတ်ႇ ၼႂ်းၽူၼ်ၸိုင်ႉၼႆသေ ၸွႆႈထႅမ်လုၵ်ႈၶိုၼ်ႈႁဵၼ်းမႃး တေႃႇပေႃးသုတ်းၸၼ်ႉ ႁဝ်းတင်းဢမ်ႇတၢႆ"

မႄႈၶဝ်ၸင်ႇၵမ်ႉထႅမ်ထႅင်ႈ ...

"ၸႂ်ႈယဝ်ႉလုၵ်ႈ ပေႃးလုၵ်ႈဢမ်ႇႁဵတ်းတူၺ်း တေဢမ်ႇႁူႉဝႃႈ လႆႈငိုၼ်းမႃးၸိုင်ႉႁိုဝ် ဢၼ်ၸွႆႈထႅမ်လုၵ်ႈပဵၼ် ႁူဝ်သိပ်းႁူဝ်သၢဝ်း ၼႆႉ"

"ၶႃႈ ဢမ်ႇၶၢမ်ႇလႅတ်ႇလႆႈယဝ်ႉၶႃႈ မႄႈဢူၺ်ဢူၺ် လုၵ်ႈတေမိူဝ်းၶိုၼ်းယဝ်ႉၼႃ"

"ဢိူဝ်ႈဢိူဝ်ႈ မိူဝ်းလႄႈလုၵ်ႈ"

"ႁေး ...ၸူမ်းယဝ်ႉၶႃႈမႄႈ"

"ဢမ်ႇႁေး ပေႃႈဢမ်ႇပၼ်ၶႂၢင်ႉ ပဵၼ်ႁိုဝ်ၵေႃႈမိူဝ်ႈၼႆႉတႄႉ လုၵ်ႈတေလႆႈၵႂႃႇႁႂ်ႈထိုင်သူၼ်"

ၼွင်ႉဢွၼ်ႇၼႆႉ ပိၵ်ႉသမ်ႉဝႃႈပီးၵေႃႈ ဢမ်ႇၸႂ်ႈပီးပိုၵ်းပိုၵ်းလူင်ၸိုင်ႉၼၼ် တေႃႉတႄႉပီးဢွတ်းတွတ်း ပီးၵႅမ်ႈလွၵ်း ၽိဝ်ၼိူဝ်ႉၶၢဝ် သေ ပဵၼ်ဢၼ်လီႁၵ်ႉတႄႉ ...

မၼ်းၼၢင်း ယၢမ်ႈမႃးသူၼ်ၸွမ်းပေႃႈမႄႈမၼ်း လၢႆဝၼ်းယဝ်ႉ ၵူၺ်းၵႃႈဢမ်ႇထိုင်သေပွၵ်ႈ ယွၼ်ႉပိူဝ်ႈမႄႈၶဝ် ဢီးလူသေ ပွႆႇမၼ်းပွၵ်ႈၶိုၼ်း တူၺ်းမိူဝ်ႈၼႆႉတႄႉ မႄႈၶဝ်ပၼ်မိူဝ်းသေတႃႉ ပေႃႈၶဝ်တေဢမ်ႇလႅပ်ႈပၼ်ၶႂၢင်ႉလႆႈ....

#တွၼ်ႈသွင်

ဝၢၼ်ႈတႃႈပူၵ်ႇ

"မွၵ်ႇၵွၼ်"

လႆႈငိၼ်းသဵင်ႁွင်ႉၽၢႆႇၼႃႈႁိူၼ်းလႄႈ ၵူၼ်းၵေႃႉၼိုင်ႈဢွၵ်ႇမႃးတူၺ်း...

"ဢူၺ်း.....ဢီႇသွပ်ႉ ႁဵတ်းႁိုဝ်ၽႅဝ်မႃးၼႆႉ မႃးလူးမႃးလူး"

မွၵ်ႇၵွၼ် ၸူမ်းဢူၺ်းၵေႃႉမၼ်းၼႃႇလႄႈ ဢွၵ်ႇမႃးၵွတ်ႇသႂ်ႇဢူၺ်းၵေႃႉမၼ်းယူႇ ...

"ပွႆႇ ပွႆႇလႆႈယဝ်ႉ ဢီႇသူမ်ႈ တၢင်းတူဝ်ၵႂၢႆးသူၼႆႉ တေဢဝ်ႁဝ်းလူမ်ႉယဝ်ႉ"

ဢီႇသွပ်ႉၼႆႉ ပဵၼ်ၸိုဝ်ႈဢၼ်လဵဝ်တႃႇမွၵ်ႇၵွၼ်ႁွင်ႉ ယွၼ်ႉပိူဝ်ႈ မိူဝ်ႈၶဝ်ၶိုၼ်ႈႁဵၼ်းၸွမ်းၵၼ်ၼၼ်ႉ ၶဝ်ၵႂႃႇၵိၼ် တၢင်းၵိၼ်ပိင်ႈတီႈလၢၼ်ႉ ၸိုဝ်ႈၶဝ် သွင်ၵေႃႉႁွင်ႉၵွၼ်မိူၼ်ၵၼ်သေတႃႉ လွင်ႈလႆႈၸႂ်ဢမ်ႇမိူၼ်ၵၼ်လႄႈ ၵေႃႉၼိုင်ႈဝႃႈတေဢဝ်သွပ်ႉ ၵေႃႉၼိုင်ႈဝႃႈတေၼမ်ႉသူမ်ႈ ၼႆလႄႈ ၶဝ်ထဵင်ၵၼ်သေ ၸင်ႇႁွင်ႉၸပ်းမႃး ပုၼ်ႈတႃႇၶဝ်သွင်ၵေႃႉ  ....

"ဢိူဝ်ႈ သွပ်ႉ မႂ်းႁဵတ်းႁိုဝ်ႁွတ်ႈမႃးလႃႇၼႆႉ"

"ထၢမ်ဢမ်ႇလၢၵ်ႇလၢႆးသေဢိတ်းၼေႃ ၵေႃႈၶီႇလူတ်ႉမႃးၵူၺ်းဢိူဝ်ႈ "

"ႁႄႈႁႄႈ ၵဝ်ဝႃႈ ဢမ်ႇပွင်ႇၶၢဝ်ႇဝႆႉသေဢိတ်းၼႆၵႂႃႈ"

"ပေႃးၵဝ်ပွင်ႇၶၢဝ်ႇဝႆႉ မႂ်းၵေႃႈတေဢမ်ႇတိုၼ်ႇတဵၼ်ႈႁေယဝ်ႉဢိူဝ်ႈ "

ၶဝ်သွင်ၵေႃႉၶဝ်ႈမိူဝ်းၼႂ်းႁိူၼ်းသေ မူၺ်ၵွၼ်ၶိုၼ်းထၢမ်...

"မီးမႂ်းၵူၺ်းႁႃႉၼႆႉ ဢီႇသူမ်ႈ"

"ၸႂ်ႈယဝ်ႉဝႃႈ မိူဝ်ႈၼႆႉ ၵဝ်လႅၼ်ၶဝ်ဝႃႈ ႁူဝ်ၶႆႈတွင်ႉၸဵပ်း ဢမ်ႇၵႂႃႇၸွမ်း"

"တၢင်းယၢမ်ႈမႂ်းၼႆႉ ပႆႇႁၢႆလႆႈၼေႃ  ဢီႇသူမ်ႈ"

မိူဝ်ႈၶိုၼ်ႈႁဵၼ်းၼၼ်ႉၵေႃႈ မၼ်းၼၢင်းၶႂ်ႈၼွၼ်းၼႃႇလႄႈ ယၢမ်ႈႁႂ်ႈမူၺ်ၵွၼ်ႁဵတ်းလိၵ်ႈယွၼ်းၶႂၢင်ႉပၼ် ..

"ၽႂ်ၸႂ်ႉလႅတ်ႇၶႂ်ႈမႆႈ မႂ်းပႆႇႁူႉၵႂႃႈ တၢၵ်ႇလႅတ်ႇႁဵတ်းၵၢၼ်ၼႆႉ ပဵၼ်ႁိုဝ် ၵဝ်ၵႂႃႇၵၢၼ်ႉၶဝ်ၵၢပ်ႇၸွမ်း ဝၼ်းၼိုင်ႈၵူၺ်း တူၺ်းလူးၼိူဝ်ၵဝ်ပေႃးလမ်ၵႂႃႇ ၼႃႇႁၢင်ႈၵဝ်ပေႃးတေၶႅမ်ႈယဝ်ႉ "

"ၵဝ်တင်း ဢမ်ႇႁၼ်မႂ်းပိူင်ႈသင် တိုၵ်ႉပီးၶၢဝ်ၶၢၼ်ႉမိူၼ်ၵဝ်ႇယူႇ"

"လႃႇၵၼ်တၢင်းၵူတ်ႉထႅင်ႈဢိူဝ်ႈၼႆႉၼေႃႈ"

"ၶိၵ်းၶိၵ်း"

မူၺ်ၵွၼ် ၶူဝ်လႄႈ မွၵ်ႇၵွၼ်ႁဵတ်းၼႃႈၸႂ်လမ်သေ ...

"ၶူဝ်ဝႆႉလႄႈ တေသိုပ်ႇၽူၼ်းလၢတ်ႈၼႄ ပီႈလၢဝ်ႁၢၼ်ၵွၼ်ႇ ဝႃႈၼမ်ႉသွပ်ႉမၼ်းမႃးႁေႈ ၼႂ်းႁိူၼ်းႁဝ်းၼႆ"

ၸၢႆးလၢဝ်ႁၢၼ်ၼႆႉ ပဵၼ်ၵေႃႉဢၼ်မူၺ်ၵွၼ်လၵ်ႉႁၵ်ႉၸဵမ်မိူဝ်ႈယူႇႁူင်းႁဵၼ်း မိူဝ်ႈလဵဝ် မၼ်းၸၢႆး လႆႈၵႂႃႇႁၢပ်ႇၵၢၼ်ၸိူဝ်ႉၸၢတ်ႈယူႇ....

"သႅင်ႇသင်ၵၼ် တၢင်းပီႈလၢဝ်ႁၢၼ် ႁဝ်းဢမ်ႇလၢတ်ႈတေႃႇၵၼ်ယဝ်ႉၼႃ"

"မိူဝ်ႈလဵဝ်ၵူၺ်းၵႃႈ ၶိၵ်းၶိၵ်း"

"ဢီႇသူမ်ႈ ႁဝ်းတေဢဝ်သူတၢႆယဝ်ႉ ››ဢိူဝ်ႈၼေႈ ႁဝ်းတေမႃးႁဵတ်းၶႅၵ်ႇသူႁေ မွၵ်ႈသွင်သၢမ်ဝၼ်း ဢိူဝ်ႈၼႃ ငိၼ်းၸူမ်းဝႆႉလႄႈ "

"ႁေး ....ယႃး တေႉႁႃႉသူ ၸူမ်းတေႉယဝ်ႉ"

"ၵူၺ်းၵႃႈ သူတေလႆႈဢွၼ်ႁဝ်းလႄႇ ၼႂ်းဝဵင်းသီႇပေႃႉသူၼႆႉ ႁႂ်ႈပေႃးၸွတ်ႇ ၼႂ်းသၢမ်ဝၼ်း"

"ဢလူဝ်ႉ ... တေႃႈသူတင်းဢမ်ႇ ဢွၼ်ႁဝ်းလႄႇ ဝဵင်းပၢင်ႇဢူးသူၸွတ်ႇႁေ ၼၼ်ႉတႄႉ ဢမ်ႇပၼ်ၶေႃႈမၼ်ႈၵႅၼ်ႇလႆႈ"

"ပဵၼ်ႁိုဝ်ၵေႃႈ ၼိူဝ်လွႆသုင်ၼၼ်ႉတႄႉ တိုၼ်းတေလႆႈၽႅဝ်ယူႇၼႃ"

မူၺ်ၵွၼ်ၼႆႉ ပဵၼ်ၵူၼ်းမေႃ ၸွႆႈထႅမ်ဢူၺ်းၵေႃႉ မေႃတူၺ်းထိုင်ဢူၺ်းၵေႃႉ လႆႈဝႃႈမေႃဝႆႉၵႃႈၶၼ် ဢူၺ်းၵေႃႉ တေႉတေႉ ၸဵမ်မိူဝ်ႈ ၶိုၼ်ႈႁဵၼ်းၸွမ်းၵၼ်တီႈပၢင်ႇဢူး တေႃႇပေႃးၶိုၼ်းၵႂႃႇၶိုၼ်ႈ ၸၼ်ႉၸွမ် တီႈဝဵင်းလိူဝ်ႇၸွမ်းၵၼ်ၵေႃႈ မူၺ်ၵွၼ် ဢမ်ႇၼၼ် ဢီႇသွပ်ႉ လႆႈၸွႆႈထႅမ် မွၵ်ႇၵွၼ်မႃးတၢင်းၼမ် ၽႂ်ဢမ်ႇယွမ်းၽႂ်.....

#တွၼ်ႈသၢမ်....

"သွပ်ႉ မိူဝ်ႈၼႆႉ ႁဝ်းတေဢွၼ်သူလႄႇ သၢမ်တီႈ

 ႑. ႁေႃၸဝ်ႈၾႃႉ ႒.ၶုမ်ၸဝ်ႈၾႃႉ ႓. တီႈၶဵၼ်ႇၾႃႉ  ႁႁ "

"ႁေႃၸဝ်ႈလႅဝ်း ၸဝ်ႈမိတ်ႈၶဝ်လူး ဢမ်ႇဢွၼ်လႄႇႁ "

"မႃးႁဵတ်းၸိမ်ယွၵ်းယူႇ ၵမ်ႉတေဢမ်ႇဢွၼ်လႄႇယဝ်ႉ"

"ၵေႃႈသူလၢတ်ႈပဵၼ်ၾႃႉလၢႆလၢႆလူး "

"ဢိုမ်း ပေႃးသူၶႂ်ႈလႄႇ ၸဝ်ႈလႅဝ်းၵေႃႈ ၵႂႃႇႁမ်းငၢႆးလႄႈ သီႇပေႃႉႁဝ်းၼႆႉတႄႉပဵၼ်ဝဵင်းၸဝ်ႈၾႃႉလႄႈ တေလႆႈလၢတ်ႈၸိုဝ်ႈၸဝ်ႈၾႃႉၵူၺ်း ဢမ်ႇမီးၸဝ်ႈလႅဝ်း ၸဝ်ႈလၢဝ်းသင်"

မွၵ်ႇၵွၼ်ၶဝ်သွင်ၵေႃႉ ၶဝ်ႈလႄႇတီႈႁေႃၸဝ်ႈၾႃႉဢွၼ်တၢင်း ....

ႁေႃၸဝ်ႈၾႃႉသီႇပေႃႉၼႆႉ တေၽုၺ်ႇပၼ် ၵၢင်ၼႂ် 9:00 တေႃႇ 12:00 ဝၢႆးဝၼ်း 3:00 တေႃႇ 5:00

ၼႆယဝ်ႉ မၢင်ဝၼ်းၵေႃႈ ဢမ်ႇၽုၺ်ႇပၼ် .....

မူၺ်ၵွၼ် ဢဝ်ၽူၼ်းမၼ်းသေ ထၢႆႇၽၢႆႇၼိုင်ႈယဝ်ႉ

ၽၢႆႇၼိုင်ႈယူႇ မွၵ်ႇၵွၼ်ၵေႃႈ မိူၼ်ၵၼ်ယဝ်ႉ ပိၵ်ႉသမ်ႉဝႃႈ မၼ်းၼၢင်းပဵၼ်ၵူၼ်းသီႇပေႃႉသေတႃႉ ၵႂႃႇၶိုၼ်ႈႁဵၼ်းႁိုင်ယဝ်ႉလႄႈ ဢမ်ႇလႆႈၶဝ်ႈလႄႇ ႁိုင်ယဝ်ႉ ယိပ်းဢဝ်ၽူၼ်းသေ ထၢႆႇလၢႆးၼိုင်ႈယဝ်ႉလၢႆးၼိုင်ႈယူႇ သမ်ႉပေႃးဢမ်ႇတၼ်းၽၢင်ႉမႅၼ်ႈႁိမ်းႁွမ်းယဝ်ႉ ....

ထၢႆႇႁင်းၵူၺ်း လၢႆးမၼ်းၶႂ်ႈမူတ်းယဝ်ႉ ၸင်ႇႁွင်ႉမူၺ်ၵွၼ်ထၢႆႇပၼ်ထႅင်ႈ...

"သွပ်ႉ မႃးထႆႇပၼ်ႁဝ်းၵမ်ႉ"

"တေလႆႈၸႂ်ႉ ၵွင်ႈ360 ၼႆႉယူႇႁ "

"ၸႂ်ႉဢၼ်လႂ်ၵေႃႈလႆႈယဝ်ႉ ႁဝ်းတိုၼ်းလဝ်းယူႇယဝ်ႉ ၵူၺ်းၵႃႈ ယႃႇႁႂ်ႈႁၼ်ပီးၼႃ"

"OK တေထၢႆႇယဝ်ႉၼႃ ယုမ်ႉ"

"ဢူၺ်ႉ"

ၽွင်းတိုၵ်ႉထၢႆႇၶႅပ်းႁၢင်ႈယူႇၼၼ်ႉ မွၵ်ႇၵွၼ်ယဵပ်ႇမႅၼ်ႈ မၢၵ်ႇဢုတ်ႇဢၼ်ၵၢၼ်ႉဝႆႉၼၼ်ႉလႄႈ ၸင်ႇပိၼ်ႈၵႂႃႇတင်းလင်ယဝ်ႉ သဵင်ဢၼ်ႁွင်ႉၼၼ်ႉတႄႉ ဢမ်ႇၸႂ်ႈသဵင်ၶၢင်းၸဵပ်း ယွၼ်ႉပိူဝ်ႈမီးမၢဝ်ႇလဝ််းၵေႃႉၼိုင်ႈ မႃးႁွပ်ႇလင်မၼ်းဝႆႉလႄႈ ၺႃးမိူဝ်ႈ ယိင်းမူၺ်ၵွၼ်ၵေႃႈ ဢဝ်ၽူၼ်းထၢႆႇသႂ်ႇၵမ်းလဵဝ်ၼၼ်ႉယဝ်ႉ သဵင်ႁူဝ်ၸႂ်ဢွၼ်ႇ ယိင်းမွၵ်ႇၵွၼ်ၵေႃႈ ပေႃးတွတ်ႇၶိုၼ်ႈမႃး ၵမ်းလဵဝ် ပဵၼ်ယွၼ်ႉတူၵ်းၸႂ်ဢၼ်ဢၢင်ႈလူမ်ႉႁ ဢမ်ႇၼၼ် ႁၼ်သၢႆတႃဢၼ်ယၵ်ႉတူၺ်းၼၼ်ႉႁိုဝ် ယင်းပႆႇတႅပ်းတတ်းလႆႈ မူၺ်ၵွၼ်ၸင်ႇ တူၵ်းၸႂ်ၸွမ်းသေ....

"သူမ်ႈ ပဵၼ်သင်လႃႇၼၼ်ႉ "

ၸၢႆးမွၼ်းၾႃႉၵေႃႈ ၼႅတ်ႈဢဝ်တူဝ်မွၵ်ႇၵွၼ်ၸုၵ်းသေ ၽႃႈမိုဝ်းမၼ်းယူႇ မွၵ်ႇၵွၼ်တႄႉ ၼႃႈမၼ်းပေႃးႁႅင်ႈယဝ်ႉ ၵႂၢမ်းသင်ၵေႃႈဢမ်ႇလၢတ်ႈ ယိင်းမူၺ်ၵွၼ်ပေႃးလႆႈလၢတ်ႈတၢင်ယဝ်ႉ...

"ငိၼ်းၸူမ်းယဝ်ႉၶႃႈပီႈ"

"လႆႈယူႇၶႃႈ ဢမ်ႇပဵၼ်သင်"

မူၺ်ၵွၼ်ၸင်ႇၵႂႃႇ မႄးပၢၵ်ႈၶူၼ်ႁူဝ်ဢူၺ်းၵေႃႉမၼ်းသေ ...

"ပဵၼ်သင်ၵႂႃႇလႃႇ သူ "

"ဢမ်ႇပဵၼ်သင် တူၵ်းၸႂ်ၵႂႃႇဢိတ်းၼိုင်ႈၵူၺ်း"

"တူၵ်းၸႂ် မၢဝ်ႇၵွတ်ႇႁႃႉ"

"ယွင်ႇ ...ၵမ်ႉႁဝ်းတေဢဝ်သူႁဵတ်းၽီပႂ်ႉႁေႃယဝ်ႉ ၶဝ်ႈၵႂႃႇလႄႇတၢင်းၼႂ်းႁေႃလႃႈ"

ၼႂ်းႁေႃၼၼ်ႉ ဢမ်ႇလႆႈၶဝ်ႈထိုင်ၸၼ်ႉၼိူဝ် တေႃႉတႄႉထိုင် ႁွင်ႈႁပ်ႉၶႅၵ်ႇၵူၺ်း မီးမႄႈပႃႈၵေႃႉၼိုင်ႈ မႃးသပ်းလႅင်းၼႄ လွင်ႈပိုၼ်းၸဝ်ႈၵျႃႇသႅင်လႄႈ ၸဝ်ႈၼၢင်းသုၸၼ်ႇတီႇ လူၺ်ႈၶႅပ်းႁၢင်ႈၵမ်ႈၽွင်ႈသေ ၶဝ်သွင်ၵေႃႉ ၶိုၼ်းဢွၵ်ႇဝၢင်းႁေႃၵႂႃႇ.....

ယိင်းမွၵ်ႇၵွၼ် ၸင်ႇဢွၼ်ယိင်းမူၺ်ၵွၼ် ၵႂႃႇလႄႇတီႈ လွႆမွင်း ဢမ်ႇၼၼ် လွႆမူပ်ႇ ဢၼ်မီးၼႃႈတၢင်းတူၵ်း ဝဵင်းသီႇပေႃႉ....

လွႆမူပ်ႇၼႆႉ ပဵၼ်ဢွင်ႈၶုမ်ပႃႇႁဵဝ်ႈၸဝ်ႈၾႃႉသေ ဝၢႆးလင်မႃးမၢၼ်ႈၶဝ် မႃးၶုတ်းသေ ႁဵတ်းၵွင်းမူးတဵင်ဝႆႉ ၶုမ်မၢင်ဢၼ်ၵေႃႈ တိုၵ်ႉႁၼ်ဝႆႉယူႇ ယၢမ်းလဵဝ်....

ယိင်းမွၵ်ႇၵွၼ်ၶဝ်သွင်ၵေႃႉ ဢွၼ်ၵၼ်လႄႇတီႈၵွင်းမူးၼၼ်ႉ ယိင်းမူၺ်ၵွၼ်ၵႂႃႇဝႆႈၵွင်းမူးယူႇ ယိင်းမွၵ်ႇၵွၼ်တႄႉ ဢမ်ႇဝႆႈၸွမ်း....

"သူမ်ႈ ႁဵတ်းသင်ဢမ်ႇဝႆႈၸွမ်းႁဝ်းလႃႇ "

"ၵွင်းမူးမၢၼ်ႈၼႆႉ ႁဝ်းဢမ်ႇၶ်ႂႈဝႆႈ ဢမ်ႇႁူႉၶဝ်သႂ်ႇသင်ဝႆႉၼႂ်းမၼ်း "

"ၽြႃးမၢၼ်ႈၵေႃႈ ဢမ်ႇဝႆႈႁႃႉ"

"ဢမ်ႇဝႆႈ "

"ဢီႇသူမ်ႈ ၽီငရၢႆးယူႇတၢင်းလင်မႂ်းၼၼ်ႉၼေႈ"

"ဢမ်ႇၸႂ်ႈဝႃႈ ၵဝ်ဢမ်ႇၼပ်ႉယမ်ၽြႃးလူး ပေႃးပဵၼ်ၽြႃးမၢၼ်ႈၼႆႉ ၶဝ်လေႇဢဝ်ၽႅၼ်ႇယွၵ်းၽႅၼ်ႇယႅၵ်း သႂ်ႇၼႂ်းမၼ်းႁေ တဵင်ၼၢမ်ႇပိူၼ်ႈ ႁဝ်းႁၼ်မႃး

ၼမ်ယဝ်ႉ သူဢမ်ႇႁၼ်ႁ ပိူၼ်ႈတၢင်ႇမႃးၼႂ်းၽဵတ်ႉပုၵ်ႉ"

"ႁၼ်ယူႇ ၶဝ်သႂ်ႇၵေႃႈပဵၼ်လွင်ႈၶဝ် ႁဝ်းဢမ်ႇဝႆႈၽႅၼ်ႇတၢင်းၼႂ်းမၼ်းလူး ႁဝ်းဝႆႈႁုၼ်ႇႁၢင်ႈၽြႃးပဵၼ်ၸဝ်ႈၵူၺ်း "

"ဢိူဝ်ႈဢိူဝ်ႈ ဝႆႈႁေ ယွၼ်းသူးပႃးတႃႇပီႈလၢဝ်ႁၢၼ်သူၼၼ်ႉၽွင်ႈ ၵူဝ်လိုမ်း 😄😄"

"ၵမ်ႉတေၺႃးၵိၼ်ယဝ်ႉ ဢီႇသူမ်ႈ"

ဝၼ်းမိူဝ်ႈၼႆႉ မွၵ်ႇၵွၼ်ဢွၼ်ဢူၺ်းၵေႃႉမၼ်း ၵႂႃႇလႄႇ လၢႆလၢႆတီႈယူႇ ဝၢႆးဝၼ်းၵေႃႈ ၵႂႃႇလဵၼ်ႈၼမ်ႉတူၵ်းတၢတ်ႇ တီႈၼမ်ႉႁူးၼွႆႉသေ ပွၵ်ႈမႃးႁိူၼ်း ....

ၸၢႆးမွၼ်းၾႃႉတႄႉ ဝၢႆးသေၵႂႃႇလႄႇမႃးယဝ်ႉ မႃးယုမ်ႉယူႇႁင်းၵူၺ်းမၼ်း တၢင််းၼွၵ်ႈႁိူၼ်း မႄႈထဝ်ႈတီႈႁိူၼ်းၼၼ်ႉ ၸင်ႇထၢမ်....

"လၢၼ် ယုမ်ႉသင်ယူႇလႃႇ "

"ဢမ်ႇၶႃႈၼၢႆး "

"ဢေႃႈၼၢႆး..... လွႆမွၵ်ႇၵုမ်ႈသုမ်ႇ ဢၼ်ဝႃႈၼၼ်ႉ ၵႂႃႇတၢင်းလႂ်ၶႃႈ "

"ဢိူဝ်ႈ ပေႃးဢွၵ်ႇဝဵင်းၵႂႃႇသဵၼ်ႈတၢင်းလႃႈသဵဝ်ႈၼႆႉ ပေႃးပူၼ်ႉၶူဝ်ယဝ်ႉတၢၼ်ႇတၢၼ်ႇ လၢၼ်တေႁၼ်တၢင်းၶိုၼ်ႈၽၢႆႇၶႂႃမိုဝ်း ၼၼ်ႉယဝ်ႉ လွႆမွၵ်ႇၵုမ်ႈသုမ်ႇ"

"ၸူမ်းယဝ်ႉၶႃႈၼၢႆး"

"ပီႈမွၼ်းၾႃႉ ၼၢႆး ၶဝ်ႈမႃးၵိၼ်ၶဝ်ႈ လႆႈယဝ်ႉၶႃႈ"

ယိင်းၽူၺ်း မႃးႁွင်ႉၵိၼ်ၶဝ်ႈလႄႈ ၼၢႆးၶဝ်ၸင်ႇ ႁွင်ႉၸၢႆးမွၼ်းၾႃႉ ၶဝ်ႈမိူဝ်း...

"မႃးႄလႈၵိၼ်ၶဝ်ႈၵွၼ်ႇ လၢၼ်"

"ဢေႃႈၶႃႈၼၢႆး"

ၸၢႆးမွၼ်းၾႃႉၼႆႉ ပဵၼ်ၵူၼ်းၼမ်ႉလၼ်ႈ ၶႂ်ႈမႃးလဵပ်ႈႁဵၼ်း ဝဵင်းသီႇပေႃႉၼႆလႄႈ မႃးယွၼ်းလိုဝ်ႈတီႈႁိူၼ်း ပီႈၼွင်ႉၶဝ် ဢၼ်ယူႇပွၵ်ႉၵၢင်ဝဵင်းၼၼ်ႉ....

ႁိူၼ်းၼၢႆးမုၼ်ၼုမ်ႇၶဝ်ၼႆႉ ၵူၼ်းႁူမ်ႈႁိူၼ်းၼမ်တႄႉ သမ်ႉမေႃဢုပ်ႇမေႃလၢတ်ႈ မေႃႁပ်ႉတွၼ်ႈၶႅၵ်ႇလႄႈ ၸၢႆးမွၼ်းၾႃႉၼႆၵေႃႈ မိုတ်ႈၶဝ်ၼႃႇ....

ႁိူၼ်း လုင်းၸၢႆးသၢမ်ၶဝ် ဝၢၼ်ႈတႃႈပူၵ်ႇၵေႃႈ ဢမ်ႇပိူင်ႈသင်ၵၼ် ႁိူၼ်းသၢမ်လင်ယူႇၸွမ်းၵၼ် လႆႈဝႃႈပဵၼ်လွင်ႈလီတႄႉ ၵၢင်ၶမ်ႈၵိၼ်ၶဝ်ႈယဝ်ႉသေ မႃးၼင်ႈဢုပ်ႇၵၼ်ယူႇ ၼႃႈႁိူၼ်း.....

ပႃႈသူၺ်ႇ မႄႈမွၵ်ႇၵွၼ်ၶဝ်ၸင်ႇ ထၢမ်ယိင်းမူၺ်ၵွၼ်...

"လုၵ်ႈယိင်းမူၺ် မိူဝ်ႈၼႆႉၼွင်ႉဢွၼ်ႇ ဢွၼ်ၵႂႃႇလႄႇ ၸွင်ႇမီးတၢင်းသိူဝ်းၸႂ်ၼႄႇ"

"သိူဝ်းၸႂ်ၶႃႈဢေႃႈ မႄႈပႃႈ တီႈလွႆမွၵ်ႇၵုမ်ႈသုမ်ႇတႄႉ ပႆႇလႆႈၵႂႃႇၶႃႈ"

"ၼွင်ႉဢွၼ်ႇ ဢွၼ်ဢူၺ်းၵေႃႉ ပႆၶိုၼ်ႈတူၺ်းလေႃႇလုၵ်ႈ"

ၼွင်ႉဢွၼ်ႇၼႆႉ ပဵၼ်ၸိုဝ်ႈၵူၼ်းၼႂ်းႁိူၼ်းမွၵ်ႇၵွၼ်ၶဝ်ႁွင်ႉ.....

"ဢမ်ႇၶႃႈမႄႈ မႄႈႁဝ်းတူၺ်းတူဝ်ႁႃးၼႆႉ လႅပ်ႈပႆထိုင်ၼိူဝ်မၼ်းလႆႈယူႇၶႃႈႁႃႉ"

"ၼေႈလုၵ်ႈယိင်း မႄႈယၢမ်ႈငိၼ်းဝႃႈ သင်ဝႃႈပႆၶိုၼ်ႈလႄႈဢမ်ႇႁိူဝ်ႉၼႆ ၸၢင်ႈလႆႈထူပ်းၵေႃႉၵူႈဝႃႇ "

"ဢမ်ႇယဝ်ႉၶႃႈမႄႈ  ဢမ်ႇလူဝ်ႇၵေႃႉၵူႈ ၵေႃႉၵႃႈသင် ၶီႇလူတ်ႉၶိုၼ်ႈဢဝ်ၼၼ်ႉယဝ်ႉ"

"ၶႃႈထၢင်ႇတႄႉ မၼ်းလႆႈထူပ်းယဝ်ႉၶႃႈမႄႈပႃႈ ၶိၵ်းၶိၵ်း"

ယိင်းမူၺ်ၵွၼ် လၢတ်ႈမႃးၸိုင်ႉၼၼ် ပႃႈသူၺ်ႇၶႂ်ႈႁူႉလႄႈ ၸင်ႇၶိုၼ်းထၢမ်...

"ထူပ်းၸိုင်ႉႁိုဝ်လႃႇ လုၵ်ႈမူၺ် "

"မိူဝ်ႈ....ဢႆႉယႃႉ"

ယိင်းမူၺ်ၵွၼ်တိုၵ်ႉဢၢင်ႈလၢတ်ႈယူႇ မွၵ်ႇၵွၼ်ယၵ်းလိမ်ႇသႂ်ႇလႄႈ ဢမ်ႇတၼ်းလႆႈလၢတ်ႈ...

"ဢမ်ႇၸႂ်ႈသင်ၶႃႈမႄႈ ယႃႇပေယုမ်ႇၵူၼ်းလႆႈၸႂ်ၵိၼ် သွပ်ႉၼႆႉ"

"မႄႈၵေႃႈလႆႈၸႂ်သွပ်ႉဢိူဝ်ႈၼႃလုၵ်ႈ"

"ႁႄႈႁႄႈ ဝႃႈၼၼ်ၶႃႈႁႃႉမႄႈ "

မွၵ်ႇၵွၼ်ယၢႆးႁူဝ်မၼ်းသေ ယုမ်ႉငႅၼ်ႈပၢႆႈၶဝ်ၵႂႃႇပႅတ်ႈ...

#တွၼ်ႈသီႇ

ၼိူဝ်လွႆမွၵ်ႇၵုမ်ႇသုမ်ႇ မၢၼ်ႈၶဝ်ဝႃႈ (တဵင်ႇတွင်ႇ) လွႆသိမ်ႇ  ဢင်းၵိၼ်ၶဝ်တႄႉ ႁွင်ႉဝႃႈ (Sunset Hill) ပွင်ႇဝႃႈ လွႆဝၼ်းတူၵ်း ၵွပ်ႈပိူဝ်ႈပေႃးယူႇၼိူဝ်လွႆၼၼ်ႉသေ မုင်ႈတူၺ်းၵၢင်ဝၼ်းတူၵ်းၸိုင် ပဵၼ်ဢၼ်ႁၢင်ႈလီတႄႉတႄႉ ...

ပေႃးယူႇၼိူဝ်လွႆၼႆႉ တူၺ်းလူင်းၵႂႃႇၼႂ်းဝဵင်းသီႇပေႃႉ ၼႆၵေႃႈ တႄႇဢဝ်ၵၢင်ၼႂ် ၵၢင်ဝၼ်းၶိုၼ်ႈတေႃႇ ၵၢင်ဝၼ်းတူၵ်းၵႂႃႇၼၼ်ႉ တၢင်းႁၢင်ႈလီဢမ်ႇယွမ်းသေဢိတ်း....

ၸၢႆးမွၼ်းၾႃႉလႄႈ ၼွင်ႉၽူၺ်းတႄႉ ဢဝ်လူတ်ႉၶိူင်ႈ ဝႆႉတီႈတိၼ်လွႆသေ ပႆၶိုၼ်ႈ ပႆတူၵ်းၶိုင်ႈၵၢင်ယဝ်ႉ ယိင်းၽူၺ်းၵိုတ်းသေ ...

"ၼွင်ႉႁိူဝ်ႉတႄႉယဝ်ႉ ပီႈမွၼ်းၾႃႉ"

"ပီႈဝႃႈယူႇ ၼွင်ႉၶီႇလူတ်ႉၶိုၼ်ႈထႃႈၵေႃႈလႆႈၼႆ"

"ၼွင်ႉၶႂ်ႈၸၢမ်းပႆတူၺ်းၶႃႈလူး ဢမ်ႇထၢင်ႇဝႃႈတေႁိူဝ်ႉပေႃးတၢၼ်ႇၼႆႉ"

ၼွင်ႉၽူၺ်းၼႆႉ ပဵၼ်လုၵ်ႈၵူၼ်းမီးလူး သုတ်းႁဵၼ်းယဝ်ႉၵေႃႈ ပႂ်ႉလၢၼ်ႉၶမ်းၵူၺ်း ဢမ်ႇယၢမ်ႈႁဵတ်းၵၢၼ်ႁိူဝ်ႉသေပွၵ်ႈ တွၼ်ႈတႃႇၸၢႆးမွၼ်းၾႃႉတႄႉ ယၢမ်ႈယဝ်ႉ ...

"ၼွင်ႉ လိုဝ်ႈၵွၼ်ႇလႄႈ ပေႃးႁိူဝ်ႉၵေႃႈ"

ယိင်းၽူၺ်း ၼင်ႈလိုဝ်ႈႁိူဝ်ႉသေ လႆႈငိၼ်းသဵင်လူတ်ႉၶိူင်ႈ ၶိုၼ်ႈမႃးလႄႈ ၸင်ႇလုၵ်ႉၶိုၼ်း.....

"မူၺ် မူၺ်...ႁဝ်းထိင်းႁူဝ်လူတ်ႉၶိူင်ႈဢမ်ႇလႆႈယဝ်ႉ"

လူတ်ႉၶိူင်ႈ ဢဝ်ႁူဝ်မၼ်းၵႂႃႇတၢင်းဢၼ်ယိင်းၽူၺ်းၸုၵ်းယူႇၼၼ်ႉလႄႈ ၸၢႆးမွၼ်းၾႃႉ ၸင်ႇၵႂႃႇဝႅၼ်ၵွတ်ႇဢဝ်ယိင်းၽူၺ်းသေ လူမ်ႉၵႂႃႇ လူတ်ႉၶိူင်ႈလမ်းၼၼ်ႉၵေႃႈ တူၵ်းၵႂႃႇၼႂ်းႁွင်ႈဢွၼ်ႇ ႁိမ်းၽင်ႇႁိုၵ်း ၼၼ်ႉယဝ်ႉ ၵူၼ်းဢၼ်ၶီႇမႃးၼၼ်ႉၵေႃႈ လူမ်ႉယူႇၼိူဝ်လူတ်ႉၶိူင်ႈၼၼ်ႉ ...

ၸၢႆးမွၼ်းၾႃႉၸင်ႇဢဝ်ယိင်းၽူၺ်း လုၵ်ႉသေ ၵႂႃႇၸွႆႈပူၵ်းလူတ်ႉၶိူင်ႈ ... 

"ဢီႇသူမ်ႈ သူႁဵတ်းႁိုဝ်ႁေႃႈလႃႇၼႆႉ "

မွၵ်ႇၵွၼ်တႄႉ ဢမ်ႇၸၢင်ႈတွပ်ႇသင် လူတ်ႉၶိူင်ႈတဵင်ၺႃးတိၼ်မၼ်းလႄႈ ၼင်ႈသေႁႆႈႁႆႈၶၢင်းၶၢင်းယူႇ မူၺ်ၵွၼ်တႄႉ ၼင်ႈၽၢႆႇလင်လႄႈ ဢမ်ႇၵႃႈႁိုဝ် ၸင်ႇလုၵ်ႉၼင်ႈသေ ပတ်းၶူဝ်းမၼ်းယူႇ...

ၸၢႆးမွၼ်းၾႃႉပူၵ်းလူတ်ႉယဝ်ႉ ၸင်ႇၵႂႃႇၸူး မွၵ်ႇၵွၼ်သေ .... 

"သူၶႃႈ ၸွင်ႇၶတ်းတီႈလႂ်ႁိုဝ်"

ၸၢႆးမွၼ်းၾႃႉလႆႈႁၼ် ယိင်းမွၵ်ႇၵွၼ်ယိပ်းတိၼ်မၼ်းဝႆႉယူႇလႄႈ လိူတ်ႈၵေႃႈပေႃးလႆဢွၵ်ႇမႃး ၸင်ႇႁႂ်ႈၼွင်ႉၽူၺ်း ဢဝ်ပၼ်တဝ်ႈၼမ်ႉပၼ်သေ ....

"လႂ် မႃးတိၼ်သူလႄႈ ႁဝ်းတေသုၵ်ႈပၼ်ႁွႆးၸဵပ်း ၵူဝ်မႅင်းၶဝ်ႈ"

ၸၢႆးမွၼ်းၾႃႉ ၸင်ႇဢဝ်ၼမ်ႉသုၵ်ႈပၼ်သေ မိပ်ႇပၼ်ယူႇ ...

"ၼွင်ႉၽူၺ်း ပႂ်ႉတီႈၼႆႉၵမ်ႉ ပီႈတေၵႂႃႇဢဝ်လူတ်ႉၶိူင်ႈတီႈတႂ်ႈမႃး"

ၸၢႆးမွၼ်းၾႃႉ ဢဝ်လူတ်ႉၶိူင်ႈမႃးသေ ၸင်ႇႁႂ်ႈယိင်းၽူၺ်းတၢင်ႇ ယိင်းမူၺ်ၵွၼ်လူင်းၵႂႃႇမၼ်းၸၢႆးၶိုၼ်းမႃးဢဝ်ယိင်းမွၵ်ႇၵွၼ်ၶိုၼ်ႈလူတ်ႉ....

"ယိူၼ်ႉၸႂ်ဢိတ်းၼိုင်ႈၼႃသူ ၸွင်ႇတေၶိုၼ်ႈလႆႈ"

တူၺ်းယိင်းမွၵ်ႇၵွၼ် ဢမ်ႇလႅပ်ႈၸၢင်ႈၶိုၼ်ႈႁင်းၵူၺ်းလႄႈ မၼ်းၸၢႆးၸင်ႇႁွပ်ႇဢဝ်ယိင်းမွၵ်ႇၵွၼ် ၶိုၼ်ႈသေ ၶပ်းလူင်းလွႆၵႂႃႇလွႆးလွႆး...

ဝၢႆးသေ ၵွၼ်လူင်းႁူင်းယႃယဝ်ႉၵေႃႈ ၶဝ်ၶိုၼ်းၽၢတ်ႇၵၼ် ၵႂႃႇၵေႃႉတၢင်းယူႇ....

တွၼ်ႈသုတ်း

#ဝၢႆးသေပူၼ်ႉၵႂႃႇသၢမ်ပီ...

ႁွႆးၸဵပ်းတီႈတိၼ်ယိင်းမွၵ်ႇၵွၼ်ၼၼ်ႉ ႁၢႆၵႂႃႇယဝ်ႉသေတႃႉ ႁွႆးၸဵပ်းတီႈၸႂ်ၼၼ်ႉတႄႉ ပႆႇႁၢႆလႆႈ...

ဝၼ်းမိူဝ်ႈၼႆႉ ၸမ်ဝၼ်းဢွၵ်ႇဝႃႇထႅင်ႈယဝ်ႉလႄႈ ယိင်းမွၵ်ႇၵွၼ်ဢွၼ်ဢဝ်လုၵ်ႈဢွၼ်ႇၵေႃႉၼိုင်ႈသေ ၶိုၼ်ႈမႃးတီႈၼိူဝ်လွႆမွၵ်ႇၵုမ်ႈသုမ်ႇ လုၵ်ႈဢွၼ်ႇၵေႃႉၼၼ်ႉတႄႉ ယိပ်းတင်းလဵၼ်ႈ ဢွၼ်ႇသေ လႅၼ်ႈၵႂႃႇလႅၼ်ႈမႃး ယိင်းမွၵ်ႇၵွၼ်ၵေႃႉလဵဝ် ၼင်ႈတီႈတင်ႇသေ မိူၼ်ဝူၼ်ႉမၢင်လွင်ႈယူႇ...

"ၵွၼ်...သူတူၺ်းလူး သၢႆၵၢင်ဝၼ်း ဢၼ်ထွင်ႇၸူးသၢႆၼမ်ႉတူႈၼၼ်ႉ ႁၢင်ႈလီမိူၼ်သူတႄႉယဝ်ႉ"

"ပေႃးထိုင်ၶွပ်ႈထိုင်ဢွၵ်ႇဝႃႇၼႆ ႁဝ်းမႃးတူၺ်းၵၢင်ဝၼ်းတူၵ်းၸွမ်းၵၼ်ထႅင်ႈၼေႃႈပီႈ"

မိူဝ်ႈလဵဝ်ပေႃးၶွပ်ႈသွင်ပီယဝ်ႉ  ၶေႃႈၵႂၢမ်းၸိူဝ်းၼႆႉ မိူၼ်ႁၢင်ႈယိင်းမွၵ်ႇၵွၼ်တိုၵ်ႉငိၼ်းဝႆႉယူႇၼႂ်းႁူ ...

မိူဝ်ႈၼႆႉ ဢၼ်မႃးတူၺ်းၵၢင်ဝၼ်းတူၵ်းၸွမ်း ဢမ်ႇၸႂ်ႈၸၢႆးမွၼ်းၾႃႉယဝ်ႉ ၵူၺ်းပဵၼ် ၸၢႆးၵွၼ်ၾႃႉ ၵူၺ်းယဝ်ႉ...

ဝၢႆးသေ ၵွၼ်လူမ်ႉလူတ်ႉယဝ်ႉ မူၺ်ၵွၼ်ၵေႃႈ ဢမ်ႇလႆႈၶိုၼ်ႈလႄႇတူၺ်း ၵၢင်ဝၼ်းတူၵ်းလႄႈတၢင်းႁၢင်ႈလီသီႇပေႃႉ ၵူၺ်းၵႃႈ တင်ႈတႄႇဝၼ်းၼၼ်ႉမႃး ႁူဝ်ၸႂ်မွၵ်ႇၵွၼ် တွတ်ႇၸွမ်းၸၢႆးမွၼ်းၾႃႉမႃးယူႇ......

ၶေႃႈၵႂၢမ်းဢၼ်ၸၢႆးမွၼ်းၾႃႉယွၼ်းၶေႃႈတွပ်ႇမိူဝ်ႈၶမ်ႈပွႆးဢွၵ်ႇဝႃႇၼၼ်ႉၵေႃႈ တိုၵ်ႉတွင်းယူႇ ...

"မွၵ်ႇၵွၼ် ႁဝ်းပဵၼ်ၵေႃႉႁၵ်ႉၵၼ်မႃး ပဵၼ်ပီယဝ်ႉၼႃ သူပႆႇပၼ်ၶေႃႈတွပ်ႇပီႈ"

"ပီႈတေၶႂ်ႈလႆႈၶေႃႈတွပ်ႇၸိုင်ႉႁိုဝ်ထႅင်ႈ တူဝ်လႄႈႁူဝ်ၸႂ် ၵွၼ်ၵေႃႈပေႃးပၼ်ပီႈမူတ်းယဝ်ႉလူး"

"ပီႈႁၵ်ႉၵွၼ်ၼႃ ပေႃးဝၢႆးပွႆးပီႈတေမႃးထၢမ်ၵွၼ်"

"လူဝ်ႇမႃးထၢမ်တီႈပေႃႈမႄႈၵွၼ်ၵူၺ်းယဝ်ႉၶႃႈယူဝ်ႉပီႈ ပီႈမႃးတေႉတေႉၼႃ ယိင််းၵူဝ်ဢေႃႈပီႈ"

"ဢိုမ်း .. ပီႈတေမႃးယူႇယဝ်ႉ ယုမ်ႇပီႈလႄႈ"

ၸၢႆးမွၼ်းၾႃႉယုမ်ႉသေ ၶိုၼ်းၵွတ်ႇဢဝ်တူဝ်ဢွၼ်ႇ ယိင်းမွၵ်ႇၵွၼ်ဝႆႉၼႂ်းၵေႈဢူၵ်းမၼ်းယဝ်ႉ...

ဝၢႆးသေပဵၼ်ၵေႃႉႁၵ်ႉၵၼ်တင်း ၸၢႆးမွၼ်းၾႃႉယဝ်ႉ ဢၼ်လႅၵ်ႈလၢႆႈတႃႇၵွၼ်တႄႉ ယွၼ်ႉပိူဝ်ႈၶတ်းၸႂ်ႁဵတ်းၵၢၼ်လႄႈ တူဝ်ပီးဢွၼ်ႇၵွၼ်ၼၼ်ႉ ႁၢႆလၢႆၵႂႃႇသေ မိူဝ်ႈလဵဝ်ၶႅၼ်းတိူဝ်းႁၢင်ႈလီလိူဝ်ၵဝ်ႇယဝ်ႉ....

ဢၼ်ၸၢႆးမွၼ်းၾႃႉလႅၼ်ၵွၼ်မႃးယူႇၵူႈၶၢဝ်းၼၼ်ႉတႄႉ ...

လွင်ႈဢၼ်မၼ်းၸၢႆးပဵၼ် သိုၵ်းၶဵဝ်ဝႆႉၼၼ်ႉ မၼ်းဢမ်ႇလၢတ်ႈၼႄၵွၼ်....

မိူဝ်ႈဝၼ်းဢၼ်ၸၢႆးမွၼ်းၾႃႉဝႃႈ တေမႃးထၢမ်ၵွၼ်ၼၼ်ႉ ပေႃႈမႄႈၵွၼ်ၶဝ်လႄႈ ၵူၼ်းထဝ်ႈၶဝ် ပႂ်ႉဝႆႉ ၵၢင်ၼႂ်တေႃႇ ဝၢႆးဝၼ်းဢမ်ႇႁၼ်မႃး ထိုင်ၵၢင်ၶမ်ႈ မီးၽိုၼ်လိၵ်ႈ ဢၼ်ၼိုင်ႈႁွတ်ႈမႃးထိုင်ၵွၼ်....

ထိုင်/

ၵေႃႉႁၵ်ႉပီႈ မွၵ်ႇၵွၼ်~

ၽွင်းယၢမ်းၵွၼ်လႆႈႁပ်ႉႁၼ်လိၵ်ႈပီႈၼႆႉ ပီႈဢွၵ်ႇၶၢဝ်းတၢင်းၶိုၼ်ႈၼိူဝ်လွႆယဝ်ႉ ၵွပ်ႈပိူဝ်ႈၼႃႈၵၢၼ်ပုၼ်ႈၽွၼ်း တူၵ်းထိုင်မႃးယဝ်ႉလႄႈ ပီႈတေလႆႈၵႂႃႇသွၼ်ၵၢၼ် တေႁိုင်ၵႃႈႁိုင် ပီႈဢမ်ႇႁူႉလႆႈ ၵွပ်ႈၼၼ်ပီႈဢမ်ႇၸၢင်ႈမႃးထၢမ်ၵွၼ် သင်ဝႃႈပီႈသွၼ်ၵၢၼ်ယဝ်ႉ ပီႈတေပွၵ်ႈမႃးႁႃၵွၼ်ၶိုၼ်းၼႃ ပီႈယုမ်ႇဝႃႈ ၵွၼ်တေပႂ်ႉပီႈယူႇ ....

တီႈမႃး.... 

              မွၼ်းၾႃႉ 

တေႃႇထိုင်မိူဝ်ႈလဵဝ်ၵေႃႈ ၵွၼ်တိုၵ်ႉၵဵပ်းသိမ်းဝႆႉလိၵ်ႈၽိုၼ်ၼၼ်ႉသေ ဢၢၼ်ႇယူႇတီႈၼိူဝ်လွႆၼၼ်ႉ ...

ပဵၼ်ၽွင်းၶၢဝ်းၵၢင်ဝၼ်းတူၵ်းလႄႈ ၼမ်ႉတႃဢွၼ်ႇမၼ်းၼၢင်းၵေႃႈ  ယွႆႉလူင်းၸွမ်းလုၵ်ႈၵၢင်ဝၼ်းၼၼ်ႉယူႇ...

"ပီႈမွၼ်းဢူၺ် မိူဝ်ႈလဵဝ်သွင်ပီယဝ်ႉ လုၵ်ႈႁဝ်းၵေႃႈမွင်းပေႃႈမၼ်းယူႇ ႁဝ်းတေဢဝ်ႁၢင်ႈဢၼ်လႂ်ၼႄဝႃႈ ပဵၼ်ပေႃႈမၼ်း သင်ဝႃႈသူဢမ်ႇပွၵ်ႈမႃး"

ၶေႃႈၵႂၢမ်းၸိူဝ်းၼႆႉ လၢတ်ႈဢွၵ်ႇၼႂ်းၸႂ်ၵွၼ်ယူႇၵူႈၶၢဝ်းယၢမ်းယဝ်ႉ ...

မၼ်းၼၢင်းၸင်ႇႁွမ်းမိုဝ်းၸူး ၵွင််းမူးသေ ယွၼ်းသူးယူႇ ..

"ၸဝ်ႈၽီပႂ်ႉ လွႆလႄႈၽီပႂ်ႉဝၢၼ်ႈမိူင်းႁဝ်းၶႃႈ ဝႆႉမိူၼ်ၶႃႈပဵၼ်လုၵ်ႈယိင်းသူၸဝ်ႈသေ ၸွႆႈမွၵ်ႇပၼ် ႁႂ်ႈၵေႃႉဢၼ် ၽၢတ်ႇၵႂႃႇၼၼ်ႉ လွတ်ႈၽေးသေ ပွၵ်ႈမႃးႁႃၶႃႈလႄႈ လုၵ်ႈသေၵမ်း"  

ဝၢႆးသေမၼ်းၼၢင်းဝႆႈယဝ်ႉ ဝၢႆႇတူၺ်းလုၵ်ႈမၼ်း ဢမ်ႇႁၼ်ယဝ်ႉလႄႈ ၸင်ႇပၼ်ႇႁွင်ႉႁႃလုၵ်ႈမၼ်းယူႇ ...

မၼ်းၼၢင်းလႆႈႁၼ်ၵူၼ်းၸၢႆးၼူတ်ႇယၢဝ်းၵေႃႉၼိုင်ႈ လဵၼ်ႈၵေႃႉလုၵ်ႈမၼ်းယူႇလႄႈ ၸင်ႇၵႂႃႇၸၼ်မိုဝ်းလုၵ်ႈၸၢႆးမၼ်းသေ...

"မႃးလုၵ်ႈ ႁဝ်းပွၵ်ႈမိူဝ်း ၸွမ်းႁိမ်းႁွမ်းၼႆႉ ၸူၼ်လိူင်ႇၼႃႇ"

ၵူၼ်းၸၢႆးၵေႃႉၼၼ်ႉ ယၵ်ႉတူၺ်းမၼ်းၼၢင််းလႄႈ လုၵ်ႈဢွၼ်ႇၵေႃႉၼၼ်ႉသေ ...

"မွၵ်ႇၵွၼ် ၼႆႉလုၵ်ႈသူႁ"

မၼ်းၼၢင်းၸင်ႇတူၺ်းၵူၼ်းၵေႃႉၼၼ်ႉလီလီသေ ...

"ပီႈမွၼ်းၾႃႉ"

"ၸႂ်ႈယဝ်ႉ ပဵၼ်ပီႈ"

ယိင်းမွၵ်ႇၵွၼ် လႅၼ်ႈၵွတ်ႇသႂ်ႇၸၢႆးၾႃႉသေ ဢိုတ်ႇႁႆႈယူႇ လုၵ်ႈၸၢႆးဢွၼ်ႇမၼ်းၵေႃႈ လႆႈႁၼ်မႄႈမၼ်းႁႆႈလႄႈ ႁွင်ႉႁႆႈၸွမ်းယဝ်ႉ..

ၸၢႆးမွၼ်းၾႃႉၸင်ႇလၢတ်ႈ....

"လုၵ်ႈသူလီႁၵ်ႉတႄႉယဝ်ႉ မီးလႂ်လႃႇေပႃႈမၼ်းဢမ်ႇမႃးၸွမ်းႁႃႉ ပေႃးမၼ်းမႃးႁၼ်ၵမ်ႉတေထၢင်ႇၽိတ်းယဝ်ႉ"

ယိင်းမွၵ်ႇၵွၼ် ၸင်ႇႁွပ်ႇဢဝ်လုၵ်ႈဢွၼ်ႇမၼ်းသေ ...

"ၼႆႉပဵၼ်လုၵ်ႈသူလႄႈႁဝ်းၵူၺ်း ပီႈမွၼ်းၾႃႉ"

ၼမ်ႉတႃဢွၼ်ႇၸၢႆးမွၼ်းၾႃႉၵေႃႈ ထၢင်ႇတႄႉၽၢႆမၼ်းတေၵူၼ်ႇယဝ်ႉႁိုဝ် လႆဢွၵ်ႇမႃး သမ်ႉပေႃးဢမ်ႇထၢတ်ႇ ၸွင်ႇႁွပ်ႇဢဝ်လုၵ်ႈမၼ်းၸၢႆးေသ....

"လုၵ်ႈ...လုၵ်ႈပေႃႈၼႆႉ ပေႃးပဵၼ်မၢဝ်ႇယဝ်ႉလူးၼႆႉ "

မၼ်းၸၢႆးၸႇပ်ႇၼူမ်သႂ်ႇ လုၵ်ႈၸၢႆးဢွၼ်ႇမၼ်းသေ ၸၢႆးၵွၼ်ၾႃႉဢွၼ်ႇဢမ်ႇယၢမ်ႈႁၼ်လႄႈ ၵူဝ်သေ ႁႆႈယူႇ ယိင်းမွၵ်ႇၵွၼ် ၸင်ႇႁွပ်ႇဢဝ်သေ...

"လုၵ်ႈၸၢႆး ၼႆႉပဵၼ်ပႃးပႃးဢိူဝ်ႈလုၵ်ႈ "

"ပႃပႃး"

လႆႈငိၼ်းသဵင်လုၵ်ႈၸၢႆးဢွၼ်ႇမၼ်း လႄႈ ၼင်ႇႁၢင်ႈပေႃးယွၼ်ႈထိုင်မၢၵ်ႇႁူဝ်ၸႂ်ၵႂႃႇယဝ်ႉ...

"လုၵ်ႈဢူၺ်....တေႇဢဝ်ၼႆႉၵႂႃႇပႃးပႃးတေဢမ်ႇၽၢတ်ႇယၢၼ်လုၵ်ႈလႄႈမႄႈမႄႈသူၵႂႃႇတၢင်းလႂ်ထႅင်ႈယဝ်ႉၼႃ ႁဝ်းႁၵ်ႉသူၼႃၵွၼ်"

ၶဝ်သၢမ်ၵေႃႉပေႃႈမႄႈလုၵ်ႈ ၵွတ်ႇၵၼ်သေ လုၵ်ႈဝၼ်းၵေႃႈ ၸူမ်ႁၢႆၵႂႃႇလွႆးလွႆးယဝ်ႉ ၶၢဝ်းယၢမ်းဢၼ်မွၵ်ႇၵွၼ် ဝႆႉသႅတ်ႉၸႃႇသေ မုင်ႈမွင်းၸၢႆးမွၼ်းၾႃႉ ၼၼ်ႉၵေႃႈထိုင်မႃးယဝ်ႉ တီႈတေႉမၼ်း သင်ဢမ်ႇၸႂ်ႈမွၵ်ႇၵွၼ် သေ ပဵၼ်တၢင်ႇၵေႃႉၼႆ ၸွင်ႇတေၶၢမ်ႇပႃးတွင်ႉ ဢၼ်ပေႃႈမၼ်းပၢႆႈၵႂႃႇသေ ၵိူတ်ႇပၼ်လႆႈႁိုဝ်ၼႆ ဢမ်ႇလၢမ်းႁူႉလႆႈ...

ပဵၼ်ၸိုင်ႉႁိုဝ်ၵေႃႈ ၶႃႈႁဝ်းၽူႈတႅမ်ႈလိၵ်ႈတႄႉ ၸွၼ်ၸူမ်းၸွမ်းဢၼ် ယိင်းမွၵ်ႇၵွၼ် ဝႆႉသႅတ်ႉၸႃႇလႄႈ ဢၼ်ၸၢႆးမွၼ်းၾႃႉ မႃးၸွမ်းၵႂႃႇၶိၼ်းမၼ်းၼၼ်ႉတႄႉယူႇ...

ႁႂ်ႈၽူႈလူလိၵ်ႈႁဝ်းၶဝ် လႆႈထူပ်းၵူၼ်းမီးသႅတ်ႉၸႃႇ မႅတ်ႉတႃႇမၼ်ႈၵိုမ်းသေၵမ်း..

ၼပ်ႉယမ်သေ 

ၼုမ်ႇၸိုၼ်ႈၾႃႉ.... 1.10.2017 23:30

#ၸွမ်းမႃးႄလႈေပႃးေပႉၸႂ်
*************************************

တွၼ်ႈၼိုင်ႈ

ႁူဝ်ၶမ်ႈၽွင်းသၢႆၵၢင်ဝၼ်းၸမ်ပွၵ်ႈၶိုၼ်းေသ သၢႆလိူၼ်ေတပုတ်ႈၶိုၼ်ေးၼၼ်ႉ ၸၢႆးမၢဝ်ႇေၵႃႉၼုိင်ႈ ဢၼ်ၼုင်ႈၶူဝ်းလၢႆးဝႆႉၼၼ်ႉ မႃးၼင်ႈယူႇႁိမ်းႁူဝ်ဝဵင်းလၢင်းၶိူဝ်းၼၼ်ႉေသမုင်ႈယဵမ်ႈတူၺ်း တၢင်းႁၢင်ႈလီထုင်ႉလၢင်းၶိူဝ်းယူႇ သၢဝ်ေၵႃႉၼိုင်ႈဢၼ်ၼုင်ႈတင်းသိူဝ်ႈၶူဝ်းတႆးေသပႆၶိုၼ်ႈလွႆမႃးၸူး ......

ဝဵင်းလၢင်းၶိူဝ်းၼႆႉ ေပႃးယူႇတီႈႁူဝ်ဝဵင်းေသယဵမ်ႈမုင်ႈတူၺ်းၸိုင် ပဵၼ်ဢၼ်ႁၢင်ႈလီၵတ်းယဵၼ်ၸႂ်ၼႃႇ သမ်ႉမီးတီႈၼင်ႈတႃႇယဵမ်ႈႄလႈ ပဵၼ်တီႈဢၼ်ၵူၼ်းဢွၵ်ႇၶၢဝ်းတၢင်းၶဝ်မႃးလိုဝ်ႈေသ ထႆႇၶႅပ်းႁၢင်ႈၼၼ်ႉယဝ်ႉ .....

ၸၢႆးမၢဝ်ႇေၵႃႉၼၼ်ႉ ၸင်ႇယၵ်ႉတူၺ်းတၢင်းယုမ်ႉႁၢင်ႈလီပႃးဢၢႆဢွၼ်ႇေၵႃႉႁၵ်ႉမၼ်းေသ ႄတႇလၢတ်ႈၵႂၢမ်းဢွၵ်ႇမႃး........

"မွၼ်း မိူဝ်ႈၽုၵ်ႈပီႈေတၵႂႃႇၶိုၼ်းယဝ်ႉ"

ၵႂၢမ်းဢွၼ်ႇေၶႃႈၼႆႉ လၵ်ႉႁူႉယဝ်ႉဝႃႈေတလႆႈငိၼ်းယူႇဝၼ်းၼိုင်ႈ ၵူၺ်းၵႃႈ ဢမ်ႇမွင်းလႆႈထွမ်ႇေသတႃႇ ဝၼ်းမိူဝ်ႈၼႆႉ မွၼ်းလႆႈထွမ်ႇတီႈသူပ်း ႁၢၼ်ၼုမ်ႇလၢတ်ႈမႃးၸိုင်ႉၼၼ် တၢင်းယုမ်ႉတၢင်းသိူဝ်းမိူဝ်ႈၵႆႈၼၼ်ႇ သမ်ႉေပႃးမိူၼ်ၼင်ႇ တွင်ႉၾႃႉလူင်ၼႆငိုပ်းတၼ်ၵႂႃႇၵမ်းလဵဝ်ၼၼ်ႉယဝ်ႉ ဢမ်ႇၸၢင်ႈႁဵတ်းၸိုင်ႉႁိုဝ်ႄလႈ မွၼ်းၵႃႈေတလႆႈပၼ်ႁႅင်းၸႂ်ေၵႃႉေတဢွၵ်ႇတၢင်းၼၼ်ႉယူႇ..

"ေဢႃႈၶႃႈ ပီႈႁၢၼ်ၼုမ်ႇ ထႅင်ႈသွင်ပီ....."

မွၼ်းဢမ်ႇၸၢင်ႈသိုပ်ႇလၢတ်ႈလႆႈထႅင်ႈ ယွၼ်ႉပိူဝ်ႈၼမ်ႉၼွင်းပၢင်ႇလၢႆႇလူင်ဢၼ်လႆလူင်းမႃးၼၼ်ႉ ယိုင်ႈဝႆႉၼႂ်းၸႂ်ႄလႈ ၸင်ႇဝၢႆႇပႅတ်ႈတၢင်းၼိုင်ႈေသသိုပ်ႇလၢတ်ႈယူႇ...

"ေပႃးထႅင်ႈသွင်ပီ ပီႈေပႃးေတလႆႈပွၵ်ႈမႃးယဝ်ႉ ပဵၼ်ႁိုဝ်ေၵႃႈ မွၼ်းေတပႂ်ႉပီႈၼႃ"

ၸၢႆးႁၢၼ်ၼုမ်ႇ လႆႈငိၼ်းၸိုင်ႉၼၼ် ၶႅၼ်းထႅင်ႈႁႅင်းဢမ်ႇၶႂ်ႈၽၢတ်ႇေၵႃႉႁၵ်ႉဢွၼ်ႇ ဢၼ်ၸုၵ်းယူႇၽၢႆႇၼႃႈၼၼ်ႉယဝ်ႉ..

"သင်ဝႃႈပီႈၵႂႃႇယဝ်ႉ ဢသၢၵ်ႈပီႈေၵႃႈ ဝႆႉပၼ်မွၼ်းမူတ်းယဝ်ႉ ပီႈၵႂႃႇေၵႃႈေတပွၵ်ႈၶိုၼ်းမႃးၸူးမွၼ်းယူႇၼႃ

"ေဢႃႈၶႃႈ ပီႈဢူၺ်ပီႈၵႂႃႇေၵႃႈႁႂ်ႈလွတ်ႈေၽးေသၵမ်း"

ၸၢႆးမၢဝ်ႇေၵႃႉဢၼ်ၼုင်ႈတင်းၶူဝ်းလၢႆးႄလႈယိင်းသၢဝ်ၸင်ႇၼင်ႈတင်ႇေသယဵၼ်ယၵ်ႉတူၺ်းၵၢင်ဝၼ်းတူၵ်းယူႇၼၼ်ႉ ၽႂ်ေၵႃႈဢမ်ႇၸၢင်ႈလၢတ်ႈသင် တီႈေတႉမၼ်းေၶႃႈၵႂၢမ်း ဢၼ်ၶႂ်ႈလၢတ်ႈၼၼ်ႉ မီးတဵမ်ႁူဝ်ၸႂ်ယူႇေသတႃႉေၵႃႈ လၢတ်ႈဢမ်ႇဢွၵ်ႇပဵၼ်ေၶႃႈၵႂၢမ်းမႃး ...
ၸၢႆးႁၢၼ်ၼုမ်ႇၸင်ႇလၢတ်ႈ

"မွၼ်းဢူၺ်...ၽွင်းႁဝ်းယူႇၵႆၵၼ်ၼႆႉ မွၼ်းယႃႇေပပႅတ်ႈၼႃႈၵၢၼ်ဢၼ်မွၼ်းႁဵတ်းယူႇၼၼ်ႉၼႃ ပိၵ်ႉသမ်ႉဝႃႈႁဝ်း ဢမ်ႇၸႂ်ႈၵူၼ်းမိူင်းလဵဝ်ၵၼ်ေၵႃႈဝၼ်းၼိုင်ႈမႃးပီႈယုမ်ႇဝႃးႁဝ်းေတလႆႈၶွႆႈၵၼ်ယူႇ"

"လႆႈေဢႃႈပီႈ တွၼ်ႈတႃႇတၢင်းႁၵ်ႉႄတႉ မွၼ်းေတလုမ်းလႃးဝႆႉပုၼ်ႈတႃႇပီႈၵူၺ်း"

ႁၢၼ်ၼုမ်ႇၸင်ႇပူတ်းဢဝ်ဢၼ်ႁွႆႈေၶႃးမၼ်းဝႆႉ ဢၼ်ဢဝ်ငႃးၸၢင်ႉႁဵတ်းဝႆႉၼၼ်ႉ ႁွႆႈပၼ်မွၼ်းယဝ်ႉေသ ၶိုၼ်းထၢမ်-

"မွၼ်း...ၶူဝ်းၶွင်ဢၼ်ၼႆႉ ဢမ်ႇမီးၵႃႈၶၼ်သင်ၼင်ႇၵဝ်ႇ ၵူၺ်းၵႃႈႁႂ်ႈပဵၼ်မၢႆတွင်းေသၵဵပ်းသိမ်းဝႆႉၼႃ မွၼ်းလူးၸွင်ႇေတမီးၶူဝ်းတွၼ်ႈသင်ပုၼ်ႈတႃႇပီႈ"

မၼ်းၼၢင်းေၵႃႈ ဢမ်ႇဝူၼ်ႉသင်လႆႈႄလႈ ၸင်ႇလိတ်ႈဢဝ် ၽႅၼ်ႇၶၢဝ်ဢွၼ်ႇဢၼ်မတ်ႉၶူၼ်ႁူဝ်မၼ်းၼၢင်းၼၼ်ႉ မႃးၸုပ်ႇႁႂ်ႈသီသူပ်းဢွၼ်ႇမၼ်းၼၢင်းၸပ်းဝႆႉေသ တွၼ်ႈပၼ်ၸၢႆးႁၢၼ်ၼုမ်ႇယဝ်ႉ ....

ၽွင်းၼင်ႇၼၼ် ၵၢင်ဝၼ်းေၵႃႈလပ်ႉလွႆလူင်ၵႂႃႇပုၼ်ႈတႃႇသၢႆလိူၼ်ၶိုၼ်းမႃးပုတ်ႈႄလႈ ႄၵႈၵၢင်ၸၢႆးႁၢၼ်ၼုမ်ႇႄလႈယိင်းမွၼ်းလိူၼ် မိုတ်ႈၵၼ်ပႆႇႁိုင်ထိုင်ၶၢဝ်းေတၽၢတ်ႇၵၼ်ၸိုင်ႉၼႆ ၽႂ်ေၵႃႈေတႃႈဢမ်ႇသူိဝ်းလႆႈ ယွၼ်ႉပဵၼ်ၼႃႈၵၢၼ်ၼႆ မွၼ်းေၵႃႈေတႃႈဢမ်ႇၸၢင်ႈႁၢမ်ႈသီး သင်ဝႃႈမီးပၢၼ်ဢွၼ်ၵၼ်ယူႇၸိုင် ယုမ်ႇဝႃႈေတထိုင်ၶိုၼ်းဝၼ်းၶွႆႈၵၼ်ၼႆ လၵ်ႉမွင်းၼႂ်းၸႂ်ၽႂ်မၼ်းေသၽၢတ်ႇၵၼ်ၵႂႃႇယဝ်ႉ....

#ပူၼ်ႉမႃးသွင်ပီ
ပဵၼ်ၽွင်းပၢင်တိုၵ်းႄလႈ ၸၢႆးႁၢၼ်ၼုမ်ႇဢၼ်ႁၢပ်ႇပုၼ်ႈၽွၼ်းေၵႃႉႁၢၼ်ေသ ဢိၵ်ႇလူၺ်ႈတပ်ႉၵွင်လၢႆလၢႆၸုမ်း မႃးတၢင်းပွတ်းႁွင်ႇၼၼ်ႉ ေပႃးႁိုင်ယဝ်ႉ ဢမ်ႇလႆႈငိၼ်းၶၢဝ်ႇေၵႃႉႁၵ်ႉဢွၼ်ႇမၼ်းၸၢႆးဢၼ်ယူႇပွတ်းၸၢၼ်းၼၼ်ႉ
ဢမ်ႇၼၼ်ေၵႃႈ ၵုမ်ႇဝူၼ်ႉၸွမ်းၵၢၼ်သိုၵ်းႄလႈ ဢမ်ႇတၼ်းၶုၵ်းၸႂ်လႆႈႁိုဝ်ၼႆ လိူဝ်ေသမၼ်းၸၢႆးၽႂ်ေတဢမ်ႇႁူႉထိုင် .....

ၽၢႆႇယိင်းမွၼ်းလိူၼ်ေၵႃႈဢဝ်တၢင်းၼမ်ႉၸႂ်ႁၵ်ႉၸိူဝ်ႉၶိူဝ်းေသ ႁဵတ်းေမႃသွၼ်မႃးေၵႃႈ ေတႃႈဢမ်ႇယုပ်ႈယွမ်းသင် ၵူၺ်းၵႃႈ ပၢၼ်ပဵၼ်မွၵ်ႇႁၢင်ႈလီၼႆႉ မီးၼႂ်းသူၼ်ၸဝ်ႈမၼ်းယူႇေသတႃႉေၵႃႈ ေပႃးပိူၼ်ႈႁၼ်ၼႆ ပိူၼ်ႈတိုၼ်းၶႂ်ႈပိတ်းယူႇ ယိင်းမွၼ်းလိူၼ်ဢမ်ႇႁတ်းဝႆႉေၵႃႉႁၵ်ႉမႃးမီးသွင်ပီၸမ်ယဝ်ႉ မွင်းထွမ်ႇၶၢဝ်ႇေၵႃႉႁၵ်ႉေၵႃႈ ဢမ်ႇထိုင် ႁိုင်မႃးယဝ်ႉ လိူဝ်ၼၼ်ႉေၵႃႈ သမ်ႉမီးေမႃသွၼ်ၸၢႆးလၵ်ႉၶဝ်ႈၸႂ်ၼိူဝ်မၼ်းၼၢင်းၼၼ်ႉေၵႃႈ မၼ်းၼၢင်းလွမ်ၼၵ်းၸႂ်ယူႇ ၵႂၢမ်းပူိၼ်ႈဝႃႈ ၼမ်ႉတီႈၵႆဢမ်ႇယႃႁႂ်ႈေၶႃးယမ်း ဢမ်ႇမိူၼ်ၼင်ႇၼမ်ႉေမႃႇသၢင်ႈႁိၼ်တမ်းၼႂ်းဝၢၼ်ႈၼႂ်းသူၼ် ၼႆႄလႈ မၢင်ပွၵ်ႈမႃးေၵႃႈ လွမ်လၵ်ႉၵဵပ်းသိမ်းဝႆႉ တၢင်းယုမ်ႉဢွၼ်ႇ ဢၼ်ေမႃသွၼ် ၸၢႆးၶိူဝ်းႁၵ်ႉသူင်ႇပၼ်ၼၼ်ႉယူႇ ......

ၶၢဝ်းယၢမ်းၶဝ်ႈႁၢပ်ႇၵၢၼ်သိုၵ်း ၸၢႆးႁၢၼ်ၼုမ်ႇႄတႉ တဵမ်ေပႃးလိူဝ်ယဝ်ႉ ယွၼ်ႉပၢင်တိုၵ်းေၵႃႈလၢႆလၢႆတီႈ ဢၼ်ပဵၼ်ယူႇၼႂ်းမိူင်းတႆးႄလႈ လွမ်ၶုၵ်းၸႂ်လႆႈ ေၶႃႈၵႂၢမ်း ေၵႃႉႁၵ်ႉဢွၼ်ႇ ယိင်းမွၼ်းလိူၼ်လၢတ်ႈၼၼ်ႉယူႇပဵၼ်ၵမ်း ေပႃးႁိူဝ်ႉမႃး ယိပ်းဢဝ်ၽႅၼ်ႇၶၢဝ်ၶၢဝ်ဢွၼ်ႇ ဢၼ်ပႃးႁွႆးသီႇသူပ်းၼၼ်ႉေသ သုတ်ႇၼူမ်ဢဝ်ႁႂ်ႈႁိူဝ်ႉႁၢႆယူႇ ေပႃးၶၢဝ်းတၼ်းေၵႃႈ တႅမ်ႈဝွၵ်းဝႆႉ တွၼ်ႈတႃႇမွၼ်းယူႇ လွင်ႈဢၼ်မၼ်းၸၢႆးၶႂ်ႈပဵၼ် ဢၼ်ယိူင်းဢၢၼ်းဝႆႉ ပုၼ်ႈတႃႇၼႂ်းၸၢတ်ႈပၢၼ်ၶဝ်သွင်ေၵႃႉ ၼၼ်ႉေၵႃႈဝူၼ်ႉဝူၼ်ႉေသ တႅမ်ႈပဵၼ်ဝွၵ်းဝႆႉတိၵ်းတိၵ်းယဝ်ႉ....

ဝၢႆးေသပၢင်တိုၵ်းပၢင်လူင်ၼမ်ႉတူႈယဝ်ႉၵႂႃႇ မၼ်းၸၢႆးၸင်ႇယွၼ်းၶႂၢင်ႉတႃႇေတ
ပွၵ်ႈမႃးၸူးႁိူၼ်းေပႃႈႄမႈၶဝ် တီႈဝၢၼ်ႈပၢင်မၢၵ်ႇမိုဝ်းေၸႈဝဵင်း ၵျွၵ်းႄမး ၼၼ်ႉ ၸင်ႇၸူဝ်းဢဝ်တင်းတပ်ႉသိုၵ်းေသဢွၵ်ႇၶၢဝ်းတၢင်းမႃး မိူဝ်ႈထိုင်ႁိမ်းဝၢၼ်ႈ သိုၵ်းလွႆသမ်ႉပႂ်ႉတိုၵ်းႄလႈ ပဵၼ်ပၢင်တိုၵ်းၵၼ် ၽိူဝ်ႇထိုင်ၵၢင်ၼႂ်မႃး လႆႈငိၼ်းၶၢဝ်ႇဝႃႈ သိုၵ်းလွႆဢဝ်ၵူၼ်းမိူင်းတၢႆၼႆ ဢၼ်မၼ်းၸၢႆးဢမ်ႇထၢင်ႇဢမ်ႇထိူမ်ၼၼ်ႉ သမ်ႉပႃးေပႃႈႄမႈမၼ်းၸၢႆးႄလႈ တၢင်းယိူင်းဢၢၼ်းဢၼ်ဢၢင်ႈမႃး လၢတ်ႈႄၼလွင်ႈေၵႃႉႁၵ်ႉမၼ်းၸၢႆး တီႈေပႃႈႄမႈမၼ်းၼၼ်ႉေၵႃႈပဵၼ်ဢၼ်ၵိုတ်းၶမ်ဝႆႉယူႇၼႂ်းၸႂ်မၼ်းၸၢႆးၵူၺ်းယဝ်ႉ ဢမ်ႇသုမ်းသိုၵ်းေသတႃႉ လႆႈႁူႉၸိုင်ႉၼၼ် မိူၼ်ၼင်ႇတိၼ်ႁၵ်းမိုဝ်းႁၢၵ်းေသ ဢူၼ်ႈဢွၼ်ႇၵႂႃႇယဝ်ႉ ..... 
ယွၼ်ႉပိူဝ်ႈပဵၼ်ေၵႃႉသိုၵ်းႄလႈ တႃႇေတတိုၵ်းၼၼ်ႉ ဢမ်ႇယွမ်းၸႂ်ဢူၼ်ႈ တိုၵ်ႉမီးေၵႃႉႁၵ်ႉယူႇၼႆေသ ၸင်ႇဢဝ်ၶိူင်ႈၶူဝ်းမၼ်းၸၢႆးဢၢပ်ႈပၼ်ၼႂ်းၸုမ်းေသ ၶီႇၸွမ်းၵႃးၵႂႃႇပွတ်းၸၢၼ်းယဝ်ႉ.....

ၶၢဝ်းတၢင်းဢၼ်မၼ်းၸၢႆးၽၢတ်ႇယၢၼ်လၢင်းၶိူဝ်းၵႂႃႇၼၼ်ႉ ေပႃးမီးသွင်ပီပၢႆယဝ်ႉႄလႈ ၵူႈၸိူဝ်ႉၵူႈလွင်ႈလႅၵ်ႈလၢႆႈၵႂႃႇမူတ်း မၼ်းၸၢႆးေပႃးဢမ်ႇၶႂ်ႈတွင်းတၢင်းမိူဝ်းႁိူၼ်း ေၵႃႉႁၵ်ႉဢွၼ်ႇမၼ်းၸၢႆးယဝ်ႉ မၼ်းၸၢႆးၸင်ႇမိူဝ်းလိုဝ်ႈႁိူဝ်ႉတီႈႁိူၼ်းတႆးေၵႃႉမၼ်းၸၢႆးဢၼ်ယူႇဝၢၼ်ႈပုင်းထုၼ်ၼၼ်ႉယဝ်ႉ ....

ထိုင်ၵၢင်ၶမ်ႈမႃး ၸွမ်းၼင်ႇယၢမ်ႈႁဵတ်းေၵႃႉၵၼ် ၼင်ႈၵိၼ်တၢင်းၵိၼ်ေသဢုပ်ႇၵၼ်လွင်ႈၼုိင်ႈယဝ်ႉလွင်ႈၼိုင်ႈယူႇ မၼ်းၸၢႆးၸင်ႇၸၢပ်ႈၵႂၢမ်းထၢမ် လွင်ႈေၵႃႉႁၵ်ႉမၼ်းၸၢႆးယူႇ ဢူၺ်းေၵႃႉၸင်ႇထၢမ်....
"ေမႃသွၼ်ယိင်းမွၼ်းလိူၼ် ဢၼ်ယူႇဝၢၼ်ႈလူင် ၼၼ်ႉႁႃႉ"

မၼ်းၸၢႆးၸင်ႇဝႃႈ "ၸႂ်ႈယဝ်ႉ" ၼႆေသ ဢဝ်ၼႃႈဢူၺ်းေၵႃႉမၼ်း ငဝ်ၵႂႃႇယဝ်ႉ ဢူၺ်းေၵႃႉမၼ်းၸင်ႇသိုပ်ႇဝႃႈ 
"ေပႃးပဵၼ်ေၵႃႉၼၼ်ႉေတႉႄတႉ ၸင်ႇႁႃႄတႇၼႃႈႁိူၼ်းၵႂႃႇမိူဝ်ႈပူၼ်ႉမႃး သွင်လိူၼ်ပၢႆၼႆႉၵူၺ်း" ၼႆယဝ်ႉ ၽိူဝ်ႇမၼ်းၸၢႆးလႆႈငိၼ်းၼင်ႇၼၼ် ပဵၼ်ဢၼ်ဢိုၵ်ႉၼိုၵ်ႉၸႂ်ၼႃႇ တႃႇေတလၢတ်ႈၵႂၢမ်းေၵႃႈ ဢမ်ႇမီးႁႅင်းဢႃႈသူပ်းလႆႈယဝ်ႉ ၼမ်ႉတႃဢွၼ်ႇမၼ်းၸၢႆးေၵႃႈ ေလႃႈလူင်းမႃး ေပႃးၼင်ႇၼမ်ႉၽႃယၢတ်ႇယဝ်ႉ...
ဢူၺ်းေၵႃႉမၼ်းၸၢႆး ၸင်ႇၶိုၼ်းပၼ်ႁႅင်း "ဢႃ......ေတၸႂ်ႈဢမ်ႇၸႂ်ႈယင်းဢမ်ႇႁူႉ မိူဝ်ႈၽုၵ်ႈႁႃးေတဢွၼ်မိူဝ်းတီႈႁိူၼ်းၶဝ်တူၺ်းလႆ....

ထိုင်မႃးၵၢင်ၶမ်ႈထႅင်ႈၶမ်ႈၼိုင်ႈ ၸၢႆးႁၢၼ်ၼုမ်ႇၸင်ႇ ထူၵ်းဢဝ်ပပ်ႉဢၼ်ယိင်းမွၼ်းလိူၼ်တႅမ်ႈပၼ်ဝႆႉတီႈႁိူၼ်းၼၼ်ႉဢွၵ်ႇမႃးယူႇ ၽွင်းၼၼ်ႉ ၼႂ်းတၢင်းဝူၼ်ႉႄလႈၼႂ်းႁူမၼ်းၸၢႆး ၵူၺ်းၵိုတ်းေၶႃႈၵႂၢမ်းဢၼ်ဝႃႈ *မၼ်းၼၢင်းပႂ်ႉၸၢႆးႁိုင်မႃးသွင်ပီပၢႆယဝ်ႉ ဢမ်ႇငိၼ်းၶၢဝ်ႇႄလႈ လႆႈႄတႇၼႃႈႁိူၼ်းၵႂႃႇ* ၼႆၼၼ်ႉယူႇ.... တႃႇေတၽိုၼ်ႉတူၺ်း ၼႂ်းပပ်ႉၼၼ်ႉေၵႃႈ ဢမ်ႇမီးႁႅင်းယဝ်ႉ ၼႂ်းပပ်ႉၼၼ်ႉ သမ်ႉမီးမၢင်ေၸႈၺၢပ်ႈၸပ်းဝႆႉႄလႈ ၸင်ႇလိတ်ႈတူၺ်း...

ထိုင်/
      ပီႈႁၢၼ်ၼုမ်ႇ ေၵႃႉႁၢၼ် ႁၢပ်ႇၵၢၼ်ဝၢၼ်ႈမိူင်းေသ---
ၽွင်းပီႈလႆႈႁပ်ႉႁၼ်လိၵ်ႈၽိုၼ်ၼႆႉယဝ်ႉ ႁႂ်ႈပီႈမီးတၢင်းၶုၵ်းၸႂ်လႆႈယိင်းေသၵမ်း ယိင်းႄတႉၶုၵ်းၸႂ်လႆႈပီႈယူႇေၵႃႈ လိူဝ်ေသဢဝ်ၼမ်ႉတႃယႃၸႂ်ယဝ်ႉ ဢမ်ႇမီးသင်ထႅင်ႈႄလႈ မွင်းပႂ်ႉပီႈေပႃးတဵမ်သွင်ပီယဝ်ႉ ပီႈဢမ်ႇမႃး ေၵႃႉဢၼ်ပႂ်ႉေၶႃႈတွပ်ႇယိင်းသမ်ႉ တွင်ႈထိုင်ၸႂ်မႃးတိၵ်းတိၵ်းႄလႈ ယိင်းၸင်ႇမီးလိၵ်ႈယွၼ်းၶႂၢင်ႉပီႈၼႆႉယဝ်ႉ ပီႈပွင်ႇၸႂ်ပၼ်ယိင်းေသၵမ်း ေၵႃႉဢၼ်ယိင်းႄတႇၼႃႈႁိူၼ်းၸွမ်းေၵႃႈ ဢမ်ႇၸႂ်ႈၶိူဝ်းပိူၼ်ႈေသဢမ်ႇၵႃး သမ်ႉပဵၼ်ေၵႃႉၸွႆႈၶိူဝ်းၵူၺ်းႄလႈ ယိင်းဝူၼ်ႉဝႃႈသဵၼ်ႈတၢင်းႁဝ်းေတပႆႁူမ်ႈၵၼ်လႆႈၶၢဝ်းယၢဝ်းယူႇ ယိင်းေတၵႂႃႇယူႇၸွမ်းၶဝ်တီႈ မိူင်းၼၢႆးယဝ်ႉ... တွၼ်ႈတႃႇပီႈ ယိင်းေၵႃႈဝၢင်းၶႂၢင်းပၼ်ယူႇ ၸၢတ်ႈၼႆႉ ဝႆႉဝႃႈပၢၼ်ဢွၼ်ႁဝ်းဢမ်ႇႁူမ်ႈၵၼ်ၼႆေသၵမ်း......

တီႈမႃး/
ယိင်းမွၼ်းလိူၼ်
ေၵႃႉႁၵ်ႉပီႈႁိုဝ် လုၵ်ႈပႂ်ႉပိူၼ်ႈ
23.12.2016

လိၵ်ႈၼႆႉတႅမ်ႈဝႆႉၸဵမ်မိူဝ်ႈ ၽွင်းပဵၼ်ပၢင်တိုၵ်းတီႈပၢင်လူင် ၼၼ်ႉယဝ်ႉ......
ေပႃးဝႃႈမၼ်းၸၢႆးဢၢၼ်ႇလိၵ်ႈသုတ်းယဝ်ႉေၵႃႈ တင်းသဵင်ၵႂၢမ်းဝၢၼ်ဢွၼ်ႇ #ပုၼ်ႈၽွၼ်းႄလႈေၵႃႉႁၵ်ႉ ဢၼ်လႆႈငိၼ်းယူႇႁိမ်းႁိူၼ်းၼၼ်ႉေၵႃႈ ၶႅၼ်းမႃးထႅင်ႈႁႅင်းၵပ်ႉဢူၵ်း
ၵပ်ႉၸႂ်ေသ ထိုင်တီႈဢမ်ႇတဵင်ၽၢႆၼမ်ႉတႃလႆႈယဝ်ႉႄလႈ 
ၸင်ႇပွႆႇဢွၵ်ႇမႃးပႃးတၢင်းသဵင်ႁႆႈေၵႃႉၸၢႆးယူႇ ၼမ်ႉၼွင်း
လူင် ဢၼ်လႆလူင်းမႃးၼၼ်ႉ လႆၵႂႃႇၸူးၽႅၼ်ႇၶၢဝ်ဢွၼ်ႇ ၼၼ်ႉႄလႈ သီသီႇသူပ်းလႅင်ဢွၼ်ႇ ၼၼ်ႉေၵႃႈလႆႈႁၢႆၵႂႃႇ
ၸွမ်းၼမ်ႉတႃမၼ်းၸၢႆးယဝ်ႉ တၢင်းမုင်ႈမွင်း ႄလႈ 
ယိူင်းဢၢၼ်းဢၼ်မၼ်းၶႂ်ႈႄတႇတင်ႈၼႃႈၵၢၼ်ႁူမ်ႈ
မၼ်းၼၢင်းႄလႈ ၶႂ်ႈႄတႇတင်ႈၸၢတ်ႈပၢၼ်ဢၼ်လီၼၼ်ႉေၵႃႈ ႁၢႆလၢႆၵႂႃႇၸွမ်းၼမ်ႉတႃမူတ်းယဝ်ႉ လွင်ႈ
တၢင်းတႃႇေတဢုၼ်ႇၸႂ်ဢၼ်ဝႃႈၼၼ်ႉေၵႃႈ ႁိုဝ်ေတမီး
ယဝ်ႉ မိူၼ်ၼင်ႇဝႃႈမၼ်းၸၢႆးလႆႈၵႂႃႇယူႇၼႂ်းလပ်းသိင်ႇလူင် ဢၼ်ဢမ်ႇမီးၽႂ် ၼၼ်ႉေသ ၼင်ႇၶႂ်ႈႁႆႈၼၼ်ႉ ဢမ်ႇယိူၼ်ႉ 
ဢမ်ႇထိင်းသင်ယဝ်ႉ ၼင်ႇၶႂ်ႈပဵၼ်ၸိူဝ်းၼၼ်ႉႄလႈ လွင်ႈယၢပ်ႇမၼ်းၸၢႆးဢၼ်ပူၼ်ႉမႃးၸိူဝ်းၼၼ်ႉ လၢတ်ႈႄၼတႆးေၵႃႉမၼ်း ထိုင်တီႈၼမ်ႉတႃေပႃးတူၵ်းၸွမ်းယူႇယဝ်ႉ......

တၢင်းၶၢၼ်ၸႂ်ႄလႈတၢင်းတုၵ်ႉဢၼ်ႁဵတ်းသိုၵ်းမႃးၶၢဝ်းတၢင်း ႁႃႈပီပၢႆၼၼ်ႉယၢပ်ႇတၢၼ်ႇလႂ်ေၵႃႈ ဢမ်ႇထိုင်တီႈၼမ်ႉတႃတူၵ်းေသပွၵ်ႈ ပဵၼ်သင်ႄလႈလွင်ႈမွင်ၸႂ်ဢွၼ်ႇဢၼ်ၼႆႉ ဢမ်ႇႁၼ်တူဝ်ေသ ၸိုင်ေပႉႁဵတ်းႁႂ်ႈ #ၼမ်ႉတႃေၵႃႉႁၢၼ် လႆႈတူၵ်းေၼႃ......
မၼ်းၸၢႆးတင်းႁႆႈ တင်းၶႆႈ တင်းဝူၼ်ႉ ေပႃးပူၼ်ႉထိုင်
ၸမ်ၼႃႈမိူင်းလႅင်းယဝ်ႉ ယွၼ်ႉပိူဝ်ႈတီႈလိုဝ်ႈၸႂ်ဢမ်ႇမီးၽႂ်ယဝ်ႉႄလႈ တင်းၸဵပ်းၸႂ်ၼိူဝ်သိုၵ်းလွႆၼၼ်ႉေသ မၼ်းၸၢႆး
ၸင်ႇတႅပ်းတတ်းၸႂ်ဝႃႈ ေတၶိုၼ်းၵႂႃႇႁၢပ်ႇၵၢၼ်ဝၢၼ်ႈမိူင်းၵူၺ်းယဝ်ႉ ၼႆေသ တႅမ်ႈဝွၵ်းၽၢၵ်ႇထိုင်မွၼ်းဝႆႉ ၼင်ႇတႂ်ႈၼႆႉယဝ်ႉ......

မွၼ်း....
ယွၼ်ႉပုၼ်ႈၽွၼ်းႁဝ်းႄလႈ
ၼႂ်းႄၵႈႁဝ်းယၢၼ်ၵႂႃႇ
ၵႂၢမ်းသႅတ်ႉၸႃႇပီႈလူႉ
ႁူႉယူႇဝႃႈၼႆေၵႃႈ
ပီႈေတႃႈဢမ်ႇၸၢင်ႈမႃး
ယိင်းထူပ်းၺႃးပၢၼ်ဢွၼ်
ပီႈေၵႃႈၸွၼ်ၸူမ်းယဝ်ႉ
ၶမ်ႈၸဝ်ႉၼႂ်ဢိၵ်ႇလႃႈ
သင်ဝႃႈယိင်းႁၵ်ႉပီႈ
ႁႂ်ႈပဵၼ်တီႈမၢႆၵိုမ်း
ယႃႇလိုမ်းၵၢၼ်ေမႃသွၼ်
ဢွၼ်ၸုင်ၸၼ်လိၵ်ႈႁဝ်း
ယႃႇပၼ်ဝဝ်းမွင်ၵႂႃႇ
တႃႇပီႈေၵႃႉပဵၼ်သိုၵ်း
ေတဢဝ်ၵွင်ႈတိုၵ်းလူမ်ႇ
ႁူမ်ႇလူမ်ႈပၼ်ဝၢၼ်ႈမိူင်း
တႃႇၶဵၼ်လိူင်းေပႃးသဵင်ႈယူႇၼႃႈ....
ၼမ်ႉတႃပီႈဢၼ်တူၵ်း
မူၵ်းေၵႈၽႅၼ်ႇၶၢဝ်ၼႆႉ
ေတဝႆႉပဵၼ်ႁႅင်းၸႂ်
မိူဝ်ႈလႂ်ႁဝ်းထူပ်းၵၼ်
ယႃႇႁၼ်ဝႃႈပဵၼ်ပိူၼ်ႈ
ႄတႇငိူၼ်ႈၵႂၢမ်းတၵ်ႉၸူးပီႈေသၵမ်းၼႃ....မွၼ်း

ၸၢႆးႁၢၼ်ၼုမ်ႇ တႅမ်ႈဝွၵ်းၼႆႉယဝ်ႉေသ သိုပ်ႇၶၢဝ်းတၢင်း
ၶိုၼ်ႈၸူးၼိူဝ်လွႆတႆးလႅင်းၵႂႃႇယူႇယဝ်ႉ.....

   6.3.2017 00:30

#တွၼ်ႈသွင်
***************

ၸၢႆးႁၢၼ်ၼုမ်ႇ သိုပ်ႇႁၢပ်ႇၵၢၼ်ၶိုၼ်းေပႃးမီးသၢမ်ပီၸမ်ယဝ်ႉ မၼ်းၸၢႆးလႆႈႁပ်ႉပုၼ်ႈၽွၼ်းၼႃႈတီႈပွတ်းႁွင်ႇ ထႅင်ႈႄလႈ ၵႂႃႇမႃးၸွမ်းသၢႆၼမ်ႉတူႈ သီႇေပႃႉၸိူဝ်း ၼႆႉယဝ်ႉ ....

တင်ႈႄတႇဢဝ်မၼ်းၸၢႆးလႆႈၽၢတ်ႇတင်းမွၼ်းမႃး လိူဝ်ေသသဵင်ၵွင်ႈသဵင်မၢၵ်ႇ ဢမ်ႇမီးသဵင်ဢၼ်လႂ်ပၼ်ႁႅင်းၸႂ်မၼ်းၸၢႆး
ၼမ်ႉတႃဢၼ်ဝႃႈၼၼ်ႉေၵႃႈ လိူဝ်ေသၼမ်ႉႁိူဝ်ႇႄလႈ ၼမ်ႉၽူၼ်ဢၼ်တူၵ်းသႂ်ႇၼၼ်ႉ ဢမ်ႇမီးၼမ်ႉဢၼ်လႂ်လႆႈၸွမ်းၵႅမ်းထႅင်ႈယဝ်ႉ ေၵႃႉၸႂ်ထိုင်ဢၼ်ဝႃႈၼၼ်ႉေၵႃႈ လိူဝ်ေသ ၸဝ်ႈသိုၵ်းၽၢႆႇၼိူဝ် ႁိုဝ်ေတမီးၽႂ်ထႅင်ႈ ဢွင်ႈတီႈႁိူၼ်းၸိူဝ်ႉၶိူဝ်းပီႈၼွင်ႉ ၼႆေၵႃႈ ၵူၺ်းလႆႈဢဝ်တွင်ႉၾႃႉႄလႈ ၼင်လိၼ်မိူင်း ပဵၼ်ႁိူၼ်းသဝ်းေသ ဢဝ်ေၵႃႉႁၢၼ်ၶဝ်ႁဵတ်းပီႈၼွင်ႉၵူၺ်းယဝ်ႉ တႃႇေတမီးေၵႃႉႁၵ်ႉဢၼ်ဝႃႈၼၼ်ႉ ဢမ်ႇတွၼ်ႉဝူၼ်ႉမႅၼ်ႈ ၵူၺ်းၵႃႈလွင်ႈဢမ်ႇထၢင်ႇဢမ်ႇထိူမ်ၼၼ်ႉေၵႃႈ ၸၢင်ႈပဵၼ်မႃးလႆႈယူႇ.....

ဝၼ်းမိူဝ်ႈၼႆႉ ၸၢႆးႁၢၼ်ၼုမ်ႇ မီးၼႃႈၵၢၼ်ႄလႈ ၼုင်ႈတင်းၶူဝ်းတႆး ဢွၼ်ႇေသ ၶဝ်ႈမႃးၼႂ်းဝဵင်းသီႇေပႃႉ ....

"ႁလူဝ် ..... ၵွၼ် မိူဝ်ႈလဵဝ်ပီႈမႃးထိုင် ၵျွင်းၽြႃးလူင်ၼႆႉယဝ်ႉ"

"ေဢႃႈၶႃႈ ..... ပီႈၼုမ်ႇ ၵွၼ်ၶဝ် ဢွၵ်ႇမႃးယဝ်ႉၼႃ ပႂ်ႉဝႆႉ
ၵမ်းၼိုင်ႈ"
ၵွၼ်ေၵႃႈ ဝၢင်းၽူၼ်းၵႂႃႇေသ ၸၢႆးႁၢၼ်ၼုမ်ႇႄလႈတင်းဢူၺ်းေၵႃႉမၼ်း  ပႂ်ႉဝႆႉယူႇႁိမ်းၽြႃးလူင် ပွၵ်ႉၵျွင်းၶမ်းၼၼ်ႉ ......

ယူႇဢမ်ႇႁိုင် လူတ်ႉၶိူင်ႈသွင်လမ်း မႃးၵိုတ်းႁိမ်းၶဝ်သွင်ေၵႃႉ ၼၼ်ႉေသသၢဝ်သွင်ေၵႃႉလူင်းလူတ်ႉၶိူင်ႈမႃး ......

"ပီႈၼုမ်ႇၶဝ်မႃးပႂ်ႉႁိုင်ယဝ်ႉၶႃႈယူဝ်ႉ ၵဵင်ၸႂ်ႄတႉယဝ်ႉ"
"ဢမ်ႇပႆႇႁိုင်ၼင်ႇၵဝ်ႇ မႃးသင်ႇၶူဝ်းဝႆႉေသပူၼ်ႉမႃးတၢင်းၼႆႉ"

ၵွၼ်ၼႆႉပဵၼ်သၢဝ်ၼႂ်းဝဵင်းႄလႈ တူဝ်ၶိင်းေၵႃႈႁၢင်ႈလီ မိူၼ်ၼင်ႇၵႂၢမ်းမီးဝႆႉ #သၢဝ်ႁၢင်ႈလီသၢဝ်သီႇေပႃႉ ၼႆၼၼ်ႉယဝ်ႉ ၸၢႆးႁၢၼ်ၼုမ်ႇ ၵုမ်ႇယၵ်ႉတူၺ်းတၢင်းႁၢင်ႈလီဢွၼ်ႇ မၼ်းၼၢင်းၸိုင်ႉၼၼ် ပဵၼ်ဢၼ်ယူႇယၢပ်ႇႄတႉ ....
ၸၢႆးႁၢၼ်ၼုမ်ႇႄလႈ ယိင်းၵွၼ်မူၺ် လႆႈထူပ်းတူင်ႉတၵ်ႉၵၼ်ၼႂ်း ၽဵတ်ႉေသ မိုတ်ႈၵၼ်မႃး မီးၶၢဝ်းတၢင်း ႁႃႈႁူၵ်းလိူၼ်ယဝ်ႉ ဢမ်ႇလႆႈထူပ်းတူဝ်ေတႉၵၼ်ေသပွၵ်ႈ ယွၼ်ႉပိူဝ်ႈယိင်းၵွၼ် တိုၵ်ႉၶိုၼ်ႈႁဵၼ်းေၵႃႈပိူင်ၼိုင်ႈ ပုၼ်ႈတႃႇၸၢႆးႁၢၼ်ၼုမ်ႇေတလႆႈၶဝ်ႈဝဵင်းေၵႃႈ ယၢပ်ႇ ၵွမ်ႉၵူၺ်းလႆႈႁၼ်ၶႅပ်းႁၢင်ႈၵၼ်ၵူၺ်း ပွၵ်ႈၼႆႉလႆႈမႃးႁၼ်တူဝ်ေတႉ ၵၼ်ၼႆ ပဵၼ်ဢၼ်ဢၢႆၵၼ်ႄတႉ ၽႂ်ေၵႃႈ ဢမ်ႇသူႈႁတ်းလၢတ်ႈသင် .......
မၢဝ်ႇသွင်ေၵႃႉႄလႈသၢဝ်သွင်ေၵႃႉ ၶဝ်ႈၵႂႃႇဝႆႈၽြႃးယဝ်ႉေသ မႃးဢွႆႇပႃၸွမ်းၵၼ် ၼႂ်းၵျွင်းၽြႃးလူင်ၼၼ်ႉ တူၺ်းလႅပ်ႈမီးတၢင်းသိူဝ်းႄတႉႄတႉ......
ေပႃးၶဝ်ထၢႆႇၶႅပ်းႁၢင်ႈယဝ်ႉ မၢဝ်ႇသွင်ေၵႃႉၸင်ႇပဵၼ်ၵူၼ်း
ၶပ်းလူတ်ႉၶိူင်ႈ ေသဝၢႆႇႁူဝ်မၼ်းၵႂႃႇၸွမ်းၼင်ႇ သၢဝ်သၢဝ်
ၶဝ်ႄၼတၢင်းၼၼ်ႉယူႇ လုၵ်ႉတီႈၼႂ်းဝဵင်းေသ ဢွၵ်ႇၼွၵ်ႈ
ဝဵင်းၵႂႃႇတၢၼ်ႇတၢၼ်ႇ ၸင်ႇငွၵ်းႁူဝ်လူတ်ႉၶိူင်ႈထိုင်ၵႂႃႇၵျွင်းတီႈၼိုင်ႈ ၸင်ႇၵိုတ်းလူတ်ႉၶိူင်ႈေသ ယိင်းၵွၼ်မူၺ် 
ၸင်ႇလၢတ်ႈႄၼဝႃႈ 
"ၼႆႉပဵၼ်ၵျွင်းၼမ်ႉႁူးၼွႆႉၶႃႈဝႃႇ "
"ႁဝ်းေတမႃးႁဵတ်းသင်လႃႇတီႈၼႆႉ "
"ၽၢႆႇၼိူဝ်ၼႆႉ မီးၼမ်ႉတူၵ်းတၢတ်ႇၶႃႈေဢႃႈ"

ဝႃႈၼႆေသ ၶဝ်ၸင်ႇၵႂႃႇလဵၼ်ႈ ၼမ်ႉတူၵ်းတၢတ်ႇ မူၼ်ႈ"သိူဝ်း"ယူႇ ၼႂ်းၸၢတ်ႈပၢၼ် ၸၢႆးႁၢၼ်ၼုမ်ႇ ဢမ်ႇယၢမ်ႈမီးတၢင်းသိူဝ်းမိူၼ်ၼႆမႃးေသပွၵ်ႈ ဢၼ်လႆႈငွၵ်ႈပႂ်ႉတူၺ်းယူႇၼၼ်ႉေၵႃႈ ပဵၼ်ၼႃႈၽူႈၶဵၼ်ၵူၺ်း ....

ပွၵ်ႈၼႆႉ မိူၼ်ၼင်ႇဝႃႈၵွၼ် ဢဝ်ၼမ်ႉၸိုမ်းသႅင်မႃးႁူတ်းၺႃးမၢၵ်ႇႁူဝ်ၸႂ် ၸၢႆးႁၢၼ် ဢၼ်တၢႆၵႂႃႇႁိုင်ၼၼ်ႉ ပဵၼ်တူဝ်မႃးၶိုၼ်းယဝ်ႉ ....

ပူၼ်ႉမႃးလၢႆဝၼ်းယဝ်ႉေၵႃႈ ႁၢၼ်ၼုမ်ႇ ဢမ်ႇလိုမ်းလႆႈ တၢင်းယုမ်ႉဢွၼ်ႇၵွၼ် ႁဵတ်းႁႂ်ႈမၼ်းၸၢႆးေပႃးလိုမ်းပႅတ်ႈႁွႆးၸဵပ်း
ၵဝ်ႇ ဢၼ်မီးႁွႆးဢၢတ်းဝႆႉတီႈမၢၵ်ႇႁူဝ်ၸႂ်မၼ်းၸၢႆး ၼၼ်ႉၵႂႃႇယဝ်ႉ ၵူၺ်းၵႃႈၽႅၼ်ႇၶၢဝ်ဢွၼ်ႇၼၼ်ႉႄတႉ ပိၵ်ႉသမ်ႉလၢႆႈသီၵႂႃႇေသတႃႉေၵႃႈ ဢမ်ႇယွမ်းသၵ်ႉ/လွႆး တိုၵ်ႉၵဵပ်းသိမ်းဝႆႉၼင်ႇပိူင်ၵဝ်ႇယူႇ ......

ပုၼ်ႈၽွၼ်းၸၢႆးႁၢၼ်ၼုမ်ႇထႅင်ႈဢၼ်ၼိုင်ႈႄတႉ ၸွမ်းၼင်ႇ ၵၢပ်ႈပၢၼ်ထိုင်မႃး မီးၶၢဝ်ႇသင်ေၵႃႈ လႆႈၵဵပ်းတၢင်ႇၶိုၼ်ႈၼိူဝ် ဢွၼ်ႇလၢႆး (Online)တိၵ်းတိၵ်း ....
ၵူၼ်းမိုတ်ႈႄလႈ ၵူၼ်းတၵ်ႉေၵႃႈၼမ်မႃးၵူႈမိူဝ်ႈၵူႈဝၼ်း ....

ၸၢႆးႁၢၼ်ၼုမ်ႇႄလႈ ယိင်းၵွၼ်မူၺ် ပဵၼ်ေၵႃႉႁၵ်ႉၵၼ်မႃး မီးပီပၢႆယဝ်ႉ လွင်ႈတၢင်းဝူၼ်ႉႄလႈ လွင်ႈယိူင်းဢၢၼ်းဢွၼ်ႇမၼ်းၸၢႆးၼၼ်ႉေၵႃႈလႅၵ်ႈလၢႆႈမႃးၵူႈဝၼ်း ၵူၺ်းၵႃႈမၼ်းၸၢႆး ဝူၼ်ႉမိူဝ်ႈလႂ်ေၵႃႈဢမ်ႇႁၼ်သဵၼ်ႈတၢင်းတႃႇပႆၶဝ်ႈၸူး ၵွၼ် 
ေသဢိတ်း တၢင်းႁၵ်ႉႄတႉေပႃးလူၼ်ႉၸႂ်ယဝ်ႉ တွၼ်ႈတႃႇေတႁူမ်ႈၸၢတ်ႈပၢၼ် တင်းၵွၼ်ၼၼ်ႉ လၵ်ႉလွမ်ဝူၼ်ႉဝႃႈ ၵႂႃႇႁႃႁဵတ်းၵၢၼ် မိူင်းေၶႇမိူင်းထႆးၸိုင်ႉပိူၼ်ႈႁိုဝ်ေၼႃ ၼႆယူႇ....

ၵွၼ်ၶဝ်သမ်ႉပဵၼ် ၵူၼ်းၼႂ်းဝဵင်းေသ ၸၼ်ႉလိၵ်ႈေၵႃႈမီး
ႄလႈ တႃႇေတၸူဝ်းဢဝ်ဢွၵ်ႇယၢၼ် ပၢၼ်ၵူၼ်းမီး ဢၼ်ဝႃႈၼၼ်ႉ ဢမ်ႇႁတ်းဝူၼ်ႉေသဢိတ်း မၼ်းၸၢႆးဢမ်ႇၶႂ်ႈႁႂ်ႈ
ၵွၼ်လႆႈၽိတ်းပိူင်ႈ ယွၼ်ႉပိူဝ်ႈမၼ်းၸၢႆးလႆႈႁူႉဝႃႈ ၵွၼ်ႁၵ်ႉမၼ်းေတႉ ၼၼ်ႉယဝ်ႉ ႁဵတ်းၼၼ်ေသ ပူၼ်ႉမႃးၵူႈဝၼ်းယဝ်ႉ ...

"မႂ်ႇသုင်ၶႃႈ "
ၼႆႉႄတႉပဵၼ်လိၵ်ႈေၶႃႈၵႂၢမ်း ဢၼ်တၵ်ႉမႃး ၼႂ်းၽဵတ်ႉ ၸၢႆးႁၢၼ်ၼုမ်ႇႄလႈ မၼ်းၸၢႆးၸင်ႇတွပ်ႇၶိုၼ်း..

"ေဢႃႈၶႃႈ မႂ်ႇသုင်"

"ပီႈၶဝ်ၵိၼ်ၶဝ်ႈယဝ်ႉၶႃႈႁ"

"ေဢႃႈ.......ၵိၼ်ယဝ်ႉၸဵမ်ၵႆႈၶႃႈ"

"ပီႈပဵၼ်သိုၵ်းၶႃႈႁ လႆႈႁၼ်တၢင်ႇၶၢဝ်ႇသိုၵ်း ၼမ်ႄတႉယဝ်ႉ"

"ၸႂ်ႈၶႃႈေဢႃႈ ယိင်းၶဝ်ၸိုဝ်ႈသင်လႃႇ"

"ၸိုဝ်ႈ ယိင်းဝၼ်းသီၶႃႈ ႁဵတ်းၵၢၼ်မိူင်းထႆး"

"ေဢႃ....ၸႂ်ႈၶႃႈႁ ၸင်ႇတၵ်ႉမႂ်ႇၶိုၼ်းၶႃႈ မီးၵၢၼ်ဢိတ်း
ၼိုင်ႈ"

တီႈေတႉမၼ်း မၼ်းၸၢႆးဢမ်ႇႁၼ်လီၼိူဝ်ေၵႃႉဢၼ်ၽၢတ်ႇယၢၼ် ဝၢၼ်ႈမိူင်းတႆး ႄလႈ ႄဝႈၵႂၢမ်းပႅတ်ႈၵူၺ်း....

ပူၼ်ႉမႃးယဝ်ႉလၢႆပီေသတႃႉ ေၵႃႉဢၼ်ႁၵ်ႉၸိူဝ်ႉၶိူဝ်း
ႄလႈ ႁၵ်ႉေၵႃႉႁၢပ်ႇၵၢၼ်ၸိူဝ်ႉၶိူဝ်းၼၼ်ႉ မၼ်းဢမ်ႇမီးဝၼ်း လိုမ်းလႆႈ .....

ယိင်းဝၼ်းသီ မႃးယူႇမိူင်းထႆးလႆႈသၢမ်ပီပၢႆယဝ်ႉ လိူဝ်ေသၵၢၼ်သုၼ်ႇတူဝ်ယဝ်ႉ ပဵၼ်ေမႃသွၼ်လိၵ်ႈတႆး ၼႂ်းမိူင်းထႆးႄလႈ ၸွႆႈထႅမ် ေၵႃပွင်ၵၢၼ်ၸွႆႈၸိူဝ်ႉၸၢတ်ႈ ဢၼ်ၸွႆႈထႅမ်ၶူဝ်းၶွင် ေၵႃႉႁၢၼ်ၼိူဝ်လွႆတႆးလႅင်း ၼႆ ၸၢႆးႁၢၼ်ၼုမ်ႇ ဢမ်ႇႁူႉထိုင် ......

လွင်ႈၶမ်ၸႂ်ဢွၼ်ႇမွၼ်း ဢၼ်ပူၼ်ႉမႃးၸိူဝ်းၼၼ်ႉေၵႃႈ တိုၵ်ႉထူမ်ဝႆႉၼႂ်းမၢၵ်ႇႁူဝ်ၸႂ်မၼ်းၼၢင်းယူႇ ဢွင်ႈတီႈၽၢႆႇၼႃႈၵူၼ်းတၢင်းၼမ်ၼၼ်ႉ ပိၵ်ႉသမ်ႉယုမ်ႉဢုပ်ႇလၢတ်ႈၶူဝ်ေသတႃႉေၵႃႈ လွင်ႈဢၼ်မွင်ဝႆႉၼႂ်းၸႂ်မၼ်းၼၢင်းၼၼ်ႉ ယဵၼ်းပဵၼ်ၼမ်ႉေသ လၵ်ႉပွႆႇဢွၵ်ႇၼႂ်းတႃမၼ်းၼၢင်းယူႇပဵၼ်ပွၵ်ႈ ၸူးၸႂ်ဢွၼ်ႇမၼ်းၼၢင်း ဢၼ်ၵပ်းသိုပ်ႇေၵႃႉႁၢၼ်ၶဝ် ၼၼ်ႉေၵႃႈ တွၼ်ႈတႃႇေတလႆႈႁူႉၶၢဝ်ႇ ေၵႃႉႁၵ်ႉၵဝ်ႇမၼ်းၼၢင်း ၸၢႆးႁၢၼ်ၼုမ်ႇၼၼ်ႉယဝ်ႉ ေတႃႇထိုင်မိူဝ်ႈလဵဝ် မၼ်းၼၢင်းယင်းပႆႇလႆႈငိၼ်းၶၢဝ်ႇသင်....

"ပီႈၼုမ်ႇ ႁဵတ်းသင်ယူႇၶႃႈ ပဵၼ်သင်ဢမ်ႇသိုပ်ႇၽူၼ်းၸူးၵွၼ် ေပႃးမီးပဵၼ်ဝူင်ႈ ပီႈဢမ်ႇၸႂ်ထိုင်ၵွၼ်ယဝ်ႉႁ ယိင်းၸႂ်ထိုင်ပီႈေတႉယဝ်ႉ"

ၼႆႉႄတႉပဵၼ်ေၶႃႈၵႂၢမ်း(message)ယိင်းၵွၼ်မူၺ် ဢၼ်
သူင်ႇဝႆႉပၼ်ၸၢႆးႁၢၼ်ၼုမ်ႇၼၼ်ႉယဝ်ႉ ေပႃးမၼ်းၸၢႆးလႆႈႁၼ်လိၵ်ႈယဝ်ႉေၵႃႈ ၼႅတ်ႈသိုပ်ႇၽူၼ်းၸူးၵမ်းလဵဝ်.....

"တုတ်း ....... တုတ်း ......... တုတ်း........."
ၸၢႆးႁၢၼ်ၼုမ်ႇ သိုပ်ႇပဵၼ်လၢႆၵမ်းေၵႃႈ ဢမ်ႇမီးၽႂ်မႃးႁပ်ႉ ၽူၼ်း ယူႇၵမ်းၼိုင်ႈ ေၶႃႈၵႂၢမ်းၶဝ်ႈမႃးထႅင်ႈ....

"ပီႈၼုမ်ႇ မိူဝ်ႈလဵဝ်တိုၵ်ႉမီးၶႅၵ်ႇေပႃႈဝႆႉ ၵွၼ်ဢမ်ႇၸၢင်ႈႁပ်ႉ ၽူၼ်း ေပႃးၵမ်ႉ ၶိုၼ်းသိုပ်ႇမႃးၼႃ"

ၸၢႆးႁၢၼ်ၼုမ်ႇ ေၵႃႈဢမ်ႇၸၢင်ႈႁဵတ်းႁိုဝ် ၶႂ်ႈလၢတ်ႈႄၼ လွင်ႈၸႂ်ထိုင်ဢွၼ်ႇမၼ်းၸၢႆးၼၼ်ႉယူႇေသတႃႉ ဢမ်ႇသူႈမီးၶၢဝ်းယၢမ်း ယွၼ်ႉပိူဝ်ႈ ယူႇၼႂ်းထိူၼ်ႇႄလႈမၢင်ပွၵ်ႈေၵႃႈ 
ဢမ်ႇမီးလႅင်းၽူၼ်း လိူဝ်ေသတူၺ်းၶႅပ်းႁၢင်ႈဢွၼ်ႇမၼ်းၼၢင်းယဝ်ႉ ဢမ်ႇၸၢင်ႈႁဵတ်းႁိုဝ် .....
ထိုင်မႃးၵၢင်ၶမ်ႈ မွၵ်ႈ 9 မူင်းၶိုင်ႈ လႆႈငိၼ်းသဵင်ၽဵင်းႄလႈ ၸၢႆးႁၢၼ်ၼုမ်ႇ ယိပ်းဢဝ်ၽူၼ်းမၼ်းေသ လႆႈႁၼ်ပဵၼ် ေၵႃႉႁၵ်ႉ သိုပ်ႇမႃးႄလႈၸင်ႇတဵၵ်းႁပ်ႉ ....

"ႁလူဝ်....ၵွၼ်"

"ေဢႃႈၶႃႈပီႈ ႁဵတ်းသင်ယူႇၶႃႈ"

"ၸႂ်ထိုင်ၵွၼ်ယူႇ"

"ေတႉၶႃႈႁပီႈ ၵွၼ်ေၵႃႈၸႂ်ထိုင်ပီႈမိူၼ်ၵၼ်ၶႃႈ ပီႈဢမ်ႇသိုပ်ႇမႃးပဵၼ်ဝူင်ႈ ပီႈၵႂႃႇလႂ်ၶႃႈ"

"ပီႈႄလႇတူၺ်းၼႃႈတီႈ ၺႃးတီႈဢမ်ႇမီးလႅင်းၽူၼ်းႄလႈ ဢမ်ႇလႆႈသိုပ်ႇႁႃၵွၼ် ၶႂၢင်းပၼ်ၼႃ"

"ဢမ်ႇလႆႈၶႃႈ ပီႈေတလႆႈႁွင်ႉၵႂၢမ်းႄၼယိင်းၵွၼ်ႇ"

"လႆႈလႆႈ ေပႃးဢမ်ႇၶႅမ်ႉယႃႇယွၼ်းၵႃႈႁူတီႈပီႈၼႃ ဢမ်ႇမီးတႃႇေတပၼ်"

"ဢမ်ႇပဵၼ်သင်ၶႃႈ ေပႃးပီႈပၼ်ႁူဝ်ၸႂ်လႆႈေၵႃႈႁၢၼ်ႉၸႂ်
ယဝ်ႉ"

လွင်ႈတၢင်းႁၵ်ႉ ၶဝ်သွင်ေၵႃႉတိူဝ်းမႃးၵူႈဝၼ်း ပုၼ်ႈတႃႇ ၸၢႆးႁၢၼ်ၼုမ်ႇ ႁဵတ်းၵၢၼ်ႁိူဝ်ႉတၢၼ်ႇႁိုဝ်ေၵႃႈ လႆႈဢဝ်
တၢင်းႁၵ်ႉဢွၼ်ႇမၼ်းၸၢႆး ပဵၼ်ႁႅင်းၸႂ်သူင်ႇထိုင် ၵွၼ်ယူႇ 
မၢင်ပွၵ်ႈမႃး လွင်ႈဢၼ်ေၵႃႉႁၵ်ႉဢွၼ်ႇမၼ်းဢမ်ႇပွင်ႇၸႂ်ၼၼ်ႉ ႁဵတ်းႁႂ်ႈႁိူဝ်ႉၸႂ်ယူႇေၵႃႈ ၵွပ်ႈပိူဝ်ႈ မိူဝ်ႈဢွၼ်တၢင်း ဢမ်ႇလႆႈပၼ်လွင်ႈဢုၼ်ႇၸႂ် မွၼ်းမႃးႄလႈ မၼ်းၸၢႆးၸင်ႇၸွမ်းၸႂ်
ၵွၼ်ယူႇ ဢမ်ႇၶႂ်ႈႁၼ် ၵွၼ်မီးလွင်ႈတိူဝ်ႉၸႂ် ...

ဝၼ်းမိူဝ်ႈၼႆႉ ေၵႃႉႁၢၼ်ၶဝ်လႆႈႁပ်ႉၶူဝ်းၸွႆႈထႅမ် ဢၼ်လုၵ်ႉ တီႈငဝ်ႈငုၼ်းသူင်ႇမႃးပၼ်ထႅင်ႈ .......
ၸၢႆးႁၢၼ်ၼုမ်ႇ လႆႈႁၼ်သဵၼ်ႈမၢႆ ဢၼ်ၸိူဝ်းၸွႆႈထႅမ်မႃးၼၼ်ႉ 
ပႃးၸိုဝ်ႈယိင်းဝၼ်းသီ ႄလႈ မၼ်းၸၢႆးတူၺ်းေသ ဝူၼ်ႉယူႇ ဝႃႈၸိုဝ်ႈၼႆႉ ယၢမ်ႈငိၼ်းတီႈလႂ်ၼႆ မၼ်းၸၢႆးဢမ်ႇတွင်းလႆႈ...

"မႂ်ႇသုင်ၶႃႈ"
ၸၢႆးႁၢၼ်ၼုမ်ႇလႆႈႁၼ်ေၶႃႈၵႂၢမ်းၼႂ်းၽဵတ်ႉ ၶဝ်ႈမႃးႄလႈ ၸင်ႇတွင်းလႆႈဝႃႈပဵၼ်ဝၼ်းသီ ၼႆယူႇ မၼ်းၸၢႆးၸင်ႇတွပ်ႇၶိုၼ်း

"မႂ်ႇသုင် မိူၼ်ၵၼ်ၶႃႈ ၸွင်ႇၸႂ်ႈယိင်းဝၼ်းသီ ၼႂ်းၸုမ်း ''ၸ'' သၢမ်တူဝ်ၼၼ်ႉၶႃႈ"

"ေဢႃႈၶႃႈ ၸႂ်ႈယဝ်ႉ"

"ေဢႃ....ႁဝ်းၶႃႈလႆႈႁပ်ႉၶူဝ်း ဢၼ်ၸွႆႈထႅမ်မႃးၼၼ်ႉယဝ်ႉၶႃႈ ငိၼ်းၸူမ်းႄတႉယဝ်ႉ ဢၼ်ၸွႆႈထိုင်ႁဝ်းၶႃႈ"

"ေဢႃႈၶႃႈ ၼင်ႇယိင်းၶဝ်ၸွႆႈလႆႈ ယိင်းေၵႃႈၶတ်းၸႂ်ယူႇ"

ႁႅင်းၽူၼ်းၸၢႆးႁၢၼ်ၼုမ်ႇ ၸမ်သဵင်ႈႄလႈ ဢမ်ႇတၼ်းလႆႈ
လၢတ်ႈေတႃႇၵၼ်ႁိုင် .......

ထႅင်ႈဝၼ်းၼိုင်ႈ ၸၢႆးႁၢၼ်ၼုမ်ႇ ၸင်ႇၶဝ်ႈတူၺ်းၼႃႈလိၵ်ႈ 
(Profile)ယိင်းဝၼ်းသီ လႆႈႁၼ်တၢင်ႇၶႅပ်းႁၢင်ႈ ဢၼ်မၼ်းၼၢင်းလႆႈၸွႆႈထႅမ် ႁဵတ်းေမႃသွၼ်ႄလႈ ၸွႆႈၸိူဝ်ႉၸၢတ်ႈ မႃးၸိူဝ်းၼၼ်ႉ တၢင်းၼမ်ယူႇ ပိၵ်ႉသမ်ႉဝႃႈပႆႇႁူႉၸၵ်းၵၼ် ေသတႃႉၸၢႆးႁၢၼ်ၼုမ်ႇ မီးလွင်ႈပဵင်းေပႃးၸႂ်ၼိူဝ် 
ယိင်းဝၼ်းသီ ႄတႉ ဢၼ်မၼ်းၸၢႆးယၢမ်ႈဝူၼ်ႉၽိတ်းမႃး 
လွင်ႈဝႃႈ ၼၢင်းယိင်းတႆးၸိူဝ်းၵႂႃႇမိူင်းထႆးၼႆႉ ပႅတ်ႈလၢႆမူတ်း ဢၼ်ဝႃႈၼၼ်ႉ ဢမ်ႇႁတ်းဝႃႈထႅင်ႈယဝ်ႉ မၼ်းၸၢႆးယင်းဝူၼ်ႉ ဝႃႈသင်ၼၢင်းယိင်းတႆးႁဝ်း မိူၼ်ၼႆၵူႈေၵႃႉၸိုင်
ေတလီေတႉယဝ်ႉၼႆယူႇ .......
လွင်ႈတၢင်းမိုတ်ႈၵိုဝ်း ၼႂ်းႄၵႈၵၢင်ၸၢႆးႁၢၼ်ၼုမ်ႇႄလႈ 
ယိင်းဝၼ်းသီ ၼမ်ႁႅင်းမႃးၵူႈဝၼ်းယဝ်ႉ ၵူၺ်းၵႃႈ ယိင်းဝၼ်းသီ ဢမ်ႇပႆႇႁတ်းထၢမ် ၶၢဝ်ႇငၢဝ်းေၵႃႉႁၵ်ႉမၼ်းၼၢင်းေတႃႈ
ၼင်ႇၸိုဝ်ႈၸၢႆးႁၢၼ်ၼုမ်ႇၵူၺ်းေၵႃႈဢမ်ႇလႆႈထၢမ်....

ဝၼ်းမိူဝ်ႈၼႆႉ ၸၢႆးႁၢၼ်ၼုမ်ႇလႆႈႁပ်ႉပုၼ်ႈၽွၼ်း တူၵ်းၼႃႈတီႈတၢင်းထုင်ႉမၢဝ်း လႅင်းၼႅတ်ႇၶႅမ်ႉႄလႈ လႆႈထူဝ်း Video call ၸူးၵွၼ် လႆႈလၢတ်ႈေတႃႇၵွၼ် မီးတၢင်းသိူဝ်းၼႃႇ ...
ၸင်ႇႁႃဝၢင်းၵႂႃႇၵူၺ်း ယိင်းဝၼ်းသီတၵ်ႉၶဝ်ႈမႃး....

"မႂ်ႇသုင်ၶႃႈ မိုတ်ႈၵၼ်မႃးႁိုင်ယဝ်ႉ ဢမ်ႇလႆႈထၢမ်ၸိုဝ်ႈ ယွၼ်းႁူႉၸၵ်းၸိုဝ်ႈၸွင်ႇလႆႈၶႃႈ"

ၸၢႆးႁၢၼ်ၼုမ်ႇၸင်ႇထူဝ်း Voice call  ၸူး လၢတ်ႈေတႃႇၵၼ် ....

"ၶႂ်ႈႁူႉၸိုဝ်ႈႁဝ်းၼႆၶႃႈႁ ?"

"ၸႂ်ႈယဝ်ႉၶႃႈ"

"ၸိုဝ်ႈၸၢႆးႁၢၼ်ၼုမ်ႇၶႃႈ"

"ၶဝ်ႈႁၢပ်ႇၵၢၼ်ႁိုင်ယဝ်ႉၶႃႈႁ"

"ေတမီးပႅတ်ႇပီပၢႆယဝ်ႉၶႃႈ"

သဵင်ယိင်းဝၼ်းသီယဵၼ်ၵႂႃႇၵမ်းၼိုင်ႈ ၸၢႆးႁၢၼ်ၼုမ်ႇၸင်ႇ 
ထၢမ်ၶိုၼ်း
"ပဵၼ်သင်ၶႃႈလႃႇ ၸွင်ႇလႆႈငိၼ်းယူႇၶႃႈ"

"ေဢႃ......ဢမ်ႇပဵၼ်သင်ၶႃႈ ယုၵ်ႉယွင်ႈၼမ်ႉၸႂ်ႁၵ်ႉၶိူဝ်း ပီႈႄတႉယဝ်ႉၶႃႈ"

"ေဢႃႈ လႆႈၸွႆႈမိူၼ်ၵၼ်ယူႇလူး ေတၵိၼ်ၶဝ်ႈၵွၼ်ႇ မႃးႄလႈ ၵိၼ်ၸွမ်းႁဝ်း ၽၵ်းႄတႉဢမ်ႇဝၢၼ်ၶႃႈ"

"ေဢႃႈ ၵိၼ်လွႆးလွႆးၶႃႈ"

ယိင်းဝၼ်းသီႄတႉ ဢဝ်ပဵၼ်တၢင်းဝူၼ်ႉယူႇ ႁင်းၵူၺ်းမၼ်း ယဝ်ႉ ၸွင်ႇေတၸိုဝ်ႈ ေၵႃႉႁၵ်ႉၵဝ်ႇမၼ်းႁိုဝ်ၼႆ မၼ်း
ၼၢင်းဢမ်ႇယုမ်ႇၸႂ်လႆႈ လွင်ႈဢၼ်မၼ်းၼၢင်း ပၢႆႈမႃးမိူင်းထႆး မႃးလၢႆႈၸိုဝ်ႈေသဢမ်ႇၵႃး မႃးႄမးႁၢင်ႈၶိူင်ႈၸိူဝ်းၼၼ်ႉ ေၵႃႈ မၼ်းၼၢင်းဢမ်ႇၶႂ်ႈႁႂ်ႈပိူၼ်ႈႁူႉ ယွၼ်ႉပိူဝ်ႈၸၢႆးၶိူဝ်းႁၵ်ႉသမ်ႉ ၸပ်းပႃးယႃႈႄလႈ ႄမႈဢွၵ်ႇၼၢႆးသမ်ႉ ဢဝ်ၶၢပ်ႈလုၵ်ႈၸၢႆး မၼ်းေသ ေပႃးလုၵ်ႈၸၢႆးမၼ်း ဢမ်ႇလႆႈၵိၼ်ယႃႈမႃး သမ်ႉေပႃႉႁႅမ်ၵၼ် ၽိတ်းၵၼ် ဢၼ်မၼ်းၼၢင်းၶႂ်ႈပဵၼ် ၶႂ်ႈသွၼ် လိၵ်ႈၼၼ်ႉေၵႃႈ ဢမ်ႇပဵၼ်ယဝ်ႉႄလႈ ၸင်ႇလႆႈပဵၼ်ႄမႈႁၢင်ႉမႃး ၸိူဝ်းၼႆႉ ဢမ်ႇၶႂ်ႈႁႂ်ႈၽႂ်ႁူႉႁၼ်ၸွမ်း 
ထႅင်ႈလွင်ႈၼိုင်ႈ မၼ်းၼၢင်းလႆႈႁၼ် ဢၼ်တၢင်ႇဝႆႉ ၶႅပ်းႁၢင်ႈ ၸၢႆးႁၢၼ်ၼုမ်ႇ ဢၼ်ထၢႆႇၵိုၵ်း တင်းေၵႃႉႁၵ်ႉမၼ်းၸၢႆး ၼၼ်ႉႄလႈ ပိၵ်ႉသမ်ႉဝႃႈၸႂ်ႈေၵႃႈ ဢမ်ႇမီးတၢင်းမုင်ႈမွင်းသင် မၼ်းၼၢင်း ဝူၼ်ႉေတႃႇေပႃးၼွၼ်းလပ်းၵႂႃႇယဝ်ႉ .....

သိုၵ်းၼႆႉမိူၼ် ပိူၼ်ႈေတႃႇလွၵ်းသိူဝ်ယဝ်ႉ ၵူၼ်းလဵၼ်ႈမၼ်း ယိပ်းၶၢႆႉၵႂႃႇတၢင်းလႂ်ေၵႃႈ ၵႃႈေတလႆႈၵႂႃႇ ၸၢႆးႁၢၼ်ၼုမ်ႇ မႃးတူၵ်းတၢင်းထုင်ႉမၢဝ်း ပႆႇႁိုင် ေတလႆႈမိူဝ်းၶိုၼ်း ပွတ်း 
ၼမ်ႉတူႈယဝ်ႉ ၵဵဝ်ႇၵပ်းလွင်ႈၼႆႉ ၸၢႆးႁၢၼ်ၼုမ်ႇ ၸႂ်သဵင်ႈၼႃႇ မၼ်းၸၢႆးၸင်ႇသိုပ်ႇၽူၼ်း ၸူးၵွၼ်......

"ႁ လူဝ်ၵွၼ် "

"ေဢႃႈၶႃႈ ပီႈၼုမ်ႇ"

"ၵွၼ်ႁၵ်ႉပီႈေတႉယူႇႁ"

"ပဵၼ်သင်ႄလႈ ပီႈထၢမ်ၸိုင်ႉၼႆ ယိင်းၸႂ်လဵၵ်ႉေဢႃႈ ေပႃးဢမ်ႇႁၵ်ႉပီႈ ယိင်းေတႁၵ်ႉၽႂ်လႃႇ"

"ေပႃးၼၼ် ၸွင်ႇၵွၼ်ေတၽွမ်ႉပီႈယူႇႁႃႉ ေပႃးပီႈၸူဝ်းၵႂႃႇ မိူင်းထႆး ?"
ယိင်းၵွၼ်မူၺ် တူၵ်းၸႂ်ၵႂႃႇႄတႉႄတႉေသထၢမ်ၶိုၼ်း

"ပီႈေတၵႂႃႇႁဵတ်းသင်"

"ေပႃးၵွၼ်ႁၵ်ႉပီႈ ႁဝ်းေၵႃႈၵႂႃႇယူႇၸွမ်းၵၼ်တၢင်းပုၼ်ႉ
ဢိူဝ်ႈၵွၼ်"

"ၼၼ်ႉႄတႉ ေတဢမ်ႇပဵၼ်လႆႈၶႃႈပီႈ ၵၢၼ်ႁဵၼ်းေၵႃႈပႆႇသုတ်း ယဝ်ႉေၵႃႈယိင်းဢမ်ႇၶႂ်ႈႃႉၼႃႈတႃေပႃႈႄမႈ"

ၸၢႆးႁၢၼ်ၼုမ်ႇ ဢမ်ႇၸၢင်ႈဝႃႈႁိုဝ် ဝၢင်းၽူၼ်းပႅတ်ႈၵမ်းလဵဝ် ၸၢတ်ႈပၢၼ်မၼ်းၸၢႆး ယွၼ်ႉဢမ်ႇၸႂ်ႈ ၵူၼ်းႁဵတ်းၵၢၼ် 
ႁႃငိုၼ်းႄလႈ တႃႇေတဝႃႈ ေတမိူဝ်းယွၼ်းဢဝ် ဢၼ်ဝႃႈၼၼ်ႉ ဢမ်ႇႁၼ်လၢႆးမၼ်းေသဢိတ်း လွင်ႈတၢင်း တုၵ်ႉလူင်ၼၼ်ႉ မႃးၵွင်တီႈမၼ်းၸၢႆးထႅင်ႈယဝ်ႉ တၢင်းဝူၼ်ႉ ဢၼ်ၼိုင်ႈ ဢွၵ်ႇမႃးၼႂ်းၸႂ်မၼ်းၸၢႆး ေဢႃး....တၢင်းႁၵ်ႉ 
ယိုင်ဝႃႈေပႃးမီးတၢင်းႁၵ်ႉတဵမ်ထူၼ်ႈၵူႈလွင်ႈယဝ်ႉၼႆလႃႇ ပဵၼ်သင်ႄလႈ ငိုၼ်းၶမ်း ၸၼ်ႉထၢၼ်ႈ  ပၺႃႇ လူင်ၼႆႉ 
တိုၵ်ႉေႁႉတၢင်းႁဝ်းဝႆႉယူႇ လွင်ႈဢၼ်ၵွၼ်ဝႃႈႁၵ်ႉပီႈၼၼ်ႉ ႁၵ်ႉယွၼ်ႉၸိုင်ႉႁိုဝ်ေၼႃ မၼ်းၸၢႆးဝူၼ်ႉယူႇ ႁင်းၵူၺ်းယဝ်ႉ 
ၵၢင်ၶိုၼ်း 12 မူင်းၸမ်ယဝ်ႉ ႁၼ်ၽႆးၽဵတ်ႉ (facebook) 
ယိင်းသီဝၼ်းတိုၵ်ႉၶဵဝ်ယူႇႄလႈ ၸင်ႇတၵ်ႉၸူး ........
ယွၼ်ႉပိူဝ်ႈမၼ်းၸၢႆး ၶမ်ၸႂ်ႁႅင်းၼႃႇႄလႈ ေပႃးယိင်း
ဝၼ်းသီႁပ်ႉယဝ်ႉေၵႃႈ ထၢမ်ၵမ်းလဵဝ်......

"ယႃႇဝႃႈႁဝ်းထၢင်ႇလဵၵ်ႉၼႃ ပဵၼ်သင်ႄလႈ ၼၢင်းယိင်းသူၼႆႉ ဢဝ်လွင်ႈငိုၼ်းၶမ်းႄလႈၸၼ်ႉထၢၼ်ႈပဵၼ်ယႂ်ႇေၼႃ"

"ေတဢမ်ႇၸႂ်ႈၵူႈေၵႃႉၼင်ႇၵဝ်ႇၶႃႈ"

"ၸႂ်ႈတိၵ်းတိၵ်းယဝ်ႉ ႁဝ်းတႃႉႁၵ်ႉၶဝ် ယုမ်ႇယမ်ၶဝ် ဝႆႉသႅတ်ႉၸႃႇ ၼိူဝ်ၶဝ်မႃး ၶဝ်ဢမ်ႇတွၼ်ႉဝူၼ်ႉထိုင်ႁဝ်းေသပွၵ်ႈ"

ယွၼ်ႉပိူဝ်ႈ ၸၢႆးႁၢၼ်ၼုမ်ႇ တၢင်းႁႆႈတၢင်းလၢတ်ႈႄလႈ
ယိင်းဝၼ်းသီဢမ်ႇၸၢင်ႈလၢတ်ႈၸွမ်းသင် ပႂ်ႉထွမ်ႇသဵင်မၼ်း
ၸၢႆးၵူၺ်းယဝ်ႉ ၸၢႆးႁၢၼ်ၼုမ်ႇေၵႃႈ ႁႆႈႁႆႈၶႆႈၶႆႈ လွင်ႈၼႂ်း 
ၸၢတ်ႈပၢၼ်မၼ်း ဢၼ်ပဵၼ်ပူၼ်ႉမႃး ၸိူဝ်းၼၼ်ႉတင်းသဵင်ႈယူႇ .....
ၽိူဝ်ႇ ယိင်းဝၼ်းသီလႆႈငိၼ်း လႆႈႁူႉ လွင်ႈတၢင်းမၼ်းမူတ်းယဝ်ႉ သမ်ႉေပႃးမိူၼ်ၼင်ႇၽူၼ်ေတတူၵ်းၼၼ်ႉယဝ်ႉ တွင်ႉၽႃႉလူင်ၼႆႉ ငိုပ်းတၼ်ပႅတ်ႈမူတ်း သဵင်ဢၼ်ၶဝ်ႈႁူမႃးေၵႃႈ ေပႃးၼင်ႇ ၾႃႉၽႃႇသႂ်ႇ ပဵၼ်ၵမ်း ပဵၼ်ၵမ်းယဝ်ႉ ၽူၼ်လူင်ေၵႃႈ ႁၢတ်ႇလူင်းမႃးေပႃးဢမ်ႇထၢတ်ႇမဵတ်ႉလႆႈ သဵင်ႁႆႈပၼ်းယူႇ တၢင်းသွင်ၽၢႆႇယဝ်ႉ ယိင်းဝၼ်းသီၸင်ႇၶိုၼ်းလၢတ်ႈ....

"ပီႈဢူၺ် မွၼ်းႁၵ်ႉပီႈႄတႉဢိူဝ်ႈ မွၼ်းလိုမ်းပီႈႄလႈ ႄတႇၼႃႈႁိူၼ်းၸွမ်းၶဝ်ဢမ်ႇၸႂ်ႈ ေတႃႇထိုင်မိူဝ်ႈလဵဝ် မွၼ်းတိုၵ်ႉႁၵ်ႉပီႈယူႇ "
ယိင်းဝၼ်းသီ သိုပ်ႇလၢတ်ႈႄၼလွင်ႈတၢင်းမၼ်း တင်းသဵင်ႈတၢင်းမူတ်းေသ ၸၢႆးႁၢၼ်ၼုမ်ႇ ၸင်ႇႁူႉဝႃႈ ပဵၼ်ယိင်းမွၼ်းလိူၼ် ၼႆယဝ်ႉ .....
ၵမ်းၼႆႉမၼ်းၸၢႆးၶႅၼ်းပဵၼ်ဢၼ်ဝူၼ်ႉၵႂင်ယဝ်ႉ ေတလႆႈ
သိုပ်ႇႁဵတ်းၸိုင်ႉႁိုဝ် ဢၼ်ဝႃႈၼၼ်ႉ မၼ်းၸၢႆးဝူၼ်ႉဢမ်ႇဢွၵ်ႇ သင်ဝႃႈၵွၼ်ႁူႉလွင်ႈၼႆႉ ၵွၼ်ေၵႃႈေတတူၵ်းၼမ်ႉတႃမိူၼ်ၵၼ် ၵွပ်ႈၼၼ်မိူဝ်ႈလဵဝ်ၼႆႉ #ေတလႆႈၸဵတ်ႉၼမ်ႉတႃၽႂ် ၼႆ ၽူႈတႅမ်ႈလိၵ်ႈေၵႃႈ ဝူၼ်ႉဢမ်ႇဢွၵ်ႇယဝ်ႉ ေတပႂ်ႉတၢင်းဝူၼ်ႉၽူႈပၼ်ႁႅင်းႁဝ်းၶဝ်
ၸွႆႈမႃး ၵူၺ်းယဝ်ႉၶႃႈ.....

တႅမ်ႈယဝ်ႉ 6.3.2017     17:20

တွၼ်ႈသၢမ်
*****************

#ထုင်ႉဝၢၼ်ႈၸၢမ် 
ၶၢဝ်းၵၢင်ဝၼ်းတိုၵ်ႉဢွၵ်ႇ လႅတ်ႇထွင်ႇၶိုၼ်ႈမႃးႁိမ်းဢွင်ႈပၢင်
သဝ်း ႁဝ်းၼၼ်ႉ လိူဝ်ေသသိုၵ်းႁၢၼ်ပႂ်ႉယၢမ်းယဝ်ႉ တိုၵ်ႉမီး ေၵႃႉႁၢၼ် ဢမ်ႇလပ်းဢမ်ႇၼွၼ်းေသပႂ်ႉယၢမ်းၸွႆႈယူႇ ေၵႃႉၼိုင်ႈ ၼၼ်ႉေၵႃႈပဵၼ်ေၵႃႉဢၼ် ၶႂ်ႈထႅၵ်ႇႁူဝ်ၸႂ်ပဵၼ်သွင်ၽၢၵ်ႇၼၼ်ႉယူႇ ၸၢႆးႁၢၼ်ၼုမ်ႇ ဝူၼ်ႉသင်ဢမ်ႇဢွၵ်ႇ ၸႂ်ေၵႃႈၽူင်ႉပိဝ်ၼႃႇ သင်ၸိူဝ်ႉဝႃႈပၼ်ႁႂ်ႈ မၼ်းၸၢႆးလိူၵ်ႈ ၶိူင်ႈယိပ်းၸိုင် မၼ်းၸၢႆးေတလၢၵ်ႈၵွင်ႈၸၢၵ်ႈသူၼ်ႈပွင်ႇလူင် ၼၼ်ႉ ၵမ်းလဵဝ်ယဝ်ႉ ၵူၺ်းၵႃႈၼႆႉသမ်ႉေတလႆႈလိူၵ်ႈ ႁူဝ် ၸႂ်ၽိူၵ်ႇၸိုၼ်ႈ ၶၢဝ်သႂ်ဢွၼ်ႇသွင်လုၵ်ႈၼႆ မၼ်းၸၢႆးႁိုဝ်ေတ ၶႂ်ႈၽႃႈဢၼ်လႂ် ....
ေတဝႃႈမၼ်းၸၢႆးၸႂ်ၼမ်ေၵႃႈဢမ်ႇၸၢင်ႈ လွင်ႈဢမ်ႇ
ထၢင်ႇၼၼ်ႉေၵႃႈၸၢင်ႈပဵၼ်မႃးႄလႈ တၢင်းႁၵ်ႉဢၼ်လႆႈ
ပဵင်း ၽဵင်ႇၵၼ်ဝႆႉတၢင်းသွင်ၽၢႆႇၼၼ်ႉ ဢမ်ႇလႆႈယုပ်ႈယွမ်းသင် ေၵႃႉၼိုင်ႈေၵႃႈပဵၼ်ထၢၼ်ႇၽႆးၵဝ်ႇ ဢၼ်မၼ်းၸၢႆး ဝူၼ်ႉဝႃႈမွတ်ႇၵႂႃႇႁိုင်ယဝ်ႉၼၼ်ႉ သမ်ႉၶိုၼ်းႁိုင်းမႆႈမႃး ေၵႃႉၼိုင်ႈေၵႃႈ သမ်ႉပဵၼ်မုၵ်ႉၽႆးဢွၼ်ႇ ဢၼ်ပၼ်တၢင်း ဢုၼ်ႇၸႂ်ၽွင်းမိူဝ်ႈ ႁူဝ်ၸႂ်မၼ်းၸၢႆးတုမ်ႉၺႃးၼမ်ႉၶႅင်ေသ 
ၸိူမ်ႈပဵၼ်တူဝ်မႃးၼၼ်ႉယဝ်ႉ ၽွင်းမိူဝ်ႈဝူၼ်ႉသင်ဢမ်ႇလႆႈၼၼ်ႉ ..... လႆႈငိၼ်းသဵင်ၸၢၵ်ႈၶဝ်ႈမႃး----

"သုၼ်သုၼ် ၸွင်ႇလႆႈငိၼ်း သုၼ်သုၼ်"

" လႆႈငိၼ်းယဝ်ႉ ဝႃႈႁိုဝ်ၶႃႈ"

"မိူဝ်ႈလဵဝ် တၢင်းဢူမ်မူႉသုၵ်ႉသၵ်ႉဝႆႉ ၵႂႃႇၽိူမ်ႉႁႅင်းပၼ်လူး"
"ေဢႃႈၶႃႈ"

ေပႃးဝႃႈၸၢႆးႁၢၼ်ၼုမ်ႇလႆႈငိၼ်းၶၢဝ်ႇယဝ်ႉ ၽွင်းၵၢင်
ၼႂ်ၼၼ်ႉ ၼႅတ်ႈသင်ႇ ေၵႃႉႁၢၼ်ၶဝ်တင်းသဵင်ႈႁႂ်ႈတူဝ်ႈတၼ်း ေသ လုၵ်ႉတီႈထုင်ႉဝၢၼ်ႈၸၢမ် ဢွၵ်ႇၶၢဝ်းတၢင်းၵႂႃႇ
ယဝ်ႉ ........
ေပႃးလႆႈငိၼ်းၶၢဝ်ႇၽူႈၶဵၼ်ၼႆ ၼႂ်းၸႂ်ဢမ်ႇတၼ်းဝူၼ်ႉထိုင်ၽႂ်ယဝ်ႉ ေၵႃႉႁၵ်ႉဢၼ်ဝႃႈၼၼ်ႉေၵႃႈ တၼ်းဢွၵ်ႇၼႂ်းၸႂ် မိူဝ်ႈလႂ်ဢမ်ႇႁူႉ ဢမ်ႇၼၼ်ေၵႃႈ ယွၼ်ႉၵူဝ်ပႃးေၵႃႉႁၵ်ႉ ထူပ်းေၽးႄလႈ ဢမ်ႇဢဝ်ၵႂႃႇပႃးႁိုဝ်ၼႆ ဢမ်ႇႁူႉလႆႈ....
သၢႆငၢႆငဝ်းလၢႆးမိူဝ်ႈလဵဝ် ဢမ်ႇၵတ်းယဵၼ် မၢၼ်ႈေၵႃႈယုမ်ႇ
ၸႂ်ဢမ်ႇလႆႈ လွႆေၵႃႈဢမ်ႇမီးပၵ်းပိူင် ၼႃႇေသမႃမႃႈယဝ်ႉ 
ၽွင်းၸိုင်ႉၼႆ ပီႈၼွင်ႉတႆးႁဝ်းဢွၼ်ၵၼ်ၵူဝ်ေသပၢႆႈၶဝ်ႈမိူင်းပိူၼ်ႈတိၵ်းတိၵ်း မိူင်းေပႃးမွင်ယဝ်ႉ မၢင်ပွၵ်ႈမႃးသမ်ႉေပႃး ၶႂ်ႈသွင်ႉၸွမ်းပိူၼ်ႈယဝ်ႉ ၵူၺ်းၵႃႈ ေၵႃႉႁၢၼ်ၼႆႉ ဢမ်ႇမိူၼ် ေၵႃႉသိုၵ်း .....
ေၵႃႉသိုၵ်းၼႆႉ ေပႃးၼုင်ႈၶူဝ်းသိုၵ်းေၵႃႈႁၼ်ဝႃႈပဵၼ်သိုၵ်း ယဝ်ႉၼမ်ႉၸႂ်ႁတ်းႁၢၼ်ၼၼ်ႉ ႁိုဝ်ေတမီးမိူၼ်ၵၼ်လႆႈၵူႈေၵႃႉ ၵူၺ်းၵႃႈေၵႃႉႁၢၼ်ၼႆႉ ဢမ်ႇၼုင်ႈၶူဝ်းသိုၵ်း 
ေသတႃႉ ဢဝ်တင်းၼမ်ႉၸႂ်ဢၼ်ႁၵ်ႉၸိူဝ်ႉၶိူဝ်းေသ ႁတ်း ေတႃႇသူႈၼၼ်ႉယဝ်ႉ ၸၢႆးႁၢၼ်ၼုမ်ႇၼႆႉ လႆႈဝႃႈပဵၼ် ေၵႃႉသိုၵ်းႁၢၼ်ႄတႉႄတႉ .......

ပၢင်တိုၵ်း ဢၼ်ဝႃႈၼႆႉ တိုၼ်းမီးလွင်ႈေပႉႄလႈ လွင်ႈသုမ်း ယူႇ ဢမ်ႇသုမ်းသိုၵ်းေသတႃႉ လွင်ႈလူႉလႅဝ် ၼၼ်ႉတိုၼ်း 
ဢမ်ႇလွတ်ႈမီး ......

ဝၼ်းမိူဝ်ႈၼႆႉ ပဵၼ်ဝၼ်းဢွင်ႉေပႉ ဝၢႆးေသပၢင်တိုၵ်းယဝ်ႉ
တူဝ်ႈၵႂႃႇ ေၵႃႉသိုၵ်းႁၢၼ်ၶဝ် လိုဝ်ႈႁိူဝ်ႉယူႇ ၵူၺ်းၵႃႈ ပၢင်
တိုၵ်းတၢင်းႁၵ်ႉ ႄတႉပႆႇသုတ်း.....

"ႁလူဝ်ၶႃႈ ပီႈၼုမ်ႇ"

"ဝႃႈႁိုဝ်လႃႇၵွၼ် "

"ၵွၼ် ဢမ်ႇလႆႈထူပ်းပီႈႁိုင်ၵႃႈႁိုဝ်ယဝ်ႉ ပီႈၸွင်ႇတွင်း"

"တွင်းဢိူဝ်ႈ ၵွၼ်ေၵႃႈ ႁဝ်းဢမ်ႇလႆႈထူပ်းၵၼ် သၢမ်လိူၼ်ပၢႆ
ယဝ်ႉၼႃ"

"ေပႃးၼၼ် ပီႈၸွင်ႇေတမႃးႄလႇၸွမ်းၵွၼ်လႆႈ ပွႆးလိူၼ်သီႇမူၼ်းၼႆႉယူႇႁ"

ၸၢႆးႁၢၼ်ၼုမ်ႇ လႆႈငိၼ်းၸိုင်ႉၼၼ် ပဵၼ်ဢၼ်ၵပ်ႉၸႂ်ေတႉေတႉ ၼမ်ႉတႃေပႃးၶႂ်ႈယိုင်ႁူၺ်ႇယဝ်ႉ မၼ်းၸၢႆးၸင်ႇ ဢူမ်ဢိုၼ်လွင်ႈတုၵ်ႉဢွၼ်ႇၼၼ်ႉေသ တွပ်ႇၶိုၼ်း

"ၵွၼ်ဢူၺ် ပီႈပႆႇၸၢင်ႈပၼ်ေၶႃႈတွပ်ႇ ေပႃးပီႈပၼ်ေၶႃႈတွပ်ႇ သင်ဝႃႈထိုင်ပွႆး သၢႆငၢႆဢမ်ႇလီၼႆ ပီႈေတၽိတ်းေၶႃႈမၼ်ႈၵႅၼ်ႇ လွင်ႈၼႆႉၵွၼ်ပွင်ႇၸႂ်ပၼ်ပီႈေသၵမ်း"

သဵင်ယိင်းၵွၼ်မူၺ် ယဵၼ်ၵႂႃႇၵမ်းၼိုင်ႈေသ မိူၼ်ၼင်ႇဝူၼ်ႉယူႇၼၼ်ႉ ...... ၸင်ႇလႆႈငိၼ်းသဵင်တွပ်ႇမႃး

"ေပႃးၼၼ် ပီႈယႃႇဝႃႈသင်ၵွၼ်ၼႃ ေပႃးၵွၼ်ၵႂႃႇႄလႇ 
ၸွမ်းတႆးေၵႃႉ"

"ဢမ်ႇပဵၼ်သင်ၼႃၵွၼ် တၢင်းၽိတ်းႁဝ်းၵူၺ်း ႄလႇႁႂ်ႈမီး
တၢင်းသိူဝ်းၸႂ်ၼႃ "

"ၸူမ်းယဝ်ႉၼႃပီႈ ပွင်ႇၸႂ်ပၼ်ၵွၼ်"

ဝၢႆးေသဝၢင်းၽူၼ်းၵႂႃႇယဝ်ႉ ၸၢႆးႁၢၼ်ၼုမ်ႇ ဢမ်ႇၶႂ်ႈလၢတ်ႈ ၵႂၢမ်းသင် ဢၼ်ၶႂ်ႈလၢတ်ႈေၵႃႈဢမ်ႇဢွၵ်ႇသူပ်းမႃးလႆႈ #ယႃႇၵႂႃႇၸွမ်းမၢဝ်ႇၼႃ #ယႃႇၵႂႃႇၵိၼ်ပီႇယႃႇၼႃ #ယႃႇပွၵ်ႈမႃးလိုၵ်းၼႃ လွင်ႈဢၼ်မၼ်းၸၢႆးၶႂ်ႈၶႅၼ်သီးၸိူဝ်းၼၼ်ႉ ၶႂ်ႈႁၢမ်ႈမူတ်းမူတ်းယဝ်ႉ ၵူၺ်းၵႃႈ ယွၼ်ႉမၼ်းၸၢႆးဢမ်ႇၸၢင်ႈၸွမ်း ထိင်းႁင်းၵူၺ်းႄလႈ ၵႃႈေတလႆႈ ပွႆႇပၼ်ၼင်ႇၸႂ်ၶဝ်
ယဝ်ႉ ........
ပဵၼ်ေၵႃႉႁၵ်ႉၵၼ် ပဵၼ်သင်ေတဢမ်ႇၶႅၼ်လႃႇ ၵႂႃႇႄလႇပွႆးၸွမ်းၵၼ်ၸိုင်ႉၼၼ် ပဵၼ်တႆးေၵႃႉေၵႃႈယဝ်ႉ ပဵၼ်ပီႈၼွင်ႉဝႃႈၼႆ ေၵႃႈယဝ်ႉ ဢမ်ႇၶႂ်ႈႁူႉ ဢမ်ႇၶႂ်ႈငိၼ်းေသ
ဢိတ်း လွင်ႈၸိူဝ်းၼႆႉ ဢမ်ႇၸႂ်ႈဝႃႈပိူၼ်ႈၵူၺ်းေမႃၶႅၼ် ၸၢႆးႁၢၼ်ၼုမ်ႇေၵႃႈေမႃယဝ်ႉ .....

ၽွင်းၼင်ႇၼၼ် မၼ်းၸၢႆးဝူၼ်ႉတူၺ်းပုၼ်ႈတႃႇမွၼ်းႄတႉ ပဵၼ်ေၵႃႉၵတ်ႉၶႅၼ်ႇ လႅၼ်ႇၽၢႆ ၼႂ်းၵၢၼ်ၸိူဝ်ႉၸၢတ်ႈ ယူႇ
ယဝ်ႉႄလႈ လွင်ႈဢၼ်မၼ်းၸၢႆးႁဵတ်းသၢင်ႈယူႇၼၼ်ႉ ပဵၼ်ႁိုဝ်ေၵႃႈ မွၼ်းေတပွင်ႇၸႂ်ယူႇ ၼင်ႇႁိုဝ်ၵွၼ်ေပႃးေတ 
ယၢင်ႈၸွမ်းသဵၼ်ႈတၢင်းၸိူဝ်ႉၸၢတ်ႈၼင်ႇမွၼ်းလိူၼ်ႁိုဝ် 
ဢမ်ႇၼၼ် ဝၼ်းသီၼၼ်ႉ ၸင်ႇတႅမ်ႈဝႆႉပၼ်ဝွၵ်းဢွၼ်ႇပုၵ်ႈ
ၼိုင်ႈ ပုၼ်ႈတႃႇယိင်းၵွၼ်မူၺ်ယဝ်ႉ.....

ၵွၼ်...
ပၢၼ်ဢွၼ်ၼွင်ႉႄလႈပီႈ
         ပဵၼ်တီႈဢၼ်ယၢပ်ႇၸႂ်
                 ဝူၼ်ႉမိူဝ်ႈလႂ်ၼႆေၵႃႈ
                       ေတႃႈဢမ်ႇထိုင်ၵွၼ်လႆႈ
                             တၢင်းမႆႈၸႂ်ဢွၼ်ႇၼႆႉ
                        မီးဝႆႉယူႇၵူႈပိူင်
                    ေတၶိုင်ၼင်ႇၶႂ်ႈပဵၼ်
                ၶဵၼ်မိူင်းတိုၵ်ႉၼမ်ၼႃႇ
           ေပႃးေတၵႂႃႇၸူးၼၢင်း
       တႃႇတမ်းဝၢင်းငိုၼ်းယႂ်ႇ
    ဝူၼ်ႉသႂ်ႇၸႂ်တူၺ်းယဝ်ႉ
        ၶမ်ႈၸဝ်ႉၼႂ်ၶိုၼ်းလိုၵ်း
             ပီႈေမႃတိုၵ်းၶဵၼ်ၵူၺ်း
                 သွၼ်ႇတူၺ်းယဝ်ႉၸၢတ်ႈပၢၼ်
                        တႃႇထူပ်းၵၼ်ေၵႃႈယၢပ်ႇ
                               ပၼ်သူႁၢပ်ႇတၢင်းမွင်း
                           ၽွင်းပႆႇၶွႆႈၵၼ်ၼႆႉ
                      သင်သူဝႆႉၵႃႈၶၼ်
                   ႁၼ်ႁဝ်းလွင်ႈယႂ်ႇေၵႃႈ
              ၶႅၼ်းေတႃႈယႃႇပၢႆႈၶိူဝ်း
           မိူဝ်းၸွမ်းမၢၼ်ႈ လွႆ ေၶႇ
       ေတႇၸဵမ် ၶၢင် ၵလႃး
           မႃးယွၼ်းပၼ်ၵႃႈႁိုဝ်
                လိူဝ်ေသတႆးၼင်ႇၵၼ်
                   ယႃႇပၼ်ၵႂၢမ်းႁၵ်ႉၼႃႈ
               သင်ဝႃႈႁဵၼ်းယဝ်ႉၵႂႃႇ
           တႃႇေၼႃႇတႅၼ်းၶိူဝ်းႁဝ်း
        ယႃႇသဝ်းၼင်ႇဢမ်ႇႁၼ်
    ၼင်ႇဢၼ်ယိင်းေမႃမႃး
  ဢမ်ႇပႃးၶဝ်ၸွႆႈေၵႃႈ
      ၶႅၼ်းေတႃႈဝႆႉမဵတ်ႉတႃႇ
           ယႃႇဝႆႉၸႂ်သူၺ်ႈၶိုၼ်း
                သၢင်ႈပိုၼ်းမႂ်ႇပၼ်ပီႈ
                      ႁႂ်ႈပဵၼ်တီႈမၢႆတွင်း
                         ၽွင်းႁၵ်ႉၵၼ်ေသၵမ်း
                      သင်ယၢမ်းပီႈၽၢတ်ႇယၢၼ်
                  ဢမ်ႇလႆႈႁၼ်ယဝ်ႉေၵႃႈ
              ၶႅၼ်းေတႃႈဢဝ်ၵႂၢမ်းသင်ႇ
          ပဵၼ်ၼင်ႇတူဝ်ပီႈေသ
         ယႃႇေၽတၢင်းပႅတ်ႈၵႂႃႇ
            တႃႇသိူဝ်းေၵႃႉလဵဝ်ၼႃႈ
                  သမ်ႉဝႃႈႁဝ်းဢမ်ႇၶွႆႈ
                      ႁဝ်းၸွႆႈၶိူဝ်းၼင်ႇၵၼ်
       ဢၼ်ၼႆႉယဝ်ႉပဵၼ်ပၢၼ်ဢွၼ်ၸႅတ်ႈၸၢင်ႇႁဝ်း......

             "ယွၼ်းၵႂႃႇၵွၼ်ႇၼႃ #ၵွၼ် ေၵႃႉပီႈႁၵ်ႉ"

ဝၢႆးေသ ၸၢႆးႁၢၼ်ၼုမ်ႇတႅမ်ႈဝွၵ်းသုတ်းယဝ်ႉၵႂႃႇေၵႃႈ
ေပႃးမီးၵၢင်ၶိုၼ်းလိုၵ်းၼႃႇယဝ်ႉ ေၵႃႉႁၵ်ႉမၼ်းၸၢႆးႄတႉ တေၼွၼ်းယဝ်ႉႁိုဝ် ဢမ်ႇၼၼ် ေတၵႂႃႇသိူဝ်းယူႇတီႈလႂ် 
ၸွမ်းၽႂ်ၼႆ မၼ်းၸၢႆးဢမ်ႇႁူႉထိုင်လႆႈ ၼင်ႇဢၼ်မၼ်းၸၢႆးၶႂ်ႈလၢတ်ႈၼၼ်ႉ မီးတဵမ်ဢူၵ်းၸႂ်ေၵႃႈ ေတႃႈဢမ်ႇၸၢင်ႈမွၵ်ႇ ႄၼၽႂ်လႆႈ ၽွင်းဢမ်ႇမီးတၢင်းဢုၼ်ႇၸႂ် ၼၼ်ႉ ၸင်ႇယိပ်း
ဢဝ်ၵွင်ႈေသ သိုပ်ႇပႆၶၢဝ်းတၢင်းၵႂႃႇယဝ်ႉ မၼ်းၸၢႆးေတ ဢွၼ်ဢဝ် ေၵႃႉသိုၵ်းႁၢၼ်ၶဝ်ၵႂႃႇလႂ်ထႅင်ႈၼႆ ၽႂ်ေၵႃႈဢမ်ႇႁူႉထိုင်လႆႈႄလႈ ၼႂ်းႄၵႈၵၢင်ထိူၼ်ႇ မိူၼ်ႇတူၺ်းတၢင်းလႂ်ေၵႃႈလပ်းသိင်ႇ ၸိုင်ႉၼႆ ၽႂ်ေတၶႂ်ႈပႆၸွမ်းလႃႇ ၽႂ်ၽႂ်ေၵႃႈ ၶႂ်ႈၵႂႃႇယူႇတီႈဢၼ်ၽႆးဢွၼ်ႇလႅင်းသႂ်သိူင်ႁိူင်ၼၼ်ေသ မီးေၵႃႉပၼ်ႁႅင်းၸႂ်ၼၼ်ႉၵူၺ်းဢိူဝ်ႈ ယွၼ်ႉပိူဝ်ႈပဵၼ် 
#ၵၢၼ်ပုၼ်ႈၽွၼ်းႄလႈ လႆႈႄဝႈယၢၼ်ေၵႃႉႁၵ်ႉမၼ်းၸၢႆးၵႂႃႇ ထႅင်ႈယဝ်ႉ ေတပဵၼ်ေတတၢႆႁိုဝ်ၼႆေၵႃႈ
ေပႃးလႆႈဢဝ်လူႇပၼ်ဝၢၼ်ႈမိူင်းယဝ်ႉႄလႈ ေတဢမ်ႇ 
ႄဝႈၵၢၼ်ၽႃႇေၽးလူင်ၼႆႉယဝ်ႉ ပဵၼ်ႁိုဝ်ေၵႃႈ ဢမ်ႇမီးႁဝ်း ေၵႃႉလဵဝ်ၵူၺ်း ဢၼ်ပႆယူႇၼႂ်းထိူၼ်ႇလိုၵ်ႉၸိုင်ႉၼႆ ဝူၼ်ႉ
ၼင်ႇၼႆေသ ႁၢႆၶဝ်ႈၼႂ်းထိူၼ်ႇၼၼ်ႉၵႂႃႇလွႆးလွႆးယဝ်ႉ ....

ၶႃႈႁဝ်းၽူႈတႅမ်ႈလိၵ်ႈေၵႃႈ ဢမ်ႇၸွမ်းႁူႉလႆႈဝႃႈ မၼ်းၸၢႆးၵႂႃႇတၢင်းလႂ် ဢမ်ႇၸၢင်ႈမွၵ်ႇႄၼၽူႈပၼ်ႁႅင်း 
ၶႃႈႁဝ်းလႆႈ ၵွပ်ႈၼႆ ......
ၶႃႈႁဝ်းေၵႃႈေတယွၼ်း မွတ်ႇၽႆးေသ ပႆၶဝ်ႈၽႃႈၵႂႃႇလွႆးလွႆးယဝ်ႉ ......

  
   🖎 7.3.2017   21:30

#တွၼ်ႈသီႇ
************

ဝၢႆးေသ ၸၢႆးႁၢၼ်ၼုမ်ႇ တႅမ်ႈဝွၵ်းဝႆႉေသႁၢႆၵႂႃႇၼၼ်ႉ ပဵၼ်ၼႃႈပွႆးလိူၼ်သီႇ ႄလႈ ပုၼ်ႈတႃႇယိင်းၵွၼ်မူၺ် ပဵၼ်ဢၼ်ၸႂ်လဵၵ်ႉေသပိူၼ်ႈၼႂ်းၸူဝ်ႈပၢၼ်မၼ်းၼၢင်းယဝ်ႉ ပွႆးေၵႃႈမၼ်းၼၢင်းဢမ်ႇပဵၼ်ၵႂႃႇ ယွၼ်ႉသၢႆငၢႆဝၢၼ်ႈမိူင်း 
ဢမ်ႇလီႄလႈဝႃႈႁိုဝ် ဢမ်ႇၼၼ် တိူဝ်ႉၸႂ် ယွၼ်ႉေၵႃႉႁၵ်ႉ
ၽၢတ်ႇၵႂႃႇ ဢမ်ႇပွင်ႇၶၢဝ်ႇပွင်ႇငၢဝ်းႄလႈဝႃႈႁိုဝ်ၼႆ ဢမ်ႇမီးၽႂ်ၸွမ်းႁူႉလႆႈ .......

"မွၼ်း - မိူဝ်ႈလဵဝ်ပီႈမႃးႁွတ်ႈတႃႈၶီႈလဵၵ်းယဝ်ႉ မွၼ်းေတမႃးႁပ်ႉပီႈလႆႈတီႈလႂ်"

"ပီႈ မႃးတီႈမိူင်းၵွၵ်ႇႄလႈ ေပႃးထိုင်မိူင်းၵွၵ်ႇ မွၼ်းေတ ၵႂႃႇႁပ်ႉပီႈ"

"လီယဝ်ႉၼႃ ေပႃးႁွတ်ႈမိူင်းၵွၵ်ႇ ေတထူဝ်းႁႃ"

ပူၼ်ႉမႃး ႁႃႈပီယဝ်ႉ .... 
ယိင်းၵွၼ်မူၺ် ၸွမ်းသွၵ်ႈၶၢဝ်ႇၸၢႆးႁၢၼ်ၼုမ်ႇ ၵႂႃႇမီးတၢင်းလႂ် ပဵၼ်ႁိုဝ်မီးႁိုဝ်ၼႆေၵႃႈ ဢမ်ႇလႆႈႁူႉသင် မိူဝ်ႈလဵဝ်မၼ်းၼၢင်း ေပႃးသုတ်းႁဵၼ်းယဝ်ႉ လွင်ႈဢၼ်ၸၢႆးႁၢၼ်ၼုမ်ႇ ၶႂ်ႈႁႂ်ႈမၼ်းၼၢင်းၸွႆႈၵၢၼ်ၸိူဝ်ႉၸၢတ်ႈၼႆေၵႃႈ လႆႈသွၼ်ပၼ်လိၵ်ႈ တႆးၶၢဝ်းမႆႈ မႃးသၢမ်ပီယဝ်ႉ လိူဝ်ၼၼ်ႉေၵႃႈ လၵ်ႉလွမ်ၸွႆႈ ထိုင်ေၵႃႉႁၢၼ်ၶဝ် ၼင်ႇပွင်ပဵၼ်လႆႈၼၼ်ႉယူႇ လွင်ႈဢၼ်မၼ်း ၼၢင်းႁဵတ်းၸိူဝ်းၼႆႉ မၼ်းၼၢင်းၶႂ်ႈ လၢတ်ႈႄၼေၵႃႉႁၵ်ႉ မၼ်းၼၢင်းၼႃႇယဝ်ႉ ......

ၽွင်းမိူဝ်ႈမၼ်းၼၢင်း တိုၵ်ႉၼင်ႈဢွမ်ႇလႅတ်ႇေသ ဝူၼ်ႉ
ထိုင်ေၵႃႉႁၵ်ႉယူႇၼၼ်ႉ လႆႈငိၼ်းသဵင် ႄမႈမၼ်းၼၢင်းႁွင်ႉ ႄလႈ ၸင်ႇၶဝ်ႈမိူဝ်း ႄမႈၶဝ်ၸင်ႇဢဝ် ၽူၼ်းယိုၼ်ႈပၼ် လႆႈႁၼ် ပဵၼ်မၢႆၽူၼ်း မိူင်းထႆးၶဝ်ႈမႃးႄလႈ မၼ်းၼၢင်းၸင်ႇ တၵ်ႉေသ သမ်ႉလၢတ်ႈၵႂၢမ်းထႆးႄလႈ မၼ်းၼၢင်းဢမ်ႇပွင်ႇၸႂ် မၼ်းၼၢင်းၸင်ႇထၢမ်လၢတ်ႈၵႂၢမ်းဢင်းၵိတ်ႉၸွင်ႇလႆႈ ၼႆၶဝ်ၸင်ႇလၢတ်ႈေတႃႇမၼ်းၼၢင်းၵႂၢမ်းဢင်းၵိတ်ႉ 
ဝႃႈႁိုဝ်ႄတႉဢမ်ႇႁူႉ ဢၼ်ႁူႉႄတႉ သဵင်ဢၼ် မၼ်းၼၢင်းတူၵ်းၸႂ်ေသ ဢွၵ်ႇမႃးဝႃႈ ......

"ႁႃ...." ၼႆေၶႃႈလဵဝ်ၵူၺ်း .......

တီႈႁိမ်းႄမႈၼမ်ႉ ၶျၢဝ်းၽရယႃး ၽၢႆႇႁွင်ႇဝဵင်းလူင်မိူင်းၵွၵ်ႇ ယၢၼ် 11 ၵီႇလူဝ်ႇၼၼ်ႉ လႆႈငိၼ်းသဵင်ဢၼ်ၸႅတ်ႈထၢမ် 
ေပႃးေၸးေပႃးၸွတ်ႇ ၵူၼ်းၸၢႆးေၵႃႉၼိုင်ႈ ဢၼ်ထုၵ်ႇၺွပ်း မႃးၼၼ်ႉ ၵႂၢမ်းထႆးေၵႃႈဢမ်ႇေမႃ ၵႂၢမ်းဢင်းၵိတ်ႉေၵႃႈ ဢမ်ႇေပႉ ထၢမ်သင်ေၵႃႈဢမ်ႇလႆႈ ၼႃႈေၵႃႈငဝ်သုင်ႈသုင်ႈထၢမ်သင်ေၵႃႈ ဢမ်ႇတွပ်ႇ ၵုမ်ႇၶၢမ်ႇတမ်ႇၼူတ်ႇထႆးၶဝ် ထုပ်ႉ ေပႃႉယူႇတိၵ်း" သဵင်ပွင်ႉၶၢင်း မၼ်းၸၢႆး 
ဢမ်ႇဢွၵ်ႇေသတႃႉ ၼမ်ႉတႃမၼ်းၸၢႆးႄတႉ လႆေပႃးဢမ်ႇထၢတ်ႇ လွင်ႈတၢင်းၸဵပ်းမိူၼ်ၼႆ ဢမ်ႇတွၼ်ႉထူပ်းေသပွၵ်ႈ .....

ထိုင်မႃးၵၢင်ၶမ်ႈ ၽွင်းၸမ်ၼွၼ်းၼၼ်ႉ ၸင်ႇမီးၵူၼ်းတႆးေၵႃႉၼိုင်ႈ မႃးတၵ်ႉမၼ်း ၸၢႆးႁၢၼ်ၼုမ်ႇၼႆႉ တူၺ်း ႁၢင်ႈ ၽၢင်မၼ်းၸၢႆး ၶိူင်ႇၶမ်ႉသုင်သၼ်ႈေသတ ဢမ်ႇလႅပ်ႈၸႂ်ႈ ၵူၼ်းႁၢႆႉ ယွၼ်ႉသင်ႄလႈ လႆႈမႃးတူၵ်းၶွၵ်ႈၼႆ ၵူၼ်းၸၢႆး ေၵႃႉၼၼ်ႉ လွမ်ဢၢမ်းဝႆႉယူႇ...

"မႂ်ႇသုင် တႆးေၵႃႉ"
ၽွင်းမိူဝ်ႈမၼ်းၸၢႆးတိုၵ်ႉ ဢဝ်ၼႃႈငူပ်ႉၸူးႁူဝ်ၶဝ်ႇေသ ယဵၼ်ယူႇၼၼ်ႉ လႆႈငိၼ်းသဵင်ၵႂၢမ်းတႆး ၶဝ်ႈႁူမႃးႄလႈ ၸင်ႇငွၵ်ႈတူၺ်း....

"မႂ်ႇသုင် "

"တႆးေၵႃႉ ႁဵတ်းႁိုဝ်ထုၵ်ႇၺွပ်းမႃး တီႈၼႆႈၼႆႉ"

"ထုၵ်ႇၸႅတ်ႈ ဝတ်း passpord"

"တႆးေၵႃႉ. ဢမ်ႇမီးပီႈၼွင်ႉႁ"

"ထူဝ်းႁႃၶဝ်ဢမ်ႇလႆႈ"

ၵႂၢမ်းထၢမ်ေၶႃႈၼႆႉ မၼ်းမႃးယွၼ်ႈထိုင်မၢၵ်ႇႁူဝ်ၸႂ်ၼႃႇ ဢမ်ႇထၢင်ႇၶဝ်ေတႁဵတ်းလႆႈၵႂႃႇၸိုင်ႉၼႆ မၼ်းၸၢႆးေၵႃႈတင်းတွပ်ႇေသ ၵူမ်ႈၼႃႈေသ ဢဝ်ၼမ်ႉတႃ ႁဵတ်းၼမ်ႉယၢတ်ႇမၼ်း ၸၢႆးယူႇယဝ်ႉ ........

"ႁလူဝ် ... ၸွင်ႇၸႂ်ႈ ၶွၵ်ႈၶင် ပၢင်ၶႂၢင်ၶႃႈ"

"ၶႃႈပဵၼ်ပီႈၼွင်ႉ ၸၢႆးႁၢၼ်ၼုမ်ႇၶႃႈေဢႃႈ ၸွႆႈလၢတ်ႈႄၼ သဵၼ်ႈတၢင်းၽွင်ႈၶႃႈ"

"မိူဝ်ႈလဵဝ် သူမီးတီႈလႂ်"

"တီႈၶူင်ႇႁိူဝ်း သူႉဝၼ်ႇၼၽူႇမိၶႃႈ"

ၼၢင်းယိင်းေၵႃႉၼိုင်ႈ ဢၼ်ႁၢင်ႈၶိူင်ႈဝႆႉၼင်ႇၵူၼ်းၼွၵ်ႈမိူင်း ၼၼ်ႉ ယိပ်းတၢင်းထူင်လုၵ်ႈၼိုင်ႈေသ ေပႃးလူင်းၶိူင်ႈမိၼ်ယဝ်ႉေၵႃႈ ယိပ်းၽူၼ်း သိုပ်ႇၵမ်းလဵဝ်ယဝ်ႉ ......

ၸဵမ်မိူဝ်ႈၸၢႆးႁၢၼ်ထုၵ်ႇၺွပ်းၼၼ်ႉ ၼင်ႇၶဝ်ထၢမ်သင်ဢမ်ႇလႆႈၼၼ်ႉ မၼ်းၸၢႆးၵူၺ်းဢဝ်မၢႆၽူၼ်း ယိင်းၵွၼ်မူၺ် ပၼ်
ၶဝ်ၵူၺ်း လွင်ႈတမ်ႇၼူတ်ႇၶဝ်ၵပ်းသိုပ်ႇ ယိင်းၵွၼ်ဝႆႉၼၼ်ႉ မၼ်းၸၢႆးဢမ်ႇႁူႉထိုင် ........

ၼႂ်းၸၢတ်ႈပၢၼ်မၼ်းၸၢႆးမိူဝ်ႈလဵဝ်ၼႆႉ မၼ်းၸၢႆးဝူၼ်ႉဝႃႈ 
ဢမ်ႇလိူဝ်ၽႂ်ယဝ်ႉ တီႈဢၼ်မၼ်းယုမ်ႇၸႂ်ၼၼ်ႉေၵႃႈ ဢမ်ႇထၢင်ႇေသ ေတပဵၼ်ၸိုင်ႉၼႆ ........

"ၵိုတ်းၵိုတ်း တႆးေၵႃႉ ယႃႇႁဵတ်းၼၼ်"

ၸၢႆးႁၢၼ်ၼုမ်ႇ ဢဝ်မိုဝ်းမၼ်းၸၢႆးထုပ်ႉမင်ၵွၵ်းႁူဝ်မၼ်းၸၢႆး
ယဝ်ႉ ဢဝ်ၼႃႈၽၢၵ်ႇမၼ်းသွင်ႉသႂ်ႇၽႃႇဢုတ်ႇႄလႈ ၽိူဝ်ႇမီးၵူၼ်းမႃးႁၢမ်ေၵႃႈ သမ်ႉေပႃးပဵၼ်ပဵၼ်လိူတ်ႈဝႆႉယဝ်ႉ .....

"ဢမ်ႇမီးၽႂ်ယဝ်ႉ ၸၢတ်ႈပၢၼ်ႁဝ်းဢမ်ႇၵိုတ်းလိူဝ်ၽႂ်ယဝ်ႉ ေတသိုပ်ႇယူႇၵႂႃႇေၵႃႈဢမ်ႇမီးလွင်ႈသင်"

"မီးဢိူဝ်ႈပီႈ ပီႈတိုၵ်ႉမီးယိင်းယူႇ"

ဢမ်ႇထၢင်ႇဢမ်ႇထိူမ်ေသ ၽွင်းမၼ်းၸၢႆးႁႆႈႁႆႈပွင်ႉပွင်ႉယူႇၼၼ်ႉ လႆႈငိၼ်းသဵင်ႄလႈ ၽိူဝ်ႇဝၢႆႇတူၺ်း လႆႈႁၼ်ပဵၼ်သၢဝ်ႁၢင်ႈလီေၵႃႉၼိုင်ႈ ပႆႇတွင်းလီ ၵမ်းၼၼ်ႉတမ်ႇၼူတ်ႇၶဝ် ၸင်ႇၽုၺ်ႇပၼ် ေသႃးၶွၵ်ႈၶင်ၼၼ်ႉေသ သၢဝ်ႁၢင်ႈလီေၵႃႉ ၼၼ်ႉၸင်ႇမႃးၵွတ်ႇဢဝ်တူဝ် ၸၢႆးႁၢၼ်ၼုမ်ႇေသ  တၢင်းႁႆႈတၢင်းလၢတ်ႈယူႇ....

"ပီႈ--- ပီႈၼုမ်ႇ ပဵၼ်ၵွၼ်ၵူၺ်း"

ၸၢႆးႁၢၼ်ၼုမ်ႇ လႆႈငိၼ်းၸိူင်ႉၼၼ် ယိုင်ႈၶႅၼ်းပဵၼ်ဢၼ် 
ၶူမ်ၸႂ်ယဝ်ႉ ေတလၢတ်ႈသင်ေၵႃႈဢမ်ႇၸၢင်ႈ တၢင်းယုမ်ႉ ဢိၵ်ႇတၢင်းၼမ်ႉတႃၼၼ်ႉ ပဵၼ်ယွၼ်ႉၸူမ်းႁ ပဵၼ်ယွၼ်ႉ
တိူဝ်ႉၸႂ် ၽႂ်ေၵႃႈဢမ်ႇၸၢင်ႈၸႅၵ်ႇေၽ  လႆႈၽၢတ်ႇၵၼ်တင်း ယိင်းၵွၼ် ပဵၼ်ႁႃႈပီပၢႆ ဢမ်ႇထၢင်ႇေသ ေတလႆႈထူပ်းၵၼ် ၶိုၼ်း သမ်ႉပဵၼ်ၽွင်းမၼ်းၸၢႆးထူပ်းတၢင်းယၢပ်ႇႄလႈ ယိုင်ႈၶႅၼ်းႁဵတ်းႁႂ်ႈမၼ်းၸၢႆး ႁၵ်ႉၵွၼ်လိူဝ်ႁႅင်းယဝ်ႉ မၼ်းၸၢႆးၸင်ႇၶိုၼ်း ၵွတ်ႇဢဝ်တူဝ်ၼုမ်ႇၼုမ်ႇဢွၼ်ႇ ယိင်းၵွၼ်မူၺ်ၼၼ်ႉ ေသ .....

"ၵွၼ် သူႁဵတ်းၸိုင်ႉႁိုဝ်ႁူႉ ႁဝ်းမီးတီႈၼႆႈ"

"ၵွၼ် ၸင်ႇၵွႆႈလၢတ်ႈႄၼဝၢႆးလင်ၼႃ မိူဝ်ႈလဵဝ်ႁဝ်းဢွၵိႇၵႂႃႇတီႈၼႆႈၵွၼ်ႇ"

ၽွင်းၼၼ်ႉ ၵူၼ်းၼႂ်းၶွၵ်ႈ ဢွၼ်ၵၼ်ၵိူဝ်ႉတူၺ်းၶဝ်သွင်ေၵႃႉ
မူတ်း မၼ်းၸၢႆးၸင်ႇသင်ႇ တႆးေၵႃႉမၼ်းေသ ဢွၵ်ႇၽၢတ်ႇယၢၼ်ၶွၵ်ႈ ပၢင်ၶႂၢင်ၵႂႃႇယဝ်ႉ .......

ဝၼ်းဢၼ်ၶီငဝ်မွင်ၸႂ်ၼၼ်ႉပူၼ်ႉၵႂႃႇယဝ်ႉေၵႃႈ ဝၼ်းလီမူၼ်ႈသိူဝ်းၼၼ်ႉ ထိုင်မႃးပၼ်ပုၼ်ႈတႃႇၸၢႆးႁၢၼ်ၼုမ်ႇယဝ်ႉ 
ဝၼ်းမိူဝ်ႈၼႆႉ မိူင်းေၵႃႈသႂ်ၾႃႉေၵႃႈပၢင်ႇ ထၢင်ႇႁၢင်ႈလႆႈ
သုတ်ႇလူမ်းၵတ်း လူမ်းယဵၼ်ၼၼ်ႉ တဵမ်ထူၼ်ႈလီၼႃႇ ဢၢႆမွၵ်ႇၼႆေၵႃႈ ေပႃးၸွတ်ႇၵႂႃႇသဵင်ႈ ၼမ်ႉၼွင်ၼႆေၵႃႈ သႂ်လီ တူၺ်းၵႂႃႇတၢင်းလႂ်ေၵႃႈ ႁၼ်မၢဝ်ႇႄလႈသၢဝ် မႃးထၢႆႇၶႅပ်း
ႁၢင်ႈ သဵင်ၵႂၢမ်းတႆး ႄလႈ ၵႂၢမ်းထႆးေပႃးၸွတ်ႇဝႆႉ ၼႂ်းသူၼ်မွၵ်ႇလူင်မိူင်းၵွၵ်ႇ Bangkok Garden ၼၼ်ႉယဝ်ႉ ....

မၢဝ်ႇႄလႈသၢဝ်သွင်ေၵႃႉ ၼင်ႈႁိမ်းၵၼ်ေသ ဢုပ်ႇၵၼ်ယူႇ ...

"ၵွၼ် ေတပွၵ်ႈၶိုၼ်းမိူဝ်ႈလႂ်လႃႇ "

"ပီႈၶႂ်ႈပွၵ်ႈမိူဝ်ႈလႂ်ေၵႃႈ မိူဝ်ႈၼၼ်ႉယဝ်ႉ "

ၸၢႆးႁၢၼ်ၼုမ်ႇ ပႆႇတွပ်ႇၵႂၢမ်းထၢမ်း ၸင်ႇလုၵ်ႉေသ ယၢင်ႈပႆၵႂႃႇဢိတ်းၼိုင်ႈ ၸင်ႇဝၢႆႇတူၺ်း တၢင်းႁၢင်လီဢွၼ်ႇ ေၵႃႉႁၵ်ႉမၼ်းၸၢႆးယူႇ ....

"ဝႃႈႁိုဝ်လႃႇ ပီႈဢမ်ႇၶႂ်ႈပွၵ်ႈယဝ်ႉႁ"

"ဢမ်ႇႁူႉယဝ်ႉဝႃႈၵွၼ် ၸွင်ႇႁူႉႄၼႇ ဢၼ်ပီႈမႃးမိူင်းထႆး ၼႆႉယွၼ်ႉသင်"

ၽွင်းယိင်းၵွၼ်မူၺ် တိုၵ်ႉဢၢင်ႈလုၵ်ႉယူႇၼၼ်ႉ ၸၢႆးႁၢၼ်ၼုမ်ႇ ၸင်ႇယိုၼ်းမိုဝ်း ၸၼ်လုၵ်ႉေသ ပႆဢုပ်ႇၵၼ်ယူႇ....
ၸၢႆးႁၢၼ်ၼုမ်ႇ ၸင်ႇၶႆႈႄၼ ၵူႈလွင်ႈတီႈယိင်းၵွၼ်ယဝ်ႉ .....

"ပီႈ ယႃႇေပဝူၼ်ႉၼမ်ယဝ်ႉ ပဵၼ်ႁိုဝ်ေၵႃႈ ၵွၼ်ႁၵ်ႉပီႈ သင်ဝႃႈပီႈ ႁၵ်ႉၵွၼ်ေၵႃႈ ပွၵ်ႈမိူဝ်းၸွမ်းၵွၼ်ႄလႈ"

"ၵူၼ်းတီႈႁိူၼ်းၵွၼ်ၶဝ်ေတဢမ်ႇဝႃႈသင်ပီႈႁ"

"ၼၼ်ႉႄတႉ ပီႈယႃႇမႆႈၸႂ် ဝၢႆးေသေပႃႈဢမ်ႇမီးယဝ်ႉ ပီႈၸၢႆးေၵႃႈႄတႇၼႃႈႁိူၼ်းေသ ႁဵတ်းၵၢၼ်ႁင်းၵူၺ်း ၼႃႈၵၢၼ်တီႈႁိူၼ်းမီးၵွၼ်ၵူၺ်း တူၺ်းထိုင်ဝႆႉ ၵွၼ်ဝူၼ်ႉဝႃႈ ႄမႈေတပွင်ႇၸႂ်ယူႇ"

"ၵွၼ် ပီႈေပႃးလႆႈမႃးထိုင်ယဝ်ႉ ပီႈၶႂ်ႈႁဵတ်းၵၢၼ်တီႈၼႆႈၵွၼ်ႇ"

ၵၢင်ၸႂ်ဢွၼ်ႇမၼ်းၸၢႆးဝူၼ်ႉဝႃႈ မၼ်းၸၢႆးပႆႇမီးသင် ၵၢၼ်ေၵႃႈပႆႇယၢမ်ႈႁဵတ်းႄလႈ ေတဢဝ်တိၼ်လၢႆမိုဝ်းပဝ်ႇေသ ယၢင်ႈၶဝ်ႈၸူးၼႂ်းၸၢတ်ႈပၢၼ် ၵွၼ်ၼၼ်ႉ ေတဢမ်ႇႁတ်း 
ၵွပ်ႈၼၼ်ပဵၼ်ဢၼ်ဝူၼ်ႉယၢပ်ႇတႃႇမၼ်းၸၢႆးယူႇ ....

"ပီႈေတႁဵတ်းၵၢၼ်သင် ဢမ်ႇပွၵ်ႈမိူဝ်းၸွမ်းၵွၼ်ႁ"

"ၵွၼ် ပီႈဢမ်ႇၶႂ်ႈပွၵ်ႈႄတႉဢမ်ႇၸႂ်ႈ ပီႈၶႂ်ႈယူႇတူၺ်းတီႈၼႆႈ မွၵ်ႈသီႇႁႃႈလိူၼ် ပဵၼ်ႁိုဝ်ေၵႃႈ ပီႈေတပွၵ်ႈၸူးၵွၼ်ယူႇၵူၺ်း"

မၼ်းၸၢႆးၸင်ႇယိပ်းဢဝ်မိုဝ်းၼုမ်ႇဢွၼ်ႇ ယိင်းၵွၼ်ေသ ၼူမ်
ႁွမ်ၵမ်းၼိုင်ႈယဝ်ႉ ပိတ်းဢဝ်ၵၢၼ်ႈမွၵ်ႇဢွၼ်ႇၼၼ်ႉ ႁဵတ်းပဵၼ် တူင်ႇေသ .......

"ၵွၼ် ၸၢတ်ႈပၢၼ်ပီႈ ဢမ်ႇမီးငိုၼ်းၶမ်း ဢမ်ႇမီးၸၼ်ႉထၢၼ်ႈ ဢမ်ႇမီးၸိုဝ်ႈသဵင်လီသင် ၵူၺ်းမီးတူဝ်ႄလႈႁူဝ်ၸႂ်ၵူၺ်း ယွၼ်းႄတႇပွႆးပၢင်ၶႅၵ်ႇၸွမ်းလႆႈယူႇႁ"

"ပီႈ ဢမ်ႇၸႂ်ႈေၵႃႉၸၢႆးႁ"

"ၸႂ်ႈဢိူဝ်ႈၵွၼ် ပုၼ်ႈတႃႇၵွၼ် ႁတ်းၽႃႇလတ်းၵူႈလွင်ႈယဝ်ႉ"

ယိင်းၵွၼ် လႆႈငိၼ်းၼင်ႇၼၼ် ယုမ်ႉၵႅမ်ႈေပႃးၶွင်ႇဝႆႉယူႇ ၸၢႆးႁၢၼ်ၼုမ်ႇ ၸင်ႇဢဝ်တူင်ႇမွၵ်ႇဢွၼ်ႇၼၼ်ႉ တိုဝ်းပၼ် 
မိုဝ်းၼိဝ်ႉတၢမ်းၵွၼ်ေသ ၸုပ်ႇၼူမ်ပၼ်ထႅင်ႈၵမ်းၼိုင်ႈ
ယဝ်ႉ ....

ၶၢဝ်းယၢမ်းေၵႃႈ လႅၵ်ႈလၢႆႈၶၢႆႉပိူင်ႈႄလႈ ၸၢႆးႁၢၼ်ၼုမ်ႇႄလႈ ယိင်းၵွၼ် ယူႇတီႈမိူင်းထႆးၸွမ်းၵၼ် မီးႁႃႈဝၼ်းၵူၺ်း 
ယိင်းၵွၼ် ဢဝ်ၵၢတ်ႉပၢၼ်ႇ ပၼ်ဝႆႉတီႈၸၢႆးႁၢၼ်ၼုမ်ႇေသ ၶိုၼ်းပွၵ်ႈမိူဝ်းၵႂႃႇယဝ်ႉ ....

ၸၢႆးႁၢၼ်ၼုမ်ႇေၵႃႈ ၸင်ႇႁဵတ်းဝတ်းေသ သိုပ်ႇႁဵတ်းၵၢၼ် တီႈၼႂ်းမိူင်းၵွၵ်ႇၼၼ်ႉယူႇ .....ၶၢဝ်းယၢမ်း ဢၼ်ႁူၵ်ႉႁၢႆႉပုၼ်ႈတႃႇ ၸၢႆးႁၢၼ်ၼုမ်ႇႄလႈ ယိင်းၵွၼ်လႅပ်ႈေတဢမ်ႇမီး 
ယဝ်ႉေသတႃႉ ပုၼ်ႈတႃႇမွၼ်းႄတႉ တိုၵ်ႉပဵၼ်ၼမ်ႉတႃ 
ၼွင်းယူႇ ....

ဝၢႆးေသမၼ်းၼၢင်းလႆႈႁပ်ႉၶၢဝ်ႇဝႃႈ ႄမႈထဝ်ႈၶဝ် ဢမ်ႇယူႇလီ ပဵၼ်ၵိၼ်းၼႃႇ ႁႂ်ႈၼႅတ်ႈပွၵ်ႈမိူဝ်းၼႆႄလႈ မၼ်းၼၢင်းဢမ်ႇတၼ်းလႆႈသင်ႇလၢတ်ႈ ၸၢႆးႁၢၼ်ၼုမ်ႇေသ ပွၵ်ႈမိူဝ်းၵႂႃႇ
ၸိုင်ႉၼၼ် မၼ်းၼၢင်းပဵၼ် #ၼမ်ႉတႃသွင်ေၵး ဝႆႉယူႇ
ယဝ်ႉ ....

ဝၢႆးေသပၢင်မႃႇသႃႇ ႄမႈထဝ်ႈယဝ်ႉၵႂႃႇေၵႃႈမၼ်းၼၢင်း ပႆႇၸၢင်ႈမႃးၶိုၼ်းမိူင်းထႆး ယဝ်ႉေၵႃႈ ၸွင်ႇေတလႆႈထူပ်းႁၼ် ၸၢႆးႁၢၼ်ၼုမ်ႇယူႇႁိုဝ် ေပႃးထူပ်းမၼ်းၸၢႆး သမ်ႉေတလႆႈလၢတ်ႈၸိုင်ႉႁိုဝ် ေတယွၼ်းၶႂၢင်ႉၸိုင်ႉႁိုဝ်ၼႆ မၼ်း
ၼၢင်းပဵၼ်ဢၼ်မႆႈၸႂ် ဝႆႉယူႇ .....

ၵွပ်ႈပိူဝ်ႈပဵၼ်ၶၢဝ်းမႆႈႄလႈ တီႈဝၢၼ်ႈၶဝ်သမ်ႉ ဢမ်ႇမီးေမႃသွၼ်ၼႆေသ ၵူၼ်းလူင်ၼႂ်းဝၢၼ်ႈေၵႃႈ မႃးယွၼ်းတၢင်း ၸွႆႈထႅမ် တီႈမၼ်းၼၢင်းဝႆႉယူႇ မၼ်းၼၢင်းေတသိုပ်ႇႁဵတ်းၸိုင်ႉ
ႁိုဝ်ၼႆ ၶႃႈႁဝ်းၽူႈတႅမ်ႈလိၵ်ႈေၵႃႈ ဢမ်ႇၸၢင်ႈတႅပ်းတတ်း ပၼ်လႆႈ သင်ၶႂ်ႈႁူႉၼႆ ပႂ်ႉထၢမ်တီႈတူဝ်ယိင်းမွၼ်းလိူၼ် 
ဢမ်ႇၼၼ် ယိင်းဝၼ်းသီေသၵမ်း .......

ယၢမ်းလဵဝ်ၶႃႈႁဝ်းတိုၵ်ႉၵႂႃႇႁပ်ႉ ယိင်းၵွၼ်ပွၵ်ႈမႃးၵူၺ်းႄလႈ ပႆႇလႆႈဢၢပ်ႇၼမ်ႉ ေတယွၼ်းၵႂႃႇဢၢပ်ႇၼမ်ႉၵွၼ်ႇ .....

✍ 9.3.2017    21:30

#တွၼ်ႈႁႃႈ
**************

"တိတ်း တိတ်း"

လႆႈငိၼ်းသဵင်ႁွၼ်းၵႃးၼႃႈႁိူၼ်းႄလႈ ပႃႈသႅင် လၢတ်ႈႁႂ်ႈလုၵ်ႈယိင်းမၼ်းၵႂႃႇတူၺ်း.....

"ႄမႈ....ပီႈၼုမ်ႇမႃး "

ယိင်းၵွၼ်မူၺ်လႆႈႁၼ်ေၵႃႉၶီႇၸွမ်းတၢင်းၼႃႈလူတ်ႉပဵၼ်
ၸၢႆးႁၢၼ်ၼုမ်ႇႄလႈ တၢင်းၸူမ်းတၢင်းသိူဝ်းေသ ၼႅတ်ႈ
ႁွင်ႉ ႄမႈၶဝ်ဢွၵ်ႇမႃး......

"ႄမႈ.....မႃးႁပ်ႉပီႈၼုမ်ႇၽွင်ႈႄလႈႄမႈ"

ယိင်းၵွၼ်မူၺ် ႁွင်ႉႄမႈမၼ်းၼၢင်းလၢႆၵမ်းယဝ်ႉ ဢမ်ႇႁၼ်ႄမႈၶဝ်ဢွၵ်ႇမႃး ၵမ်းၼၼ်ႉ မၼ်းၼၢင်းၸင်ႇၵႂႃႇၸၼ်မိုဝ်း
ႄမႈၶဝ်ဢွၵ်ႇမႃး ၼႃႈႄမႈၶဝ်ေၵႃႈဢမ်ႇလီ......

မၼ်းၼၢင်းၸင်ႇၵႂႃႇႁပ်ႉထူင်ၶူဝ်း ၸၢႆးႁၢၼ်ၼုမ်ႇမႃးေသ 
ၵမ်းၼၼ်ႉႄမႈၶဝ်ၸင်ႇႁိုတ်းပၼ်မၼ်းၼၢင်း.....

"ေပႃးမႂ်းေတႁွင်ႉဢၢႆႈၽၢၼ်ၸိူဝ်ႉလူင်ၼႆႉ မႃးယူႇၸွမ်း ယႃႇမႃးႁွင်ႉၵဝ်ႄမႈ ေပႃးမႂ်းၶႂ်ႈလႆႈမၼ်းေၵႃႈ ဢွၵ်ႇၵႂႃႇယူႇတၢင်ႇတီႈႄလႈ ယႃႇမႃးယူႇႁိူၼ်းၵဝ်ၼႆႉ"

ၽွင်းၼၼ်ႉၸၢႆးႁၢၼ်ၼုမ်ႇႄတႉဢမ်ႇလၢတ်ႈၵႂၢမ်းသင် ပႆဢွၵ်ႇႁိူၼ်းၵႂႃႇယူႇ ယိင်းၵွၼ်ႄတႉ တၢင်းႁႆႈတၢင်းႁွင်ႉၸွမ်းလင်မၼ်းၸၢႆးယူႇ.....

"ပီႈ.....ပီႈၼုမ်ႇ ယႃႇၵႂႃႇၼႃ ပီႈၼုမ်ႇ ႄမႈ.....ႄမႈၶိုၼ်းႁွင်ႉ ပီႈၼုမ်ႇမႃးၼႃ....ပီႈႁၢၼ်ၼုမ်ႇ"

"လုၵ်ႈ လုၵ်ႈယိင်း လုၵ်ႈပဵၼ်သင်"

ၽိူဝ်ႇမၼ်းၼၢင်းတိုၼ်ႇမႃး ၼမ်ႉတႃမၼ်းၼၢင်းလႆဢွၵ်ႇမႃး မွၼ်ႁူဝ်ေပႃးယမ်းဝႆႉယူႇ ၸင်ႇၶိုၼ်းၽၢင်ႉမႅၼ်ႈဝႃႈမၼ်းၼၢင်း ၼွၼ်းၽၼ်ၼႆယူႇ .....

"ႄမႈ.....လုၵ်ႈၽၼ်ထိုင် ပီႈႁၢၼ်ၼုမ်ႇထႅင်ႈယဝ်ႉ ၶႃႈၵူဝ်ဝႃႈ မၼေတၽၢတ်ႇယၢၼ်လုၵ်ႈၵႂႃႇ"

"လုၵ်ႈ ...ဢမ်ႇပဵၼ်သင်ၼႃ.....ဝႆႉၸႂ်လီလီ ပႅၼ်ႁိုဝ်ေၵႃႈ မၼ်းေပႃးပၼ်ေၶႃႈမၼ်ႈၵႅၼ်ႇလုၵ်ႈဝႆႉယဝ်ႉ"

ယိင်းၵွၼ်မူၺ် ဢမ်ႇယူႇလီလႆႈလၢႆဝၼ်းယဝ်ႉ တၢင်းၵိၼ်ေၵႃႈ ဢမ်ႇၵိၼ်ၵႃႈႁိုဝ် ၵၢင်ၶိုၼ်းသမ်ႉၼွၼ်းၽႅတ်းတိၵ်းတိၵ်း
ပႃႈသႅင်ေၵႃႈမႆႈၸႂ်ၸွမ်းလုၵ်ႈမၼ်းယူႇ......

ၸၢႆးႁၢၼ်ၼုမ်ႇ ႁဵတ်းၵၢၼ်မိူင်းထႆး ဢမ်ႇၵႃးႁႃႈလိူၼ်ယဝ်ႉ မိူဝ်ႈလဵဝ်ေပႃးၶႂ်ႈၸမ်ပီယဝ်ႉ ဢမ်ႇပွၵ်ႈမႃးၼင်ႇပၼ်ၵႂၢမ်းမၼ်ႈဝႆႉ တီႈၵွၼ်......

"သႂ်ႇထႅင်ႈႄလႈတႆးေၵႃႉ"

"သႂ်ႇသႂ်ႇ ေပႃးၶႂ်ႈၶိုၼ်ႈၼိပ်ႉပၢၼ်ႇၵိၼ်သၢမ်ဝၢၼ်ႇလီလီ ေပႃးၶႂ်ႈၶိုၼ်ႈမိူင်းၽီ ၵိၼ်ႁႂ်ႈသဵင်ႈသၢမ်တဝ်ႈဝႃႇ ေၵႃႉၶဝ်"

"ဝတ်ႉႄလႈ ႁဝ်းဢမ်ႇၵိၼ်သူႇလႃႇ ၵိၼ်ယဝ်ႉလႃႇသူၵူၺ်း"

"ႁႁႁႁ"

ၼႂ်းၼၢႆႉၵလၢပ်ႉလူင် ၵုင်းထဵပ်ႈ သဵင်တႆးေပႃးၵိုၼ်းယူႇဢိုၵ်ႉ ဢိုၵ်ႉ ၼႂ်းၼၼ်ႉ ၸၢႆးႁၢၼ်ၼုမ်ႇ ႁဵတ်းပဵၼ်ေပႃႈလဵင်ႉၶဝ်ယူႇ...

"မႃး မႃး ေလႃႇၵွၵ်းၵၼ်"

"တွၵ်း ၵလွၵ်း....ႁႂ်ႈၶိုၼ်ႈယႂ်ႇႁိူဝ်ႈႁိူင်း"

ၵူၼ်းၸၢႆးသီႇႁႃႈေၵႃႉၼင်ႈဝႅင်းၵၼ်ေသၵိၼ်လဝ်ႈ ၵိၼ်ပီႇယႃႇယူႇ ၽၵ်းေၵႃႈသင်ႇေပႃးတဵမ်ၽိူၼ်  ၸၢႆးႁၢၼ်ၼုမ်ႇ ႁဵတ်းၵၢၼ်လႆႈငိုၼ်းၼမ်ယဝ်ႉ ဢူၺ်းေၵႃႉေၵႃႈၼမ်ႄလႈ ေပႃးထိုင်ဝၼ်းလိုဝ်ႈၵၢၼ်ၼႆ ၸူဝ်းၵၼ်ၵႂႃႇႄလႇ Night Clup တႃႇေသႇ ........

"ၵိၼ်မဝ်းမဝ်းတႆးေၵႃႉၶဝ် ေပႃးမဝ်းယဝ်ႉ လူဝ်ႇၵဝ်း ေပႃႈၵဝ်းယဝ်ႉလူဝ်ႇတၢဝ်း"

"ၸႂ်ႈ...ၸႂ်ႈ ပႆႇမဝ်း ပႆႇမဝ်း ဢဝ်ထႅင်ႈ ဢဝ်ထႅင်ႈ"

တၢင်းသဵင်ၵႂၢမ်းတိုင်ႉတိုင်ႉ ယွၼ်ႈႁူဝ်ၸႂ်ၼၼ်ႉႄလႈ တၢင်းၼုမ်ႇၼုမ်ႇဢွၼ်ႇၶဝ် ၵႃႈလမ်းဝူင်းပၼ်ႇသဝ်ၼၼ်ႉ ၵႅၼ်ႇႄပႉမႃး ၸၼ်ၸႂ်ၼႃႇ.......

ေပႃးၸုမ်းၶဝ်ၵိၼ်မဝ်းယဝ်ႉေၵႃႈ ဝႅၼ်ၵႃႈဝႅၼ်ႁွင်ၸွမ်းပိူၼ်ႈ ၵမ်းၼၼ်ႉ ၸၢႆႈႁၢၼ်ၼုမ်ႇဢၢင်ႈေတၵႂႃႇၸၼ်ဢဝ် သၢဝ်ဢၼ်ၵႃႈၼိူဝ်ၼၼ်ႉလူင်းမႃႈႄလႈ သၢဝ်ေၵႃႉၼၼ်ႉ ၸင်ႇႁွင်ႉေသ မီးၵူၼ်းေၵႃႉၼိုင်ႈ မႃးၸၼ်ေၶႃႈသိူဝ်ႈမၼ်းတၢင်းလင်ေသ တႃမိုဝ်းလိတ်ႉသႂ်ႇ ၸၢႆးႁၢၼ်ၼုမ်ႇ ၵမ်းလဵဝ်  ယွၼ်ႉပိူဝ်ႈ မဝ်းၼႃႇႄလႈ ဢမ်ႇထိင်းလႆႈေသ ပိၼ်ႈလူမ်ႉၵႂႃႇၵမ်းလဵဝ် ၵမ်းၼၼ်ႉ ဢူၺ်းေၵႃႉမၼ်းသမ်ႉႁၼ်ႄလႈ ဢွၼ်ၵၼ်ယူပ်ႈ ပၼ်ဢၢႆႈၼၼ်ႉ ၽွင်းၼၼ်ႉ ၸိူဝ်းဢၼ်ၵႃႈေၵႃႈၵႃႈ ၸိူဝ်းတွႆႇၵၼ်ေၵႃႈတွႆႇ ဢၢႆႈေၵႃႉထုၵ်ႇၸုမ်းၸၢႆးႁၢၼ်ၼုမ်ႇၶဝ်ထုပ်ႉ ၼၼ်ႉေပႃးလိုမ်းတူဝ်ၵႂႃႇ  ........

"တမ်ႇၼူတ်ႇ  တမ်ႇၼူတ်ႇ"

ၽွင်းၼၼ်ႉ ၸင်ႇဢွၼ်ၵၼ်လႅၼ်ႈပၢႆႈ ဢူၺ်းေၵႃႉၸၢႆးႁၢၼ်ၼုမ်ႇေၵႃႉၼိုင်ႈ တင်းမဝ်းတၢင်းပၢႆႈႄလႈ ေႁႃႈလူတ်ႉၶိူင်ႈ ၵႂႃႇၽႃႇၺႃးၵႃးေသ တၢႆထင်တီႈ .......

ၸၢႆးႁၢၼ်ၼုမ်ႇႄတႉ ဢမ်ႇၸၢင်ႈပၢႆႈ တမ်ႇၼူတ်ႇၶဝ်ၺွပ်းၵႂႃႇလႆႈ ၵူၼ်းသိပ်းပၢႆ  ပႃႈၸုမ်းၸၢႆးႁၢၼ်ၼုမ်ႇ သၢမ်ေၵႃႉ.....

ပွၵ်ႈၼႆႉထုၵ်ႇၺွပ်းၵႂႃႇတီႈ ၶွၵ်ႈၶင်ဢၼ်မီးလွင်ႈႁူမ်ႇလူမ်ႈတဵမ်ထူၼ်ႈတီႈ ၶရွင်း ပလဵမ်း ၵၢင်ဝဵင်းမိူင်းၵွၵ်ႇၼၼ်ႉယဝ်ႉ .....

ထုၵ်ႇၶင်လႆႈ သီႇသိပ်းႁႃႈဝၼ်း ၽိူဝ်ႇဢွၵ်ႇမႃးေၵႃႈမူတ်းတူဝ်ယဝ်ႉ  ဢမ်ႇမီးငိုၼ်းႁွမ်ဝႆႉႄလႈ ပဵၼ်တၢင်းယၢၵ်ႇေတႉေတႉ မၼ်းၸၢႆးလႆႈၼႅင်ၶိုၼ်း လွင်ႈဢၼ်မၼ်းလႆႈႁဵတ်းၽိတ်းမႃးၸိူဝ်းၼၼ်ႉႄတႉႄတႉ......မၼ်းၸၢႆးၸင်ႇပၼ်ေၶႃႈမၼ်ႈၵႅၼ်ႇတူဝ်ၵဝ်ႇဝႃႈ ေတဢမ်ႇၵိၼ်လဝ်ႈထႅင်ႈ ေတဢမ်ႇၵႂႃႇ ၼၢႆႉၵလၢပ်ႉ ထႅင်ႈယဝ်ႉၼႆႉယူႇ.......

ၼူတ်ႇမၼ်းၸၢႆႈေၵႃႈဢမ်ႇတၼ်းထႃ ယွၼ်ႉတၢင်းၽိတ်းေသ လႆႈတူၵ်းၶွၵ်ႈႄလႈ  ဢမ်ႇႁတ်းယွၼ်းတၢင်းၸွႆထႅမ်ၽႂ် 
မၼ်းၸၢႆးၸင်ႇၵႂႃႇၼင်ႈႁိမ်းတၢင်းၼၼ်ႉေသၼင်ႈငဝ်ယူႇ ၽွင်းၼၼ်ႉ မီးၵႃးလမ်းၼိုင်ႈမႃးၵိုတ်းႁိမ်းမၼ်းၸၢႆးေသ လၢတ်ႈေတႃႇမၼ်း မၼ်းၸၢႆးၸင်ႇႁဵတ်းၼင်ႇၵူၼ်းဢႃႉ ၼၼ်ႉေသႄၼတိၼ်ႄၼမိုဝ်းယူႇ......

ၼၢင်းယိင်းေၵႃႉၼၼ်ႉႁူႉဝႃႈမၼ်းၸၢႆးတွင်ႉမႆႈၼႆႄလႈ ၸင်ႇၵႂႃႇဢဝ်ၶဝ်ႈမုၼ်း ႄလႈငိုၼ်းၼိူဝ်လူတ်ႉမႃးပၼ် ၽိူဝ်ႇမၼ်းၸၢႆးယၵ်ႉတူၺ်း သမ်ႉပဵၼ်ယိင်းဝၼ်းသီႄလႈ မၼ်းၸၢႆးၸင်ႇၸၵ်ႉဢဝ် ေသလႅၼ်ႈပႅတ်ႈယူႇ .......

ပိၵ်ႉသမ်ႉဝႃႈယိင်းဝၼ်းသီဢမ်ႇတွင်းမၼ်းၸၢႆးေသတႃႉ ၸၢႆးႁၢၼ်ၼုမ်ႇႄတႉ တွင်းမၼ်းၼၢင်းလႆႈလီယူႇ ယွၼ်ႉပိူဝ်ႈလႆႈႁၼ်မိူဝ်ႈမၼ်းၵူမ်ႈၼၼ်ႉလႆႈႁၼ် တီႈေၶႃးမၼ်းၼၢင်း ႁွႆႈဝႆႉငႃးၸၢင်ႉဢၼ်ၸၢႆးတွၼ်ႈဝႆႉၼၼ်ႉၼႆ မၼ်းတွင်းလီယူႇ ...

"ေဢႃ.....မွၼ်းလိူၼ် ၸၢတ်ႈပၢၼ်သူႄလႈႁဝ်းၼႆႉ ပိူင်ႈၵၼ် ၼႃႇယဝ်ႉ ႁဝ်းေတႁဵတ်းႁိုဝ်ႁတ်းလၢတ်ႈေတႃႇသူယဝ်ႉ ပဵၼ်သင်ႄလႈသူတိုၵ်ႉ ၵဵပ်းသိမ်းဝႆႉၶူဝ်းၶွင်းႁဝ်းယူႇလႃႇ"

ၽွင်းမၼ်းၸၢႆးတိုၵ်ႉဝူၼ်ႉေသ ပႆၵႂႃႇယူႇၼၼ်ႉ လူတ်ႉလမ်းၼိုင်ႈ ၵိုင်ႉၵၢင်ႉမႃးၽႃႇၺႃးမၼ်းၸၢႆးေသလူမ်ႉၵႂႃႇယဝ်ႉ......

"မွၼ်းလိူၼ်.......သူၵႂႃႇယူႇလႂ် ႁဝ်းၸွမ်းႁႃသူ ေပႃးမီးပီပၢႆယဝ်ႉ"

".................."

"ပဵၼ်သင်သူဢမ်ႇတွပ်ႇႁဝ်းလႃႇ ႁဝ်းႁၵ်ႉသူၼႃမွၼ်း ၸွင်ႇလႆႈငိၼ်း"

"ပီႈႁၢၼ်ၼုမ်ႇ ယႃႇေပတူင်ႉတူဝ်ၼႃ "

ၽိူဝ်ႇမၼ်းၸၢႆးႁူႉတူဝ်မႃး မၼ်းမီးယူႇတီႈလႂ်ၼႆ ဢမ်ႇႁူႉယဝ်ႉ ေၶႃးမၼ်းၸၢႆးေၵႃႈ ပႆႇငွၵ်ႈလႆႈ ၼင်ႇႁၢင်ႈၸဵပ်းၵႅၼ်းဝႆႉယူႇ ၵမ်းၼၼ်ႉ ယိင်းမွၼ်းလိူၼ်ၸင်ႇလၢတ်ႈႄၼ........

"မိူဝ်ႈလဵဝ်သူမီးယူႇတီႈ ႁူင်းယႃၶဵတ်ႇႁူၺ်ၶႂၢင် ယွၼ်ႉပိူဝ်ႈသူထုၵ်ႇလူတ်ႉၽႃႇ ၵတ်ႉၵႃႈလႃႈ သူဢဝ်ၽႅၼ်ႇၼႆႉတူၵ်းဝႆႉႄလႈ ႁဝ်းၼႅတ်ႈလမ်းၸွမ်း ၽိူဝ်ႇႁၼ်ေၵႃႈသူေပႃးလူမ်ႉဝႆႉယူႇႁိမ်းတၢင်း ႁဝ်းၸင်ႇလႆႈဢွၼ်သူမႃးတီႈၼႆႈ"

"ၼႆႉ ႁဝ်းလိုမ်းတူဝ်ၵႂႃႇလၢႆမူင်းယဝ်ႉလႃႇ "

"သွင်ၶိုၼ်းသၢမ်ဝၼ်းယဝ်ႉ"

မၼ်းၸၢႆးေၵႃႈ ဢမ်ႇၸၢင်ႈလၢတ်ႈသ လႆႈထူပ်းၶိုၼ်းမွၼ်း
ၽွင်းၸိုင်ႉၼႆ ေတလႆႈငိၼ်းၸူမ်းႁ ေတလႆႈတိူဝ်ႉၸႂ်
ဢမ်ႇႁူႉယဝ်ႉ.......ယိင်းမွၼ်းလိူၼ်ၸင်ႇၶႆႈႄၼၶိုၼ်း 
လွင်ႈဢၼ်မၼ်းၼၢင်း ဢမ်ႇလႆႈၵႂႃႇႁပ်ႉ ၸၢႆႈႁၢၼ်ႇၼုမ်ႇ 
မိူဝ်ႈႄတႇမႃးမိူင်းၵွၵ်ႇၼၼ်ႉ ယဝ်ႉေၵႃႈသိုပ်ႇလၢတ်ႈဝႃႈ...

"ပီႈ...ယႃႇမႆႈၸႂ် ဝႆႉဝႃႈမွၼ်းတွပ်ႇတႅၼ်းၶိုၼ်းဢၼ်မွၼ်း ဢမ်ႇႁဵတ်းၸွမ်းေၶႃႈမၼ်ႈၵႅၼ်ႇဝၼ်းၼၼ်ႉ ႁႂ်ႈမွၼ်းလႆႈတူၺ်းထိုင်ပီႈၼႃ"

"ငိၼ်းၸူမ်းယဝ်ႉမွၼ်း"
...................................................................................

"ဢႃႉ........မိူင်းထႆးၼႆႉ ပႅတ်ႈလၢႆၼႃႇေၼႃ"

"ပႅတ်ႈလၢႆၸိုင်ႉႁိုဝ်ႄမႈ"

"မႃးတူၺ်းေလႃႇၼၼ်ႉ ၼႂ်းၶၢဝ်ႇၼၼ်ႉ ဢဝ်လူတ်ႉမႃးၽႃႇၵၼ်ေႁ ပၢႆႈပႅတ်ႈ ၸိုင်ႉၼၼ်ေၵႃႈႁဵတ်း"

ပႃႈသႅင်တိုၵ်ႉတူၺ်းၶၢဝ်ႇဢၼ်တၢင်ႇဝႆႉၼိူဝ်ၽဵတ်ႉၼၼ်ႉ
ေသၶႆႈႄၼလုၵ်ႈယိင်းမၼ်းယူႇ ယွၼ်ႉပိူဝ်ႈမၼ်းၼၢင်းတိုၵ်ႉယဵပ်ႉၶူဝ်းယူႇႄလႈႁဵတ်းၼင်ႇဢမ်ႇၶဝ်ႈၸႂ်ေသ လၢတ်ႈၵႂႃႇ....

"ၵႆႈယဝ်ႉႄလႈႄမႈ ပဵၼ်လွင်ႈၶဝ်ၵူၺ်း ၵၢမ်ႇဢိူဝ်ႈေမႃႉ"

"ေၵႃႉထုၵ်ႇၽႃႇ ပဵၼ်ၵူၼ်းတႆးဝႃႇလုၵ်ႈ"

"လႂ် ၵမ်ႉလူးႄမႈ"

ယိင်းၵွၼ်မူၺ် ၸင်ႇၸိၵ်ႉဢဝ်ၽူၼ်းႄမႈၶဝ်ေသတူၺ်း....

"ႄမႈ.......မိူၼ်ပီႈႁၢၼ်ၼုမ်ႇဝႆႉလႃႇ"

"ၸၼ်ၸမ်ၸမ်တူၺ်းလူး"

"ၸႂ်ႈေတႉဢိူဝ်ႈႄမႈ ပဵၼ်ပီႈႁၢၼ်ၼုမ်ႇဢိူဝ်ႈ.

ၵမ်းၼၼ်ႉသွင်ၶႃႄမႈလုၵ်ႈဢွၼ်ၵၼ်တူၵ်းၸႂ်ေသ  
ၼႅတ်ႈလၢတ်ႈဝႃႈ "လူဝ်ႇၵႂႃႇၸႂ်းဢိူဝ်ႈၼၼ်ႉ" ၼႆေသ
ၼႅတ်ႈသိမ်းၶူဝ်း သွင်ၶႃႄမႈလုၵ်ႈယူႇ.........
....................................................................................
"တွၵ်ႉ.........တွၵ်ႉ"

"ႄမႈ.....ၸွင်ႇၸႂ်ႈၶွင်ႉၼႆႉေတႉယူႇႁ"

"ၸႂ်ႈယဝ်ႉလုၵ်ႈ တွႆႇတူၺ်းထႅင်ႈလူး"

ၵမ်းၼၼ်ႉ ယိင်းမွၼ်းလိူၼ်ၸင်ႇၽုၺ်ႇၽၵ်းတူေသ ပၼ်ၶဝ်ႈ ၼႂ်းၶွင်ႉ ၸၢႆးႁၢၼ်ၼုမ်ႇႄတႉ တိုၵ်ႉလိုဝ်ႈႁိူဝ်ႉယူႇ  ၶဝ်ၸင်ႇတူင်ႉတၵ်ႉဢုပ်ႇၵၼ် မွၼ်းလိူၼ်လႆႈႁူႉဝႃႈ ၵွၼ်ပဵၼ်ေၵႃႉႁၵ်ႉၵၼ်တင်းၸၢႆးႁၢၼ်ၼုမ်ႇၼႆႉယဝ်ႉ ....ယိင်းမွၼ်းလိူၼ်ႄတႉ ႁဵတ်းၼင်ႇဢမ်ႇပဵၼ်သင်ၵၼ်ေသ လၢတ်ႈဝႃႈ.....

"ၶႃႈပဵၼ်ၵူၼ်းၸွႆႈ မၼ်းၸၢႆးဝႆႉၵူၺ်း ဢမ်ႇယၢမ်ႈႁူႉၸၵ်းၵၼ် "
ယိင်းမွၼ်းလိူၼ်ယုမ်ႉလၢတ်ႈၵႂႃႇေသတႃႉ ၼႂ်းၸႂ်ဢွၼ်ႇၼၼ်ႉလၵ်ႉလွမ်ၶႅၼ်ယူႇမၼ်းၼၢင်းလၢတ်ႈယဝ်ႉေသဢၢင်ႈေတဢွၵ်ႇၵႂႃႇၼၼ်ႉ ၸၢႆးႁၢၼ်ႇၼုမ်ႇၸင်ႇ ၸၼ်မိုဝ်းမၼ်းဝႆႉေသ....

"ႁဝ်းဢမ်ႇယၢမ်ႈႁူႉၸၵ်းၵၼ် ၵူၺ်းၵႃႈ ႁဝ်းယၢမ်ႈပဵ
ၼ်ေၵႃႉႁၵ်ႉၵၼ်ယူႇဢမ်ႇၸႂ်ႈႁ မွၼ်း.....?
ၵွၼ်......ငိၼ်းၸူမ်းယဝ်ႉ ၵွၼ်ၶတ်းၸႂ် မႃးၸႂ်းပီႈထိုင်တီႈၼႆႉ "

"ဢမ်ႇပဵၼ်သင် ႁဝ်းပွင်ႇၸႂ်ယဝ်ႉ ၸိုင်ပီႈဢမ်ႇဝႃႈ ၸူမ်းယဝ်ႉမႃးၸွမ်းၵဝ်းပီႈထိုင်တီႈၼႆႉ ၼႆလႃႇ"

ယိင်းၵွၼ် တင်းလၢတ်ႈတင်းဢိုတ်ႇႁႆႈယူႇ မၼ်းၸၢႆးေတလၢတ်ႈၸိုင်ႉႁိုဝ်ေပႃးဢမ်ႇထုၵ်ႇယဝ်ႉ လွင်ႈဢၼ်ပူၼ်ႉမႃးၸိူဝ်း ၼၼ်ႉပဵၼ်တၢင်းၽိတ်းမၼ်းၸၢႆးသဵင်ႈသဵင်ႈယဝ်ႉ ...

"ၵွၼ် ႁဝ်းႁၵ်ႉသူ တင်းသွင်ယဝ်ႉ ႁဝ်းဢမ်ႇၶႂ်ႈတတ်းေၵႃႉလႂ်"

ၵမ်းၼၼ်ႉၵွၼ်....ယိူၼ်ႉဢမ်ႇလႆႈႄလႈ ၸင်ႇဝႃႈတီႈၸၢႆးႁၢၼ်ၼုမ်ႇ.....

"ပီႈ ပီႈႁၼ်ထိုင်ၼၢင်းယိင်းပဵၼ်ဢီႈသင် ပဵၼ်သင်ႄလႈ ပီႈႁဵတ်းၸိုင်ႉၼႆ ၸွင်ႇပီႈမီးႁူဝ်ၸႂ်ယူႇႁ"

သဵင်မၼ်းၼၢင်းေၵႃႈေပႃးသၼ်ႇလူင်ဝႆႉ ေပႃးဢမ်ႇၸႂ်ႈဝႃမၼ်းၸၢႆးဢမ်ႇယူႇလီၼႆႄတႉ ေတၺႃးၽတ်ႉၵႅမ်ႈပဵၼ်လၢႆ
ၵမ်းဢမ်ႇႁူႉယဝ်ႉ ႄမႈၶဝ်ၸင်ႇဝႃႈ ....

"လုၵ်ႈ ထိင်းဢိတ်းၼိုင်ႈ ၼႆႉပဵၼ်ၼႂ်းႁူင်းယႃ လွင်ႈၼိုင်ႈ ေၵႃႈ ပီႈၼုမ်ႇသူတိုၵ်ႉပဵၼ်ၼႆယူႇ  ၸင်ႇၵွႆႈလၢတ်ႈၵၼ်လီလီႄလႈ"

"ဢမ်ႇလႆႈၶႃႈႄမႈ ယိင်းေတလၢတ်ႈႁႂ်ႈယဝ်ႉမိူဝ်ႈ..ၼႆႉ ဝႃႈ
ႁိုဝ်ၶႃႈပီႈ ပီႈေတလိူၵ်ႈၽႂ်"

ၵႂၢမ်းေၶႃႈၼႆႉ မၼ်းၸၢႆးဢဝ်ထၢမ်ၶိုၼ်းတူဝ်ၸဝ်ႈၵဝ်ႇ ယူႇတႃႇေသႇ ၵူၺ်းၵႃႈ ဢမ်ႇတွပ်ႇယၢပ်ႇၼင်ႇ ဢၼ်ၵွၼ်ထၢမ် ဝၼ်းမိူဝ်ႈၼႆႉ ပဵၼ်ႁိုဝ်ေၵႃႈၵႃႈေတလႆႈတွပ်ႇ......

"ၵွၼ် မိူဝ်ႈလဵဝ်ၸၢတ်ႈပၢၼ်ႁဝ်း မီးၼႂ်းမိုဝ်းသူတင်းသွင်ေၵႃႉယဝ်ႉ သူေတၶႂ်ႈႁဵတ်းၸိုင်ႉႁိုဝ်ေၵႃႈ"

ၵႂၢမ်းတွပ်ႇေၶႃႈၼႆႉ ႁဵတ်းႁႂ်ႈ မွၼ်းႄလႈၵွၼ် ပဵၼ်ၵူၼ်းဢႃႉ ပႅတ်ႈၵမ်းၼိုင်ႈ ၸၢႆးႁၢၼ်ၼုမ်ႇ ၸင်ႇသိုပ်ႇလၢတ်ႈ ....

"သင်ဝႃႈသူသွင်ေၵႃႉ  ပွႆႇဝၢင်းၶႂၢင်းပၼ်ႁဝ်းလႆႈ  ႁႂ်ႈႁဝ်းလႆႈ
သိုပ်ႇ ၸွႆႈၵၢၼ်ၸိူဝ်ႉၸၢတ်ႈထႅင်ႈပွၵ်ႈၼိုင်ႈေသၵမ်း "
..............................................................

ယၢမ်းလုၵ်ႈဝၼ်းထွင်ႇႁိူဝ်ႈ မိူဝ်ႈၽွင်းၵၢင်ၼႂ်ၼၼ်ႉ သဵင်ေၵႃႉ  ႁၢၼ်ၸၢႆး  ေၵႃႉႁၢၼ်ယိင်းၶဝ် ၽိုၵ်းသၢၼ်း (လဵၼ်ႈႁႅင်း)
ေပႃးတဵမ်လူင်ဝႆႉၼိူဝ်လွႆတႆးလႅင်းၼၼ်ႉ ........
ဝၢႆးေသၸၢႆးႁၢၼ်ၼုမ်ႇလူင်းႁူင်းယႃယဝ်ႉ မၼ်းၸၢႆးၸင်ႇ  ႁွင်ႉဢဝ်ဢူၺ်းေၵႃႉမၼ်း  ၸိူဝ်းဢၼ်မီးၼမ်ႉၸႂ်ၸွႆႈၸိူဝ်ႉၸၢတ်ႈၼၼ်ႉ ၶိုၼ်ႈၸူးလွႆတႆးလႅင်းယဝ်ႉ ယွၼ်ပိူဝ်ႈတိၼ်ဢမ်ႇလီ ႄလႈ မၼ်းၸၢႆးလႆႈသိုပ်ႇၼင်ႈလုမ်း ယိပ်းသဵၼ်ႈမၢႆ ႁၢပ်ႇဢဝ် ပုၼ်ႈၽွၼ်းဢၼ်မၼ်းၸၢႆးႁဵတ်းလႆႈၼၼ်ႉယူႇ ........

ၽွင်းႁူဝ်ၶမ်ႈ လုၵ်ႈဝၼ်းၸမ်ႁၢႆၼၼ်ႉ  မၼ်းၸၢႆးၵႂႃႇၼင်ႈ  တီႈဢၼ်မုင်ႈသႃႇတီႈၼ်ုင်ႈေသ ဝူၼ်ႉလွင်ႈၸၢတ်ႈပၢၼ်မၼ်းယူႇ မၼ်းၸၢႆးၸင်ႇယိပ်းဢဝ် မိတ်ႈထိူဝ် ၼိဝ်ႉမိုဝ်းမၼ်းေသ
တႅမ်ႈဝႆႉတီႈတုမ်မႆႉလူင်ၼၼ်ႉယူႇ.....
လိၵ်ႈၼၼ်ႉတႅမ်ႈဝႆႉဝႃႈ......... #ၸွမ်းမႃးႄလႈေပႃးေပႉၸႂ် ၼႆယဝ်ႉ ....

ေၶႃႈၵႂၢမ်းဢၼ်မၼ်းၸၢႆးၶႂ်ႈလၢတ်ႈၼၼ်ႉႄတႉ  ၵိူတ်ႇမႃးပဵၼ်ၸၢဝ်းၶိူဝ်းတႆးၼိုင်ႈေၵႃႉ  ၶႂ်ႈႁႂ်ႈမီးပုၼ်ႈၽွၼ်းၸိူဝ်ႉ
ၸၢတ်ႈ ၼိုင်ႈဢၼ် ပိၵ်ႉသမ်ႉဝႃႈ ဢမ်ႇဢဝ်ၼိူဝ်ႉတူဝ်ၸဝ်ႈ
ၵဝ်ႇၼၼ်ႉ လူႇပၼ်လႆႈေၵႃႈ  ႁႂ်ႈလႆႈဢဝ် ႁႅင်းၼမ်ႉၸႂ် ႁႅင်းပၺႃႇ ႁႅင်းငိုၼ်းၶမ်း ၸွႆႈထႅမ်ေသၵမ်း ဝႃႈၼႆေသၶဝ်ႈၵႂႃႇႁဵတ်းၵၢၼ်မၼ်းၸၢႆးယူႇယဝ်ႉ.........

"ယၢပ်ႇေၵႃႈယဝ်ႉႄလႈ ႁၢပ်ႇထႅင်ႈပိူဝ်ႉထႅင်ႈ လၢပ်ႇႁိုဝ်တွၼ်ႉဝႃႈ ၼမ်ႉၶူင်းဢူၺ် ႁိူဝ်ႉေတႉေၵႃႈ ၶႅၼ်းေသႁၢပ်ႇေၶျႃး ၼၵ်းေတႉေၵႃႈၶႅၼ်းေသမႃႇပွင်း......"

သဵင်ၵႂၢမ်းၶိုၵ်ႉၶႅမ်ႉ  ၼၼ်ႉေၵႃႈငိၼ်းမႃးဝွႆးဝွႆးေသ ႁၢႆၵႂႃႇလွႆးလွႆးယူႇယဝ်ႉ.......

                       #သုတ်းယဝ်ႉၶႃႈ
************                     ************
ယွၼ်းဢဝ်ၸိူင်းႁူဝ်ၼႆႉ ယွင်ႈေယႃးၼမ်ႉၸႂ်ေၵႃႉႁၢၼ်
ၶဝ်ေသ...........
ႁႂ်ႈၽူႈပၼ်ႁႅင်းႁဝ်းၶဝ် လႆႈၸွႆႈၵၢၼ်ၸိူဝ်ႉၸၢတ်ႈေသၵမ်း...

ၶႂၢင်းပၼ်ေသၵမ်း  ဢၼ်လႆႈတူၵ်းလိုၼ်းတၢင်းမွင်းယူႇ..
ပႂ်ႉထွမ်ႇေၶႃႈမဵတ်ႉတႃႇၽူႈပၼ်ႁႅင်း ႁဝ်းၶဝ်ယူႇၶႃႈ ေတသုိပ်ႇၶတ်းၸႂ်တႅမ်ႈဢွၵ်ႇမႃးပၼ်ထႅင်ႈယူႇၼႆ....

ၼပ်ႉယမ်ေသ
ၼုမ်ႇၸိုၼ်ႈၾႃႉ     13.3.2017   09:30